డయాలసిస్ చికిత్స కోసం వెళితే HIV సోకింది..! మణుగూరులో దారుణ ఘటన..

భద్రాద్రి కొత్తగూడెం జిల్లా మణుగూరులో దారుణం చోటు చేసుకుంది. రెండు కిడ్నీలు చెడిపోయి డయాలసిస్ చికిత్స తీసుకుంటున్న ఓ వృద్ధుడికి హెచ్ఐవి సోకడం కుటుంబ సభ్యులను ఆందోళనకు గురిచేస్తుంది. మణుగూరు ఆసుపత్రి కి వెళ్లిన డయాలసిస్ రోగికి హెచ్ఐవి సోకింది. గత ఏడు నెలలుగా రోగి కి చికిత్సనందిస్తున్న సిబ్బంది, డయాలసిస్ కేంద్రం సిబ్బంది నిర్లక్ష్యం కారణంగానే తన తండ్రి హెచ్ఐవి సోకిందని రోగి బంధువులు ఆరోపిస్తున్నారు. మరోవైపు రోగి వేరే ఆసుపత్రికి వెళ్లాడని సిబ్బంది అంటున్నారు. తమ దగ్గరికి రాకముందు రోగి హైద్రాబాద్, వరంగల్ లో చికిత్స పొందడని మణుగూరు ప్రభుత్వాసుపత్రి డాక్టర్లు అంటున్నారు. అయితే ప్రభుత్వ ఆస్పత్రి వద్ద రోగి కుటుంబ సభ్యులు ఆందోళన చేపట్టారు. డాక్టర్లు, సిబ్బందితో వాగ్వాదానికి దిగారు. విషయం తెలుసుకున్న ఉన్నతాధికారులు ఆస్పత్రికి చేరుకొని ఘటన పై విచారణ జరిపించి, చర్యలు తీసుకుంటామని హామీ ఇచ్చారు.

అశ్వాపురం మండలానికి చెందిన ఓ వృద్ధుడు తన రోడ్డు కిడ్నీలు పాడైపోవడంతో గత కొన్ని నెలలుగా డయాలసిస్ చికిత్స చేయించుకుంటున్నారు. ఈ క్రమంలోనే వరంగల్, హైదరాబాద్లలోని హాస్పిటల్స్ లో చికిత్స తీసుకున్న అనంతరం గత ఏడు నెలలుగా మణుగూరు లోని 100 పడకల హాస్పిటల్ లో డయాలసిస్ చికిత్స తీసుకుంటున్నారు, ఇటీవల చికిత్స చేయించుకునేందుకు వచ్చిన వృద్ధుడికి రక్త పరీక్షలు నిర్వహించగా హెచ్ఐవి ఉన్నట్లుగా బయటపడింది, దీంతో కుటుంబ సభ్యులు ఆందోళనకు గురవుతున్నారు. గత రెండు సంవత్సరాలుగా చికిత్స చేయించుకుంటున్న ఇప్పటివరకు ఎప్పుడూ కూడా ఇలాంటి రిపోర్టు రాలేదని, ఇది కేవలం డయాలసిస్ సిబ్బంది నిర్లక్ష్యం కారణంగానే తన తండ్రికి హెచ్ఐవి సోకిందని వృద్ధుడి కుమార్తె ఆరోపిస్తున్నారు.

ఇదే విషయంపై హాస్పిటల్లోని డాక్టర్లు సిబ్బందితో వాగ్వాదానికి దిగారు రోగి కుటుంబ సభ్యులు, ప్రస్తుతం తన తండ్రికి హెచ్ఐవి సోకడం మూలంగా డయాలసిస్ చికిత్స అందడం లేదని, తమకు న్యాయం జరిగేంత వరకు పోరాటం చేస్తామని రోగి కుమార్తె అంటున్నారు. ఇదే విషయమై మణుగూరు హాస్పిటల్ సూపర్డెంట్ సునీల్ కుమార్ మాట్లాడుతూ.. జరిగిన ఘటనకు సంబంధించి ఉన్నతాధికారులకు ఫిర్యాదు చేశామని, పొరపాటు ఎక్కడ జరిగిందో విచారణ జరిపి అనంతరం బాధ్యులపై చర్యలు తీసుకుంటామని తెలిపారు.

మరిన్ని తెలంగాణ వార్తల కోసం ఇక్కడ క్లిక్‌ చేయండి