Horoscope Today: వారి ఆర్థిక, వ్యక్తిగత సమస్యలు పరిష్కారం.. 12రాశుల వారి రాశిఫలాలు

దిన ఫలాలు (ఆగస్టు 2, 2025): మేష రాశి వారికి ఉద్యోగంలో బరువు బాధ్యతలు పెరిగినప్పటికీ తగిన ప్రతిఫలం దక్కే అవకాశం ఉంది. వృషభ రాశికి చెందిన ఉద్యోగులకు, నిరుద్యోగులకు మంచి ఆఫర్లు అందే అవకాశముంది. మిథున రాశి వారికి వ్యక్తిగత సమస్యలు చాలావరకు పరిష్కారమయ్యే అవకాశముంది. మేష రాశి మొదలు మీన రాశి వరకు 12 రాశుల వారికి శనివారంనాటి రాశిఫలాలు ఎలా ఉన్నాయంటే..?

మేషం (అశ్విని, భరణి, కృత్తిక 1)

వృత్తి, ఉద్యోగాలు ఉత్సాహంగా సాగిపోతాయి. ఉద్యోగంలో బరువు బాధ్యతలు పెరిగినప్పటికీ తగిన ప్రతిఫలం ఉంటుంది. వ్యాపారాల్లో లాభాలు బాగానే పెరుగుతాయి. ఆదాయం వృద్ధి చెందడానికి అవకాశం ఉంది. ఒకటి రెండు వ్యక్తిగత సమస్యల నుంచి విముక్తి లభిస్తుంది. ఇంటా బయటా కొద్దిగా ఒత్తిడి తగ్గుతుంది. పెళ్లి సంబంధం విషయంలో బంధువుల నుంచి శుభవార్త వింటారు. ఆలయ సందర్శనకు అవకాశం ఉంది. కుటుంబ సభ్యులతో కలిసి నిర్ణయాలు తీసుకోవడం మంచిది.

వృషభం (కృత్తిక 2,3,4, రోహిణి, మృగశిర 1,2)

ఉద్యోగులకు, నిరుద్యోగులకు మంచి ఆఫర్లు అందుతాయి. వృత్తి, వ్యాపారాల్లో కొద్దిగా లాభాలు పెరుగుతాయి. దూర ప్రాంతంలో ఉన్న బంధువులతో పెళ్లి సంబంధం కుదురుతుంది. ఆర్థికంగా అదృష్టం కలిసి వచ్చే సూచనలున్నాయి. ఇతరులకు మేలు జరిగే పనులు చేస్తారు. మిత్రులతో కలిసి సేవా కార్యక్రమంలో పాల్గొంటారు. కుటుంబ సభ్యుల్లో ఒకరు చదువులు లేదా ఉద్యోగంలో ఉన్నత స్థాయికి వెడతారు. ఆరోగ్యం నిలకడగా ఉంటుంది. ఆశించిన శుభవార్త వినడం జరుగుతుంది.

మిథునం (మృగశిర 3,4, ఆర్ద్ర, పునర్వసు 1,2,3)

వృత్తి, ఉద్యోగాలు ప్రోత్సాహకరంగా సాగిపోతాయి. అధికారులకు మీ సమర్థత మీద నమ్మకం పెరుగుతుంది. వ్యాపారాల్లో కొద్దిగా లాభాలు గడిస్తారు. ఊహించని ఆర్థిక పురోగతి కలుగుతుంది. ఆస్తి వివాదం ఒకటి పరిష్కారం అవుతుంది. వ్యక్తిగత సమస్యలు చాలావరకు పరిష్కారమవుతాయి. పిల్లల నుంచి శుభవార్తలు వింటారు. ఇంటా బయటా ఒత్తిడి ఉండే అవకాశం ఉంది. ఆహార, విహారాల్లో జాగ్రత్తగా ఉండడం మంచిది. రావలసిన డబ్బు చేతికి అంది అవసరాలు తీరిపోతాయి.

కర్కాటకం (పునర్వసు 4, పుష్యమి, ఆశ్లేష)

వృత్తి, ఉద్యోగాల్లో ప్రాధాన్యం, ప్రాభవం బాగా పెరుగుతాయి. హోదా లభించే అవకాశం కూడా ఉంది. ఇంటా బయటా మాటకు విలువ పెరుగుతుంది. ఆస్తి, ఆర్థిక వ్యవహారాలను పూర్తిగా చక్కబెడతారు. పెండింగు పనులను పూర్తి చేయడం వల్ల ఆర్థిక లాభం పొందుతారు. వ్యక్తిగత సమస్య ఒకటి అనుకోకుండా పరిష్కారం అవుతుంది. కుటుంబ వ్యవహారాల మీద దృష్టి పెడతారు. వ్యాపారాల్లో లాభాలు పెరుగుతాయి. అదనపు ఆదాయ ప్రయత్నాలు కలిసి వస్తాయి. ప్రయాణాలు లాభిస్తాయి.

