Turkiye: టర్కీ పేరు తుర్కియోగా మారింది. అసలు పేరెందుకు మార్చాల్సి వచ్చిందంటే..!

నేములో నేమున్నది అని షేక్స్‌పియర్‌ అన్నాడే కానీ.. అంతా పేరులోనే ఉందనుకునే వాళ్లు చాలా మందే ఉన్నారు. పేరులోనే పెన్నిధి అనేది వారి నిశ్చితాభిప్రాయం. కుటుంబరావు అని పేరున్న పెద్ద మనిషికి అసలు పిల్లలే కలగకపోవచ్చు. సరస్వతి అని పేరు పెట్టుకున్నామెకు చదువే అబ్బకపోవచ్చు. లక్ష్మీపతి దగ్గర రూపాయి కూడా ఉండకపోవచ్చు. లాజిక్కులు చెప్పకండి. మాంచి పేరుండటం మాకు గొప్పేనండి. అదే మాకు గర్వకారణం కూడానూ అని అంటారు కొందరు. ఇదిగో ఈ కోవలోకే వస్తుంది టర్కీ అనే దేశం కూడా! ఇన్నాళ్లకు, ఇన్నేళ్లకు తమ దేశం పేరు బాగోలేదని పాలకులకు తెలిసి వచ్చింది. అసలు టర్కీ అనేది ఓ పక్షి పేరు. పక్షి పేరు పెట్టుకోవడంలో తప్పేమిటి అని కొశ్చన్‌ వేయవచ్చు. టర్కీ అనే పదానికి నానా అర్థాలున్నాయి. ఇంగ్లీషు నిఘంటువు తిరగేస్తే ఫెయిల్యూర్‌, మూర్ఖుడు, సిల్లీఫెలో అనే అర్థాలు కనిపిస్తాయి. ఇలాంటి అర్థాలున్నప్పుడు ఎవరికైనా పేరు మార్చుకోవాలనే అనిపిస్తుంది. అందుకే టర్కీ పేరు మార్చాలని చాన్నాళ్లుగా ప్రయత్నాలు సాగుతున్నాయి. ఇప్పుడు ప్రభుత్వం ఓ గట్టి నిర్ణయం తీసుకుందని టర్కీ రేడియో అండ్ టెలివిజన్‌ కార్పొరేషన్‌ చెబుతోంది. పోయిన జనవరిలో హలో తుర్కియా పేరుతో ఓ ప్రత్యేక కార్యక్రమాన్ని కూడా రూపొందించింది. రీ బ్రాండింగ్‌ ప్రక్రియలో భాగంగా అందరికీ తెలియాలనే ఉద్దేశంతో తుర్కియో పేరును ప్రమోట్‌ చేయడం మొదలు పెట్టింది. ఇక నుంచి టర్కీ నుంచి ఎగుమతి అయ్యే వస్తువులపై మేడ్‌ ఇన్‌ తుర్కియో అని ఉంటుందే తప్ప మేడిన్‌ టర్కీ అని ఉండదు. తమ కొత్త పేరును గుర్తించాలని ఐక్యరాజ్య సమితికి కూడా టర్కీ విదేశాంగ మంత్రిత్వ శాఖ ఆల్‌రెడీ ఓ ప్రపోజల్‌ను పంపింది. ఈ ప్రతిపాదనకు ఐక్య రాజ్య సమితి కూడా ఓకే చెప్పేసింది.

అసలీ పేరు మార్పు ప్రక్రియను అంటే రీబ్రాండింగ్‌ను దేశ అధ్యక్షుడు రెచప్‌ టయ్యప్‌ ఎర్దోవాన్‌ ఎప్పుడో మొదలు పెట్టారు. దేశం పేరును మార్చాలంటూ ప్రముఖ అంతర్జాతీయ సంస్థలకు టర్కీ ప్రభుత్వ అధికారులు చెబుతున్నారు. తమ దేశం పేరును తుర్కియోగా పిలవాలని అధ్యక్షుడు ఎర్దోగాన్‌ ప్రపంచ దేశాలను కోరుతున్నారు. తుర్కుల సంస్కృతీ సంప్రదాయాలు, ఘనమైన చరిత్ర, గొప్ప నాగరికత, విలువలకు తుర్కియో అన్న పదమే సూటవుతుందని ఎర్దోవాన్‌ అంటున్నారు. ఇక టర్కీ అనే పేరు చరిత్రలో మిగిలిపోనుంది. దేశం పేరును మార్చడం వల్ల ఒనగూరే ప్రయోజనమేమీ లేదన్నది ఆ దేశవాసులలో చాలా మందికి ఉన్న భావన. టర్కీ ప్రస్తుతం తీవ్ర ఆర్ధిక సంక్షోభంలో ఉందని, దీన్నుంచి తమ దృష్టిని మరల్చడానికే పేరు మార్పును ముందుకు తెచ్చారని చాలా మంది అభిప్రాయపడుతున్నారు. వచ్చే ఏడాది జరిగే ఎన్నికల్లో లబ్ధి పొందడం కోసమే ఎర్దోవాన్‌ ఇలాంటి చర్యలు తీసుకుంటున్నారని విపక్షాలు అంటున్నాయి. తమ బాగోగులను పట్టించుకోకుండా ఇలా పేర్లు మారుస్తున్న ప్రభుత్వంపై మండిపడుతున్నారు. పేరు మారిస్తే తప్పేముంది? పర్షియా ఇరాన్‌ కాలేదా? సియామ్‌ థాయ్‌లాండ్‌గా మారలేదా? గ్రీస్‌తో పడకపోవడంతో మాసిడోనియా నార్త్‌ మాసిడోనియాగా రూపాంతరం చెందలేదా? అంటూ ఎర్దోవాన్‌ మద్దతుదారులు ప్రశ్నలను సంధిస్తున్నారు.