కళ్లముందే కారులో మంటలు.. తండ్రి సజీవ దహనం! కుమారుడిని ఎలా కాపాడారంటే?

గుంటూరు ఐపిడి కాలనీలో నివాసం ఉండే హరి క్రిష్ణ కొన్నేళ్లుగా కిడ్ని వ్యాధితో బాధపడుతున్నాడు. కాటన్ బయ్యర్‌గా పనిచేసిన హరిక్రిష్ణకు వ్యాధి ముదరడంతో డయాలసిస్ చేయించుకుంటున్నాడు. 55 ఏళ్ల తండ్రిని చూసుకునేందుకు కొడుకు అఖిలేష్ సాఫ్ట్ వేర్ ఉద్యోగం మానేసి వచ్చి తండ్రి వద్దే ఉంటున్నాడు. ఈ క్రమంలోనే ఈ రోజు ప్రవేటు ఆసుపత్రిలో డయాలసిస్ చేయించుకోవాల్సి ఉంది. తొమ్మది గంటల సమయంలో తండ్రీకొడుకులిద్దరూ కారులో ఆసుపత్రికి బయలు దేరారు.

అఖిలేష్ కార్ డ్రైవ్ చేస్తుండగా.. హరిక్రిష్ణ వెనుక సీట్లో కూర్చుకొన్నాడు. అయితే ఆసుపత్రికి వెళ్లిన తర్వాత డాక్టర్ అందుబాటులో లేడని తెలిసి తిరిగి ఇంటికి బయలు దేరారు. మరి కొద్దీ అడుగుల్లోనే అపార్ట్ మెంట్‌లోకి వెళతారనగా కారులో ఒక్కసారిగా పెద్ద శబ్దం వచ్చింది. దీంతో అఖిలేష్ కారు నిలపివేశాడు. ఒక్కసారిగా కారులో మంటలు రావడం మొదలయింది. కారు డోర్స్ కూడా వెంటనే లాక్ అయ్యాయి. మంటలు గమనించిన వెంటనే స్థానికులు… అఖిలేష్ వైపు ఉన్న డోర్ అద్దం ధ్వంసం చేసి డోర్ ఓపెన్ చేశారు. అప్పటికే అఖిలేష్ కి మంటలు అంటుకోవడతో స్వల్ప గాయాలయ్యాయి. అటు వైపు ఉన్న హరిక్రిష్ణ వైపుకు వెళ్లేసరికి మంటల విస్త్రుతి పెరిగిపోయింది. దీంతో అతని రక్షించలేకపోయారు.

మంటలు భారీగా వ్యాపించడంతో కారు వెనుక సీటులో కూర్చొన్న హరిక్రిష్ణ మంటలు ఆహూతయ్యాడు. స్థానికులు మంటలు ఆర్పినప్పటికీ.. అప్పటికే హరిక్రిష్ణ చనిపోయాడు. పోలీసులు రంగంలోకి దిగి మృతదేహాన్ని మార్చురీకి తరలించారు. డీజిల్ కారులో ఏసీ పేలడంతోనే మంటలు వ్యాపించి ఉంటాయన్న భావన వ్యక్తం అవుతుంది. పోలీసులు కేసు నమోదు చేసి దర్యాప్తు చేస్తున్నారు.

వీడియో చూడండి..