CAT 2024 Result Date: క్యాట్ 2024 ‘కీ’ విడుదల తేదీ వచ్చేసింది.. ఫలితాలు ఎప్పుడంటే..?
ప్రతిష్ఠాత్మక ఇండియన్ ఇన్స్టిట్యూట్ ఆఫ్ మేనేజ్మెంట్(ఐఐఎం) విద్యా సంస్థల్లో మేనేజ్మెంట్ కోర్సుల్లో ప్రవేశాలు పొందేందుకు నిర్వహించిన క్యాట్ 2024 పరీక్ష ఫలితాలు త్వరలోనే విడుదలకానున్నాయి. ఇందుకు సంబంధించిన ఆన్సర్ కీ విడుదల తేదీ తాజాగా జారీ అయ్యింది..
Updated on: Dec 02, 2024 | 7:06 AM
న్యూఢిల్లీ, డిసెంబర్ 2: దేశంలోని ప్రతిష్ఠాత్మక ఇండియన్ ఇన్స్టిట్యూట్ ఆఫ్ మేనేజ్మెంట్(ఐఐఎం) కళాశాలల్లో మేనేజ్మెంట్ కోర్సుల్లో ప్రవేశం పొందేందుకు నిర్వహించే ప్రవేశ పరీక్ష- కామన్ అడ్మిషన్ టెస్ట్(క్యాట్) 2024.. నవంబర్ 24న దేశ వ్యాప్తంగా పలు పరీక్ష కేంద్రాల్లో నిర్వహించిన సంగతి తెలిసిందే. దేశంలో మొత్తం 170 నగరాల్లో ఈ పరీక్ష జరిగింది. ఆన్లైన్ కంప్యూటర్ ఆధారిత విధానంలో జరిగిన ఈ పరీక్ష ఆన్సర్ కీ డిసెంబర్ 3న విడుదలకానుంది. అభ్యంతరాలు డిసెంబర్ 5వ తేదీలోగా ఆన్లైన్లో తెలియజేయాల్సి ఉంటుంది. డిసెంబర్ నెలాఖరు లేదా వచ్చే ఏడాది జనవరి రెండో వారంలో ఫలితాలు విడుదలయ్యే అవకాశముంది. క్యాట్లో సాధించిన పర్సంటైల్ ఆధారంగా ఐఐఎంలలో సీట్ల కేటాయింపు ఉంటుంది. క్యాట్ స్కోరు ఆధారంగా ఐఐఎంలే కాకుండా పేరున్న ఇతర కాలేజీల్లో కూడా ప్రవేశాలు పొందవచ్చు. ఇతర అప్డేట్ల కోసం అధికారిక వెబ్సైట్ చెక్ చేసుకోవచ్చు.
ఎస్ఎస్సీ స్టెనోగ్రాఫర్ ఎగ్జామ్ సిటీ ఇంటిమేషన్ స్లిప్పులు విడుదల.. డిసెంబర్ 10, 11 తేదీల్లో పరీక్షలు
దేశవ్యాప్తంగా వివిధ మంత్రిత్వ శాఖల్లో ఖాళీగా ఉన్న స్టెనోగ్రాఫర్ గ్రేడ్ సి (గ్రూప్ బి, నాన్ గెజిటెడ్), స్టెనోగ్రాఫర్ గ్రేడ్ డి (గ్రూప్ సి) పోస్టుల భర్తీకి సంబంధించి ఇటీవల స్టాఫ్ సెలక్షన్ కమిషన్ (SSC) నోటిఫికేషన్ విడుదల చేసిన సంగతి తెలిసిందే. ఈ ఏడాది గత జులై నెలలో ఎస్ఎస్సీ ఈ ప్రకటన జారీ చేసింది. ఈ నోటిఫికేషన్ కింద కేంద్ర ప్రభుత్వ శాఖల్లో మొత్తం 2,006 కొలువులను భర్తీ చేయనున్నారు. తాజాగా నియామక రాత పరీక్షకు సంబంధించిన సిటీ ఇంటిమేషన్ స్లిప్పులను కమిషన్ విడుదల చేసింది. ఇందులో పరీక్ష కేంద్రం, పరీక్ష తేదీ వివరాలు ఉంటాయి.
ఈ పోస్టులకు దరఖాస్తు చేసుకున్న అభ్యర్థులు ఎస్ఎస్సీ అధికారిక వెబ్సైట్లో రిజిస్ట్రేషన్ నంబర్, పాస్వర్డ్ వివరాలు నమోదు చేసి సిటీ ఇంటిమేషన్ స్లిప్పులను డౌన్లోడ్ చేసుకోవచ్చు. డిసెంబర్ 5న పరీక్షకు సంబంధించిన అడ్మిట్కార్డులు విడుదల కానున్నాయి. ఇక డిసెంబర్ 10, 11 తేదీల్లో దేశ వ్యాప్తంగా పరీక్షలు నిర్వహించనున్నారు. కంప్యూటర్ బేస్డ్ టెస్ట్, స్టెనోగ్రఫీలో స్కిల్ టెస్ట్ ఆధారంగా అభ్యర్థుల తుది ఎంపిక ఉంటుంది.
