కరోనా యాంటీ బాడీలతో పార్టీలో సందడి చేసిన పాప్ స్టార్ మడోన్నా..

తనలో కరోనా యాంటీ బాడీలు ఉన్నాయని ప్రకటించుకున్న అమెరికన్ పాప్ స్టార్ మడోన్నా.. సెలబ్రిటీ ఫోటోగ్రాఫర్ స్టీవెన్ క్లీన్ బర్త్ డే నాడు అతనితో పార్టీ చేసుకుంటూ కనబడడం వివాదాన్ని రేకెత్తించింది. తనకు వైరస్ సోకిందని చెప్పకనే చెప్పుకున్న 61 ఏళ్ళ ఈ గాయని.. ఈ బర్త్ డే పార్టీలో సామాజిక దూరాన్ని పాటించకుండా స్టీవెన్ ని హగ్ చేసుకోవడం, అతనితో సన్నిహితంగా మెలగడం చూసి అంతా ఆశ్చర్యపోయారు. ఈ వీడియోకూడా బయటికి వచ్చింది. వీరిద్దరూ న్యూయార్క్ లోనే నివసించడం కూడా విశేషం. ఈ పార్టీకి హాజరైన అనేకమంది గెస్టుల్లో ఎవరూ మాస్కులు కూడా ధరించలేదు. ఇప్పటికే అమెరికాలో కరోనా మృతుల సంఖ్య  66 వేలకు పైగా పెరిగింది. అయితే మడోన్నా మేనేజర్ మిషెల్ మాత్రం ఈ పార్టీకి కేవలం అయిదుగురు మాత్రమే హాజరయ్యారని, అంతా నెల రోజులకు పైగా క్వారంటైన్ లో ఉన్నారని పేర్కొన్నారు. మడోన్నాకు ఇద్దరు పిల్లలు కూడా ఉన్నారని, వారిని ఆమె రిస్క్ లో పెట్టలేదన్నారు.