Alert: ఈ నెల 19న దేశవ్యాప్తంగా బ్యాంకులు బంద్.. ఆ సేవలపై ప్రభావం..

ఈ వీకెండ్‌లో మీరేమైనా బ్యాంక్ పనులు పెట్టుకున్నారా.? అయితే కాస్త ఆగండి. ఈ నెల 19వ తేదీన బ్యాంకులు బంద్ కానున్నాయి. అది ఎందుకో ఇప్పుడు తెలుసుకుందాం.

నవంబర్ 19వ తేదీన బ్యాంకింగ్ ఉద్యోగుల సంఘం దేశవ్యాప్తంగా ప్రభుత్వ రంగ బ్యాంకుల బంద్‌‌కు పిలుపునిచ్చింది. ప్రభుత్వ రంగ బ్యాంకుల్లో ఔట్ సోర్సింగ్ ఉద్యోగుల నియామక నిర్ణయాన్ని వ్యతిరేకిస్తూ సమ్మెకు పిలుపునిచ్చారు. దీంతో ప్రభుత్వ రంగ బ్యాంకులు ఏవి కూడా ఈ శనివారం(నవంబర్ 19) పని చేయవు. అయితే ప్రైవేటు బ్యాంకులు మాత్రం యధాతధంగా పని చేస్తాయి.

ప్రభుత్వ రంగ బ్యాంకుల్లో ఔట్ సోర్సింగ్ ఉద్యోగుల నియామకం వల్ల ఖాతాదారుల సొమ్ముకు విఘాతం కలగడమే కాదు.. ఈ విధానం వల్ల ఉద్యోగ భద్రతకు ముప్పు ఏర్పడుతుందని ఆల్ ఇండియా బ్యాంక్ ఎంప్లాయిస్ అసోసియేషన్ ప్రధాన కార్యదర్శి సీహెచ్ వెంకటాచలం అన్నారు. ఈ విధానంపై తమ ఆందోళన తెలియజేయడానికే ఈ ఒక్క రోజు సమ్మెకు దిగుతున్నామని తెలిపారు. కాగా, ఈ సమ్మెలో కిందస్థాయి ఉద్యోగులు మాత్రమే ఆందోళన చేపట్టనున్నారని.. ఉన్నతోద్యోగులు కాదని వెంకటాచలం తెలిపారు. సమ్మె రోజున క్యాష్ డిపాజిట్, విత్ డ్రా, చెక్ క్లియరెన్స్, ఏటీఎం సేవలపై ప్రభావం పడనుంది.