మెడిక్లెయిమ్ విషయంలో సుప్రీం కోర్టు కీలక తీర్పు! ఇకపై మీ పరిహారం..

మోటారు వాహన ప్రమాద పరిహారాలకు సంబంధించిన ఒక కీలక కేసులో సుప్రీం కోర్టు ముఖ్యమైన తీర్పు వెలువరించింది. మెడిక్లెయిమ్ లేదా వైద్య బీమా పాలసీ కింద పొందిన మొత్తాన్ని, మోటారు ప్రమాదాల క్లెయిమ్‌ల ట్రిబ్యునల్ (MACT) మంజూరు చేసే పరిహారం నుంచి తగ్గించరాదని అత్యున్నత న్యాయస్థానం స్పష్టం చేసింది. ఈ రెండు ప్రయోజనాలు వేర్వేరు ప్రాతిపదికలపై ఆధారపడినవని కోర్టు పేర్కొంది. జస్టిస్ సంజయ్‌ కరోల్‌, జస్టిస్ విపుల్ ఎం. పంచోలిలతో కూడిన ధర్మాసనం ఈ తీర్పును వెలువరించింది. ట్రిబ్యునల్ మంజూరు చేసే పరిహారం చట్టబద్ధమైన హక్కు కాగా, మెడిక్లెయిమ్ ద్వారా లభించే మొత్తం బీమా ప్రీమియంలు చెల్లించి పొందిన ఒప్పందపరమైన ప్రయోజనమని కోర్టు వ్యాఖ్యానించింది.

ఈ కేసులో ఒక వ్యక్తి రోడ్డు ప్రమాదంలో గాయపడ్డారు. అనంతరం మోటారు ప్రమాదాల క్లెయిమ్‌ల ట్రిబ్యునల్ ఆయనకు ఆదాయ నష్టం, భవిష్యత్ అవకాశాలు, ప్రత్యేక ఆహారం, రవాణా, వైద్య ఖర్చులు తదితర అంశాలపై పరిహారం మంజూరు చేసింది. అదే సమయంలో ఆయన మెడిక్లెయిమ్ పాలసీ కింద కూడా వైద్య ఖర్చుల రీయింబర్స్‌మెంట్ పొందారు. అయితే బీమా సంస్థ, ఇప్పటికే వైద్య ఖర్చులు తిరిగి చెల్లించబడినందున, అదే మొత్తాన్ని మళ్లీ MACT పరిహారంలో చేర్చడం ద్వంద్వ ప్రయోజనం అవుతుందని వాదించింది. దీనిని సుప్రీంకోర్టు తిరస్కరించింది.

కోర్టు అభిప్రాయం ప్రకారం మోటారు వాహనాల చట్టం కింద లభించే పరిహారం ఒక చట్టబద్ధ హక్కు. కానీ మెడిక్లెయిమ్ పాలసీ ద్వారా లభించే మొత్తం, బీమా పాలసీదారు గతంలో చెల్లించిన ప్రీమియంల ఆధారంగా లభించే ఒప్పంద ప్రయోజనం. అందువల్ల ఈ రెండింటిని ఒకటిగా పరిగణించడం సరైంది కాదని పేర్కొంది. అవి ఒకే విధంగా కనిపించినప్పటికీ, వాటిని ద్వంద్వ ప్రయోజనంగా పరిగణించలేం అని సుప్రీంకోర్టు స్పష్టం చేసింది. ఈ తీర్పుతో రోడ్డు ప్రమాద బాధితులకు మరింత స్పష్టత లభించనుంది. కోర్టు మరో ముఖ్యమైన అంశాన్ని కూడా ప్రస్తావించింది. ఇలాంటి కేసుల్లో గతంలో వివిధ హైకోర్టులు పరస్పర విరుద్ధమైన తీర్పులు ఇచ్చిన విషయాన్ని గుర్తుచేస్తూ, దీనిని ఆందోళనకర పరిస్థితిగా పేర్కొంది. ఈ తీర్పు భవిష్యత్తులో మోటారు ప్రమాద పరిహారం, మెడిక్లెయిమ్ క్లెయిమ్‌లకు సంబంధించిన కేసుల్లో కీలక మార్గదర్శకంగా మారే అవకాశముంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి