Hyderabad: సమయస్ఫూర్తికి సెల్యూట్.. వ్యక్తిని CPR చేసి కాపాడిన ట్రాఫిక్ కానిస్టేబుల్.. నెట్టింట ప్రశంసల వర్షం..

Traffic Constable Saves Life: కేవలం, లా అండ్‌ ఆర్డర్‌ మెయింట్‌నెన్సే కాదు, తమ సమయస్ఫూర్తితో ప్రజల ప్రాణాలను సైతం కాపాడుతున్నారు పోలీసులు. ప్రాణాపాయంతో కొట్టుమిట్టాడుతోన్న బాధితుల విషయంలో వేగంగా రియాక్టవుతున్నారు. CPR చేస్తూ ప్రాణాలు కాపాడుతున్నారు. హైదరాబాద్‌లో మరో కానిస్టేబుల్‌ సమయస్ఫూర్తిని చాటుకున్నాడు. బంజారాహిల్స్‌ రోడ్‌ నెంబర్‌ వన్‌లో కరెంట్‌షాక్‌ తగిలిన ఓ వ్యక్తిని రక్షించాడు. కరెంట్‌షాక్‌తో కుప్పకూలిపోయిన బాధితుడికి CPR చేసి ప్రాణం నిలబెట్టాడు ట్రాఫిక్‌ కానిస్టేబుల్‌ బోలు.. బంజారాహిల్స్‌లో అనుకోకుండా విద్యుదాఘాతానికి గురై కింద పడ్డాడు. ఈ సమయంలో అక్కడే విధులు నిర్వహిస్తోన్న ట్రాఫిక్ కానిస్టేబుల్ బోలు హుటాహుటిన అక్కడికి చేరుకున్నాడు.

అపస్మారక స్థితిలో ఉన్న అతని ఛాతిపై రెండు చేతులు పెట్టి బలంగా ప్రెస్ చేస్తూ.. అతడి శ్వాస ప్రక్రియ సాధారణ స్థాయికి వచ్చేంతవరకు సపర్యలు చేశాడు. ట్రాఫిక్ కానిస్టేబుల్ బోలు ప్రయత్నాలు ఫలించడంతో విద్యుత్ షాక్‌కి గురైన వ్యక్తి స్పృహలోకి వచ్చాడు. అదే సమయంలో 108 అంబులెన్స్ అక్కడికి చేరుకోని.. ఆస్పత్రికి తరలించారు. బంజారాహిల్స్ రోడ్ నెంబర్ 1 ఇన్నర్ రింగ్ రోడ్ వద్ద మంగళవారం సాయంత్రం 6 గంటల సమయంలో ఈ ఘటన చోటుచేసుకోగా.. దీనికి సంబంధించిన వీడియో నెట్టింట వైరల్ అవుతోంది. నెటిజన్లు బోలు సమయస్ఫూర్తిని కొనియాడుతూ.. అభినందిస్తున్నారు.

వీడియో చూడండి..

Hyderabad traffic constable Shankar saves the life of an electric shock victim at Banjara hills @HYDTP @hydcitypolice #lifesavingact pic.twitter.com/NuZNzozzaE

— Sudhakar Udumula (@sudhakarudumula) November 22, 2022

ఇటీవల ప్రకాశం జిల్లాలో ఇలాగే ఇద్దరు అమ్మాయిల ప్రాణాలు కాపాడారు మెరైన్‌ పోలీసులు. వేటపాలెం మండలం రామాపురంలో సముద్ర స్నానం చేస్తూ నీటిలో మునిగిపోయిన బాలికలను కాపాడారు. సముద్రంలో కొట్టుకుపోతున్న అమ్మాయిలను ఒడ్డుకు చేర్చి ప్రాణాలు నిలిపారు. స్పృహకోల్పోయి చలనం లేకుండా పడిపోయిన ఇద్దరు అమ్మాయిలకు CPR చేసి కాపాడారు. ప్రాథమిక చికిత్స తర్వాత వాళ్లిద్దరినీ హాస్పిటల్‌కి తరలించారు మెరైన్‌ పోలీసులు.

సమయస్ఫూర్తితో బాధితుల ప్రాణాలు కాపాడిన కానిస్టేబుల్స్‌ను అభినందించారు ఉన్నతాధికారులు. ప్రజలు సైతం వీళ్లపై ప్రశంసల జల్లు కురిపిస్తున్నారు. చనిపోయారనుకున్నవాళ్ల ప్రాణాలను నిలబెట్టారంటూ పొగడ్తలతో ముంచెత్తుతున్నారు.

మరిన్ని తెలంగాణ వార్తల కోసం..