చంద్రబాబుపై మోహన్‌బాబు వ్యాఖ్యలు

ఏపీ ముఖ్యమంత్రి చంద్రబాబుపై విమర్శలు గుప్పించారు సినీనటుడు మోహన్‌బాబు. చంద్రబాబు గత ఎన్నికల్లో ఇచ్చిన మాటను నిలబెట్టుకోలేకపోయారని, విద్యాభివృద్ధి అంశంలో ఏపీ సర్కారుకు చిత్తశుద్ధి లేదని విమర్శించారు. తిరుపతిలో ఆయన మాట్లాడుతూ, తాను నిర్వహిస్తున్న విద్యానికేతన్ విద్యార్థులకు 2014-15 నుంచి ఫీజు రీయింబర్స్‌మెంట్ ఇవ్వడం లేదని తెలిపారు. దీంతో విద్యార్థులు తీవ్రంగా ఇబ్బందులు పడుతున్నారని పేర్కొన్నారు.

మాట నిలబెట్టుకోని ముఖ్యమంత్రి ఇప్పుడు రాష్ట్రమంతా తిరుగుతూ అమలు చేయని హామీలు ఎందుకిస్తున్నారని మోహన్‌బాబు ప్రశ్నించారు. తాను ఏ పార్టీలోనూ లేనని స్పష్టం చేస్తూ, తన వ్యాఖ్యల‌ వెనుక ఏ రాజకీయ పార్టీ ప్రోద్బలం లేదని చెప్పారు.