Fixed Deposit Monthly Income: ఫిక్స్డ్ డిపాజిట్ నుంచి నెలనెలా ఆదాయం.. అదెలా సాధ్యం.. తెలియాలంటే ఇది చదవండి..
సాధారణంగా ఈ ఎఫ్డీలలో ఒకేసారి పెట్టుబడి పెట్టి.. కొంత కాల వ్యవధి తర్వాత అంటే మెచ్యూరిటీ తర్వాత మీరు జమ చేసిన మొత్తంతో పాటు దానికి ముందే నిర్ణయించిన వడ్డీ రేటు ప్రకారం వచ్చిన మొత్తాన్ని ఒకేసారి విత్ డ్రా చేసుకునే వీలుంటుంది. అలా కాకుండా ఈ ఎఫ్డీలో మరో విధానం కూడా అందుబాటులో ఉందని మీకు తెలుసా? ఒకేసారి డబ్బు మొత్తం విత్ డ్రా చేయకుండా నెల నెలా జీతం మాదిరి వస్తుంది.
Updated on: Nov 30, 2023 | 6:00 PM
ఫిక్స్డ్ డిపాజిట్(ఎఫ్డీ).. మన దేశంలో అత్యంత ప్రజాదరణ పొందిన పథకం. దీనిలో పెట్టుబడులు సురక్షితమైనవిగా జనాలు భావిస్తారు. అధిక వడ్డీతో పాటు కచ్చితమైన రాబడులు వస్తుండటం దీనికి ప్రధాన కారణం. సాధారణంగా ఈ ఎఫ్డీలలో ఒకేసారి పెట్టుబడి పెట్టి.. కొంత కాల వ్యవధి తర్వాత అంటే మెచ్యూరిటీ తర్వాత మీరు జమ చేసిన మొత్తంతో పాటు దానికి ముందే నిర్ణయించిన వడ్డీ రేటు ప్రకారం వచ్చిన మొత్తాన్ని ఒకేసారి విత్ డ్రా చేసుకునే వీలుంటుంది. అలా కాకుండా ఈ ఎఫ్డీలో మరో విధానం కూడా అందుబాటులో ఉందని మీకు తెలుసా? ఒకేసారి డబ్బు మొత్తం విత్ డ్రా చేయకుండా నెల నెలా జీతం మాదిరి వస్తుంది. అదెలా అని ఆశ్చర్యపోతున్నారా? నిజమేనండి. ఫిక్స్డ్ డిపాజిట్లలో ఆ తరహా ఆప్షన్ కూడా అందుబాటులో ఉంది. ఆ ఆప్షన్ ఏంటి? ఎలా పనిచేస్తుంది? పూర్తి వివరాలు ఇప్పుడు చూద్దాం..
ఫిక్స్డ్ డిపాజిట్ మంత్లీ ఇన్ కమ్..
ఫిక్స్డ్ డిపాజిట్ పథకంలో రెండు రకాల ఆప్షన్లు ఖాతాదారుల కోసం అందుబాటులో ఉంటాయి. మొదటికి క్యుములేటివ్ ఎఫ్డీ.. ఇక్కడ మెచ్యూరిటీ సమయానికి అసలు, వడ్డీ రెండింటినీ కలిపి ఒకేసారి చెల్లిస్తారు. రెండోది నాన్-క్యుములేటివ్ ఎఫ్డీ స్కీమ్. దీనిలో నిర్ణీత వ్యవధిలో సాధారణ చెల్లింపు జరుగుతుంది. దరఖాస్తు చేస్తున్నప్పుడు, మీరు నెలవారీ, త్రైమాసిక, అర్ధ-వార్షిక, వార్షిక ప్రాతిపదికన చెల్లింపులు చేయవచ్చు. మీరు నెలవారీ ఎంపికను ఎంచుకుంటే ప్రతి నెలా ఖాతాలోకి నిర్ణీత మొత్తం వస్తూనే ఉంటుంది.
ఫిక్స్డ్ డిపాజిట్ మంత్లీ ఇన్ కమ్ ఫీచర్లు ఇవి..
- ఈ పథకాన్ని ప్రారంభించడానికి ప్రాసెసింగ్ రుసుము లేదు.
- ఈ ఫిక్స్డ్ డిపాజిట్ మంత్లీ ఇన్ కమ్ పథకంలో కనీసం రూ. 1,000 నుంచి గరిష్టంగా ఏదైనా మొత్తాన్ని డిపాజిట్ చేయవచ్చు.
- మార్కెట్ హెచ్చుతగ్గులు ఉన్నప్పటికీ, పెట్టుబడిదారులు స్థిర వడ్డీ ప్రకారం నెలవారీ రాబడిని పొందుతారు. అంటే ఇది పూర్తిగా సురక్షితం.
- ఫిక్స్డ్ డిపాజిట్ నెలవారీ ఆదాయ పథకంపై రుణ సౌకర్యం కూడా అందుబాటులో ఉంది. పెట్టుబడిదారులు తమ డిపాజిట్లపై రుణం తీసుకోవచ్చు.
- వారి ఆర్థిక అవసరాలను తీర్చడానికి, పెట్టుబడిదారు ఏ సమయంలోనైనా నిర్ణీత ఫార్మాలిటీని పూర్తి చేయడం ద్వారా తమ నగదును ఉపసంహరించుకోవచ్చు.
వీరికి చాలా ప్రయోజనకరం..
ఫిక్స్డ్ డిపాజిట్ నెలవారీ ఆదాయం సీనియర్ సిటిజన్లకు మెరుగైన ఎంపిక. వారు తమ డిపాజిట్లపై నెలవారీ ఆదాయాన్ని పొందగలుగుతారు. వారు తమ పొదుపులను క్యుములేటివ్ ఎఫ్డీలో పెట్టుబడి పెట్టినట్లయితే, వారు నిరంతర డబ్బును పొందలేరు. మెచ్యూరిటీపై మాత్రమే డబ్బు పొందుతారు. అదే సమయంలో, నాన్-క్యుములేటివ్ ఎఫ్డీలో, వారి డబ్బు కూడా సురక్షితంగా ఉంటుంది. వారు రిటర్న్లను పొందుతారు. వారు ప్రతి నెల లేదా మూడు నెలలకు వడ్డీ రూపంలో వారి చేతుల్లో డబ్బును పొందుతూ ఉంటారు.
పన్ను నియమాలు ఇలా ఉన్నాయి..
మీరు పన్ను ఆదా చేసే ఫిక్స్డ్ డిపాజిట్ ఖాతాలో పెట్టుబడి పెడితే, ఆదాయపు పన్ను చట్టంలోని సెక్షన్ 80సీ కింద ఒక ఆర్థిక సంవత్సరంలో రూ. 1,50,000 వరకు పన్ను మినహాయింపు పొందవచ్చు. ఒక ఆర్థిక సంవత్సరంలో నెలవారీ ఆదాయం లేదా రాబడి రూ. 40,000 కంటే ఎక్కువ ఉంటే, బ్యాంక్ 10 శాతం టీడీఎస్ ని తీసివేస్తుంది. సీనియర్ సిటిజన్ల విషయంలో ఈ మొత్తం రూ.50,000 వరకూ ఉంటుంది.
మరిన్ని బిజినెస్ వార్తల కోసం ఇక్కడ క్లిక్ చేయండి..