సింహం (మఖ, పుబ్బ, ఉత్తర 1)

వృత్తి, ఉద్యోగాల్లో అధికారులు మీ మీద ఎక్కువగా ఆధారపడే అవకాశం ఉంది. కొద్ది ప్రయత్నంతో ఆర్థిక, ఆస్తి వ్యవహారాలు ఒక కొలిక్కి వస్తాయి. ఆదాయం కొద్దిగా వృద్ధి చెందుతుంది. కుటుంబ విషయాల్లో ఆలోచించి నిర్ణయాలు తీసుకోవడం మంచిది. వ్యక్తిగత సమస్యలు తగ్గుముఖం పడతాయి. ఆరోగ్యం మీద శ్రద్ద పెట్టడం మంచిది. కుటుంబ జీవితం హ్యాపీగా సాగిపోతుంది. పిల్లలు ఘన విజయాలు సాధిస్తారు. నిరుద్యోగులు ఆశించిన శుభవార్త వింటారు. ఆరోగ్యం బాగానే ఉంటుంది.

కన్య (ఉత్తర 2,3,4, హస్త, చిత్త 1,2)

వృత్తి, ఉద్యోగాల్లో హోదా పెరిగే అవకాశం ఉంది. కొత్త బాధ్యతలు నిర్వర్తించాల్సి వస్తుంది. ఆర్థిక విషయాలకు సమయం అనుకూలంగా ఉంది. ఏ ప్రయత్నం చేపట్టినా కలిసివస్తుంది. పట్టుదలగా పనులు, ముఖ్యమైన వ్యవహారాల్ని పూర్తి చేస్తారు. ఆర్థిక వ్యవహారాల్లో జాగ్రత్తగా ఉండడం మంచిది. నిరుద్యోగులు శుభవార్తలు వింటారు. వ్యాపారాల్లో ఆశించిన స్థాయిలో లాభాలు గడిస్తారు. వినోద యాత్రకు ప్లాన్ చేస్తారు. ఆరోగ్యం మీద శ్రద్ధపెట్టాలి. ప్రయాణాల వల్ల లాభాలుంటాయి.

తుల (చిత్త 3,4, స్వాతి, విశాఖ 1,2,3)

అనేక విధాలుగా ఆదాయం వృద్ధి చెందుతుంది. ఒకటి రెండు ఆర్థిక, వ్యక్తిగత సమస్యలు పరిష్కారమవుతాయి. మనసులోని ఒకటి రెండు కోరికలు నెరవేరుతాయి. బంధువుల నుంచి ఆశించిన శుభ వార్తలు వింటారు. వృత్తి, ఉద్యోగాల్లో బాధ్యతలు పెరిగే అవకాశం ఉంది. కుటుంబంతో దైవ కార్యాల్లో పాల్గొంటారు. వ్యాపారాల్లో కొద్దిపాటి లాభాలకు అవకాశం ఉంది. ఆర్థిక ప్రయత్నాలు ఒక కొలిక్కి వస్తాయి. ప్రయాణాల వల్ల బాగా కలిసి వస్తుంది. చదువుల్లో పిల్లలు విజయాలు సాధిస్తారు.

వృశ్చికం (విశాఖ 4, అనూరాధ, జ్యేష్ట)

ఉద్యోగంలో అధికారుల నుంచి ప్రోత్సాహం లభిస్తుంది. బాధ్యతల్లో సానుకూల మార్పులు చోటు చేసుకుంటాయి. కొద్ది శ్రమతో ఆస్తి, ఆర్థిక వ్యవహారాలను పూర్తి చేస్తారు. డాక్టర్లు, లాయర్లు, తదితర వృత్తుల వారికి డిమాండ్ బాగా పెరుగుతుంది. నిరుద్యోగులకు మంచి ఆఫర్లు, అవకాశాలు అందుతాయి. వ్యాపారాలు ఆశాజనకంగా పురోగమిస్తాయి. ఆరోగ్యం పరవాలేదనిపిస్తుంది. విదేశాల్లో ఉన్న పిల్లల నుంచి కొన్ని శుభవార్తలు వింటారు. రాదనుకున్న డబ్బు చేతికి అందుతుంది.

