Tomato: రికార్డు సృష్టిస్తున్న టమాటా ధర.. కర్నూలు జిల్లా ఆస్పరిలో కిలోకు రూ.150..

టమాటా ధర వాయువేగంతో దూసుకెళ్తోంది. పెట్రోల్, డీజిల్ రేటు దాటేసింది. కర్నూలు జిల్లా ఆస్పరి కూరగాయల మార్కెట్ చరిత్రలో టమాటా రికార్డు ధర పలికింది. 25 కిలోల టమోటా బాక్స్ 3750 రూపాయలు పలికింది. అంటే కిలోకు 150 రూపాయలు పలికింది. టమాటే కాదు మిగతా కూరగాయల రేట్లు కూడా పెరుగుతున్నాయి. ప్రస్తుతం కిలో బీరకాయ రూ.80లు పలుకుతుంది. కిలో వంకాయ ధర 60 రూపాయలు ఉంది. అసలే పెట్రోల్, డీడిల్, వంట గ్యాస్ రేట్లు పెరిగి సామాన్యులు ఇబ్బంది పడుతుంటే తాజాగా కూరగాయల ధరలు వారికి చుక్కలు చూపిస్తున్నాయి. దీనికి తోడు సబ్బులు, సర్ఫులు, బిస్కెట్ల రేట్లు కూడా పెరిగాయి. దీంతో ప్రజలు ఏమి కొనలేకపోతున్నారు.

కిలో టమాటా ధర దాదాపు కిలో చికెన్‎ ధరకు చేరువలో ఉంది. గత నెలన్నరగా దక్షిణాది రాష్ట్రాల్లో భారీ వర్షాలు కురుస్తుండడంతో టమాటా సరఫరాకు అంతరాయం కలుగుతోందని, ఫలితంగా ధరలు పెరిగిపోతున్నాయని వ్యాపారులు చెబుతున్నారు. ఈ ధరలు చూసి వినియోగదారులు బెంబేలెత్తిపోతుంటే మరోపక్క రైతులు మాత్రం కాస్త ఊపిరి పీల్చుకుంటున్నారు. వాస్తవానికి అక్టోబర్‌లో కురిసిన అకాల వర్షాలకు టమాటా పంట దెబ్బతినడంతో రైతులు తీవ్రంగా నష్టపోయారు. అయితే ఇప్పుడు మిగిలిన పంటకు అధిక ధర గిట్టుబాటు అవుతుండడంతో కొంతైనా తమ నష్టాన్ని పూడ్చుకోగలుగుతున్నామని రైతులు అంటున్నారు.

Read Also.. Bore Well Water: నాడు చుక్కనీరు పడని బోరుబావి నుంచి ఉబికివస్తున్న భూగర్భ జలం..!