వెనిజులాపై అమెరికా దాడులు.. స్పందించిన భారత్.. విదేశాంగ శాఖ కీలక ప్రకటన!

శనివారం (జనవరి 03,2026) వెనిజులాపై అమెరికా దాడి చేసింది. దాడి తర్వాత, అమెరికా వెనిజులా అధ్యక్షుడు నికోలస్ మదురో, అతని భార్య సిలియా ఫ్లోర్స్‌ను అమెరికా దళాలు అపహరించుకుని వెళ్లాయి. ఆ తర్వాత వారిని న్యూయార్క్‌కు తీసుకువచ్చి, అక్కడ ఒక నిర్బంధ కేంద్రంలో ఉంచారు. ఆయుధాలు, మాదకద్రవ్యాల సంబంధిత కేసుల్లో వారిపై విచారణ జరుగుతుంది. అనేక దేశాలు అమెరికా చర్యను విమర్శించగా, మరికొన్ని దేశాలు దీనిని సమర్థించాయి. ఇప్పుడు, దాదాపు 24 గంటల తర్వాత , భారతదేశం ఈ విషయంపై ఒక ప్రకటన విడుదల చేసింది.

అమెరికా దాడి జరిగిన ఇరవై నాలుగు గంటల తర్వాత, వెనిజులాలో జరుగుతున్న పరిణామాలపై భారతదేశం తీవ్ర ఆందోళన వ్యక్తం చేసింది. ఈ మేరకు విదేశాంగ మంత్రిత్వ శాఖ కీలక ప్రకటన చేసింది. భారత ప్రభుత్వం వెనిజులాలో మారుతున్న పరిస్థితిని నిశితంగా పరిశీలిస్తోంది. వెనిజులా ప్రజల భద్రత, శ్రేయస్సుకు భారతదేశం తన మద్దతును పునరుద్ఘాటించింది. ఈ ప్రాంతంలో శాంతి, స్థిరత్వాన్ని కొనసాగించడానికి చర్చలు, శాంతియుత మార్గాల ద్వారా సమస్యలను పరిష్కరించుకోవాలని భారత్ అన్ని పక్షాలను కోరింది.

కారకాస్‌లోని భారత రాయబార కార్యాలయం అక్కడ నివసిస్తున్న భారతీయ పౌరులతో సంప్రదింపులు జరుపుతోంది. అవసరమైతే సాధ్యమైన అన్ని సహాయాన్ని అందిస్తూనే ఉంటుందని భారత ప్రభుత్వం పేర్కొంది. గతంలో, విదేశాంగ మంత్రిత్వ శాఖ తన పౌరులకు ప్రయాణాలను మార్పులు చేసుకోవాలని సూచించింది. కీలక ఉత్తర్వులు జారీ చేసింది.

” వెనిజులాలో ఇటీవలి పరిణామాల దృష్ట్యా , భారతీయ పౌరులు వెనిజులాకు అన్ని అనవసర ప్రయాణాలను నివారించాలని గట్టిగా సలహా ఇస్తున్నారు. ఏ కారణం చేతనైనా వెనిజులాలో ఉన్న భారతీయులందరూ తీవ్ర జాగ్రత్తలు తీసుకోవాలని, వారి కదలికలను పరిమితం చేసుకోవాలని, కారకాస్‌లోని భారత రాయబార కార్యాలయంతో సంప్రదింపులు జరపాలని సూచించారు.” వెనిజులా దాడుల తరువాత, భారత విదేశాంగ మంత్రిత్వ శాఖ పేర్కొంది.

స్థానిక కాలమానం ప్రకారం శనివారం (జనవరి 03) తెల్లవారుజామున 2 గంటలకు అమెరికా వెనిజులాపై దాడి చేసింది. అధ్యక్షుడు నికోలస్ మదురో, అతని భార్య సిలియా ఫ్లోర్స్‌ను వారి బెడ్‌రూమ్ నుండి లాక్కెళ్లి అపహరించారు. ఆ తర్వాత కొద్దిసేపటికే వారిని న్యూయార్క్‌కు తీసుకువచ్చారు. అమెరికా అనేక ప్రాంతాల్లో దాడులు చేసింది. మీడియా కథనాల ప్రకారం , ఈ దాడిలో అనేక మంది మరణించారు.

మరిన్ని అంతర్జాతీయ వార్తల కోసం ఇక్కడ క్లిక్ చేయండి…