ధనుస్సు (మూల, పూర్వాషాఢ, ఉత్తరాషాఢ1)

ఉద్యోగ జీవితం సానుకూలంగా, సంతృప్తికరంగా సాగిపోతుంది. హోదా పెరిగే అవకాశం ఉంది. డాక్టర్లు, లాయర్లు వంటి వృత్తుల వారికి తీరిక లేని పరిస్థితి ఏర్పడుతుంది. వ్యాపారాలు లాభదాయకంగా కొనసాగుతాయి. ఆదాయం బాగానే వృద్ధి చెందుతుంది. ముఖ్యమైన వ్యవహారాల్లో శ్రమాధిక్యత ఉంటుంది. ఒకటి రెండు ఆర్థిక, వ్యక్తిగత సమస్యలు పరిష్కారం అవుతాయి. కుటుంబ సభ్యుల మీద ఖర్చు పెరుగుతుంది. విహార యాత్రకు ప్లాన్ చేస్తారు. ఆరోగ్యం నిలకడగా ఉంటుంది.

మకరం (ఉత్తరాషాఢ 2,3,4, శ్రవణం, ధనిష్ట 1,2)

వృత్తి, ఉద్యోగ, వ్యాపారాలు నిలకడగా, సంతృప్తికరంగా సాగిపోతాయి. ఆర్థిక పరిస్థితి నిలకడగా ఉంటుంది. ఆర్థిక వ్యవహారాలకు, ఆదాయ వృద్ధికి సమయం బాగా అనుకూలంగా ఉంది. కొద్ది ప్రయత్నంతో ముఖ్యమైన కార్యకలాపాలన్నీ పూర్తవుతాయి. బంధువులకు ఆర్థికంగా సహాయం చేయడం జరుగుతుంది. వ్యక్తిగత, కుటుంబ సమస్యలకు పరిష్కారం దొరుకుతుంది. షేర్లు, స్పెక్యు లేషన్లు, ఆర్థిక లావాదేవీలు బాగా లాభిస్తాయి. ఉద్యోగం మారడానికి ప్రయత్నాలు చేయడం మంచిది.

కుంభం (ధనిష్ట 3,4, శతభిషం, పూర్వాభాద్ర 1,2,3)

ఉద్యోగంలో ఆశించిన ప్రోత్సాహం, ఆదరణ లభిస్తాయి. అధికారులు మీ మీద ఎక్కువగా ఆధార పడతారు. వృత్తి జీవితం సాఫీగా, సంతృప్తికరంగా సాగిపోతుంది. వ్యాపారాలు నిలకడగా పురోగమిస్తాయి. నిరుద్యోగులకు మంచి ఆఫర్ అందే అవకాశం ఉంది. బంధుమిత్రులతో సరదాగా కాలక్షేపం చేస్తారు. కుటుంబంలో అపార్థాలకు అవకాశం ఉంది. ఆరోగ్యం మీద శ్రద్ధ పెట్టాల్సి ఉంటుంది. ప్రయాణాలు లాభిస్తాయి. బంధువుల రాకపోకలుంటాయి. ఇంటా బయటా ఒత్తిడి బాగా ఉంటుంది.

మీనం (పూర్వాభాద్ర 4, ఉత్తరాభాద్ర, రేవతి)

వృత్తి, ఉద్యోగాల్లో మీ మాటకు, చేతకు తిరుగుండదు. వ్యాపారాలు ఆశాజనకంగా ముందుకు సాగుతాయి. ఆస్తి, ఆర్థిక వ్యవహారాల్లో జాగ్రత్తగా వ్యవహరించడం మంచిది. ఇష్టమైన బంధుమిత్రు లతో ఎంజాయ్ చేస్తారు. తోబుట్టువులతో ఆస్తి వివాదం ఒకటి పరిష్కారమయ్యే అవకాశం ఉంది. ఉద్యోగ, పెళ్లి ప్రయత్నాలలో శుభవార్తలు వింటారు. కొందరు మిత్రుల వల్ల ఆర్థికంగా నష్టపోయే అవకాశం ఉంది. ఆదాయానికి లోటుండదు. మంచి పరిచయాలు కలుగుతాయి. ఆరోగ్యం బాగానే ఉంటుంది.