ఉగ్రవాదంపై ద్వంద్వ ప్రమాణాలు వద్దు.. పాకిస్తాన్‌కు పరోక్షంగా అజిత్ దోవల్ వార్నింగ్!

మాస్కోలో జరిగిన అంతర్జాతీయ భద్రతా సదస్సు, భద్రతా వ్యవహారాల ఉన్నత ప్రతినిధుల 14వ సమావేశంలో భారత జాతీయ భద్రతా సలహాదారు అజిత్ దోవల్ పాల్గొన్నారు. రష్యన్ ఫెడరేషన్ భద్రతా మండలి కార్యదర్శి సెర్గీ షోయిగు ఆతిథ్యం ఇచ్చిన ఈ సదస్సులో ఉగ్రవాదంపై నిర్ణయాత్మక చర్యలు తీసుకోవాలని దోవల్ పిలుపునిచ్చారు. ఉగ్రవాద వ్యతిరేక పోరాటంలో ద్వంద్వ ప్రమాణాలకు తావులేదని ఆయన స్పష్టం చేశారు. బాధ్యతాయుతమైన దేశాలు ఉగ్రవాదాన్ని ప్రోత్సహించే వారికి మద్దతివ్వాలా లేదా నిర్ణయాత్మక చర్యలతో వారిని ఎదుర్కోవాలా అనేది తేల్చుకోవాలన్నారు. బహుధ్రువ ప్రపంచం ఆవిర్భవించడం వల్ల అంతర్జాతీయ భద్రతకు ఎదురవుతున్న సవాళ్లపై ఈ సదస్సులో చర్చించారు.

సమకాలీన అంతర్జాతీయ భద్రతా ముప్పులను ఎదుర్కోవడంలో మరింత సమర్థవంతంగా ఉండేలా, 1945లో రెండవ ప్రపంచ యుద్ధం ముగిసిన తర్వాత స్థాపించిన ఐక్యరాజ్యసమితి వంటి అంతర్జాతీయ సంస్థలను సంస్కరించాల్సిన తక్షణ అవసరం ఉందన్నారు డోవల్. ఈ సంస్కరణలలో గ్లోబల్ సౌత్ అభివృద్ధి చెందుతున్న దేశాలకు అధిక ప్రాతినిధ్యం కల్పించడంతో పాటు, వారి అభిప్రాయాలను పరిగణనలోకి తీసుకోవాలని ఆయన కోరారు.

పశ్చిమ ఆసియాలో కొనసాగుతున్న ఘర్షణల నేపథ్యంలో, హోర్ముజ్ జలసంధి, ఎర్ర సముద్రంతో సహా అంతర్జాతీయ జలమార్గాల ద్వారా వాణిజ్యం సురక్షితంగా, నిరాటంకంగా సాగేలా చూడటం అత్యవసరమని దోవల్ పేర్కొన్నారు. గత మూడు నెలలుగా దాదాపుగా మూసివేయబడిన హోర్ముజ్ జలసంధి ప్రపంచంలోనే అత్యంత కీలకమైన నౌకా రవాణా మార్గాలలో ఒకటి. ప్రపంచ ఇంధన సరఫరాలు మరియు వాణిజ్యంలో గణనీయమైన భాగం వీటి గుండానే వెళుతుంది. ఈ జలమార్గాలకు కలిగే ఏ అంతరాయమైనా ఆసియా, ఇతర ప్రాంతాల ఇంధన ధరలు, సరఫరా గొలుసులు, ఆర్థిక స్థిరత్వంపై తీవ్ర ప్రభావం చూపుతుంది.

ఈ ఫోరమ్ సందర్భంగా దోవల్ తన రష్యన్ ప్రతిరూపమైన సెర్గీ షోయిగుతో ప్రత్యేకంగా సమావేశమయ్యారు. రక్షణ, భద్రత, ఇంధనం, వాణిజ్య-ఆర్థిక సంబంధాల రంగాలలో ప్రస్తుత సహకార స్థితిని ఇరుపక్షాలు సమీక్షించాయి. న్యూఢిల్లీలో జరగనున్న బ్రిక్స్ (BRICS) దేశాల జాతీయ భద్రతా సలహాదారుల సమావేశ సన్నాహాలపై కూడా ఇద్దరు అధికారులు తమ అభిప్రాయాలను పంచుకున్నారు.

నాలుగేళ్లకు పైగా కొనసాగుతున్న రష్యా-ఉక్రెయిన్ సంఘర్షణ ప్రపంచ భద్రత, ఇంధన, ఆహార సరఫరా గొలుసులను దెబ్బతీసిన తరుణంలో ఈ పర్యటన ప్రాధాన్యత సంతరించుకుంది. ఇదే సమయంలో సైప్రస్‌లో భారత విదేశాంగ మంత్రి ఎస్. జైశంకర్, ఉక్రెయిన్ విదేశాంగ మంత్రి ఆండ్రీ సిబిహాతో సమావేశమై శాంతి ప్రయత్నాలపై చర్చించారు. భారతదేశం రష్యా, ఉక్రెయిన్ రెండింటితోనూ సన్నిహిత సంబంధాలను కొనసాగిస్తూనే, ఈ వివాదానికి చర్చలు మరియు దౌత్యం ద్వారానే పరిష్కారం లభిస్తుందని పునరుద్ఘాటించింది.

🚨🇮🇳🇷🇺 India and Russia will fight terrorism with all their might: NSA Doval

"We lost 26 innocent lives in a tourist state… and we are committed — as you are — to crush terrorism completely."

NSA Ajit Doval to Russian Security Council Secretary Sergei Shoigu. pic.twitter.com/RclwUlyp1R

— Sputnik India (@Sputnik_India) May 28, 2026

మరిన్ని అంతర్జాతీయ వార్తల కోసం ఇక్కడ క్లిక్ చేయండి..