రైలు ప్రయాణికులకు గుడ్‌న్యూస్‌.. బెంగళూరు గోవా మధ్య వందే భారత్‌ రైలు..?

బెంగళూరు – గోవా మధ్య వందే భారత్ రైలు సేవ త్వరలో ప్రారంభమవుతుందా అన్న దానిపై రైల్వే వర్గాల్లో చర్చలు కొనసాగుతున్నాయి. ప్రస్తుతం ఇది ప్రతిపాదన దశలోనే ఉంది, తుది ఆమోదం ఇంకా రాలేదు. ఈ మార్గంలో వందే భారత్ నడపాలన్న ప్రతిపాదనతో సౌత్‌ వెస్ట్రన్‌ రైల్వే(SWR), సౌత్‌రన్‌ రైల్వే, కొంకన్‌ రైల్వే కార్పోరేషన్‌ లిమిటెడ్‌ (KRCL) ఈ నెల ప్రారంభంలో రైల్వే బోర్డును సంప్రదించాయి.

ప్రతిపాదిత ప్రణాళిక ప్రకారం రైలు వారానికి ఆరు రోజులు నడుస్తూ యశ్వంత్‌పూర్‌ జంక్షన్‌ నుంచి ఉదయం 6:05కు బయలుదేరి సాయంత్రం 7:15కు గోవాలోని మడ్‌గావ్‌ జంక్షన్‌ చేరుతుంది. మొత్తం ప్రయాణ సమయం 12 గంటలకు పైగానే ఉంటుందని అంచనా. మార్గమధ్యంలో హసన్, సకలేశ్‌పూర్, సుబ్రహ్మణ్య రోడ్, పాడిల్ స్టేషన్లలో ఆగేలా ప్రాథమిక షెడ్యూల్ రూపొందించారు. పోలిస్తే ప్రస్తుతం నడుస్తున్న యశ్వంత్‌పూర్–వాస్కో డ గామా ఎక్స్‌ప్రెస్ దాదాపు 15 గంటలు పడుతోంది. అయితే వందే భారత్ వేగవంతమైన రైలు అయినప్పటికీ, ఘాట్ సెక్షన్ల కారణంగా ఈ మార్గంలో సగటు వేగం గంటకు 50 కి.మీ కంటే తక్కువగా ఉండొచ్చని రైల్వే బోర్డు అంచనా వేస్తోంది.

కొండ ప్రాంతాల్లో వేగం గంటకు 30 కి.మీ వరకు పరిమితం కావచ్చు. అలాగే టెర్మినల్ స్టేషన్ల మధ్య దూరం ఎక్కువగా ఉండటంతో ఈ సేవను సజావుగా నడపడానికి రెండు వందే భారత్ రేక్‌లు అవసరమవుతాయని అధికారులు భావిస్తున్నారు. ఇంకా స్టాపేజీలు, తుది టైమ్‌టేబుల్‌పై రైల్వే బోర్డు నిర్ణయం తీసుకోలేదు. SWR ఇప్పటికే తన ప్రతిపాదనలు సమర్పించి ఆమోదం కోసం ఎదురుచూస్తోంది. అంటే ప్రస్తుతం ఈ సేవ ఖరారు కాలేదు కానీ ఆమోదం లభిస్తే బెంగళూరు–గోవా ప్రయాణానికి వేగవంతమైన కొత్త ఎంపిక అందుబాటులోకి వచ్చే అవకాశం ఉంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి