అక్షయ తృతీయకు బంగారం షాక్.. గతేడాదితో పోలిస్తే ధర ఎంత పెరిగిందో తెలిస్తే మైండ్ బ్లాంకే..

అక్షయ తృతీయ వచ్చిందంటే గోల్డ్ షాపులు కిక్కిరిసిపోతాయి. కానీ ఈ ఏడాది పసిడి ధరలు సామాన్యుడిని భయపెడుతున్నాయి. గత ఏడాది ఇదే సమయానికి తులం బంగారం లక్ష రూపాయల లోపే ఉండగా.. ఇప్పుడు ఆ ధర చూస్తే కళ్లు బైర్లు కమ్ముతున్నాయి. లక్ష రూపాయలు చేతిలో పట్టుకుని నగల షాపుకెళ్తే.. తులం బంగారం కూడా రాకపోవడం ఈ ఏడాది అతిపెద్ద షాక్. గత ఏడాదికి, ఈ ఏడాదికి ధరల్లో వచ్చిన తేడా ఎంతంటే..?

Gold Price In 2026 Akshaya Tritiya

Krishna S |
Updated on: Apr 11, 2026 | 1:32 PM

హిందూ సంప్రదాయంలో బంగారం, వెండి కొనుగోలుకు అక్షయ తృతీయ అత్యంత పవిత్రమైన రోజు. కానీ ఈ ఏడాది ఏప్రిల్ 19న రానున్న అక్షయ తృతీయ కొనుగోలుదారులకు చుక్కలు చూపిస్తోంది. గత ఏడాదితో పోలిస్తే ఈసారి ధరలు సామాన్యుడి ఊహకు అందనంత ఎత్తుకు చేరుకున్నాయి. గతంలో ఒక నిర్ణీత బడ్జెట్‌లో భారీగా లభించిన పసిడి, వెండి.. ఇప్పుడు అవే ధరలకు సగం కూడా రాకపోవడం గమనార్హం. 2025 అక్షయ తృతీయ సమయంలో 10 గ్రాముల 24 క్యారెట్ల బంగారం ధర సుమారు రూ.96,000 నుండి రూ.97,000 మధ్య ఉండేది. అంటే సుమారు లక్ష రూపాయలు ఉంటే ఒక తులం బంగారం ఇంటికి తెచ్చుకునే వీలుండేది.

సీన్ రివర్స్

కానీ ఇప్పుడు సీన్ పూర్తిగా మారిపోయింది. 2026లో బంగారం ధరలు తులం రూ.1.45 లక్షల నుండి రూ.1.59 లక్షల మధ్య ఊగిసలాడుతున్నాయి. దీనివల్ల గత ఏడాది మనం వెచ్చించిన రూ.96,000లకు ఇప్పుడు కేవలం రూ.6 నుండి 6.5 గ్రాముల బంగారం మాత్రమే లభిస్తోంది. అంటే ఒక్క ఏడాదిలోనే మన కొనుగోలు శక్తి 40 శాతం తగ్గిపోయింది.

వెండి సూపర్ స్టార్.. ఏకంగా 150 శాతం పెరుగుదల

బంగారం ధరలే అనుకుంటే వెండి ధరలు అందరినీ ఆశ్చర్యపరుస్తున్నాయి. 2025 ఏప్రిల్‌లో కిలో వెండి ధర రూ.97,000 ఉండగా ప్రస్తుతం అది రూ.2,43,300 దాటేసింది. అంటే గత ఏడాది వెండిలో పెట్టుబడి పెట్టిన వారి సంపద కేవలం ఒక్క సంవత్సరంలోనే 2.5 రెట్లు పెరిగింది. ఒకానొక దశలో వెండి ధర కిలో రూ.3 లక్షల మార్కును కూడా తాకడం గమనార్హం. 2025లో రూ.1 లక్షతో ఒక కిలో వెండి వచ్చేది. కానీ ఇప్పుడు అదే లక్ష రూపాయలతో కేవలం 410 గ్రాముల వెండి మాత్రమే వస్తోంది.