Video: బద్దకానికే బ్రాండ్ అంబాసిడర్ ఈ జీవి.. రోజుకు 22 గంటల నిద్ర.. వారానికి ఒక్కసారి మాత్రమే..

ప్రపంచంలో అత్యంత బద్ధకస్థుడు ఎవరంటే మనం వెంటనే కుంభకర్ణుడి పేరు చెబుతాం. కానీ, ప్రకృతిలో కుంభకర్ణుడిని మించిన ఒక వింత జీవి ఉందని మీకు తెలుసా? అదే స్లాత్. మధ్య మరియు దక్షిణ అమెరికా అడవుల్లో కనిపించే ఈ ప్రాణిని చూస్తే బద్ధకానికి బ్రాండ్ అంబాసిడర్‌లా అనిపిస్తుంది. తినడానికి కూడా బద్ధకమై ప్రాణాల మీదకు తెచ్చుకుంటాయి. ఈ జీవి గురించి తెలిస్తే మీరు ఆశ్చర్యపోతారు.

The World Laziest Animal

Krishna S |
Updated on: Apr 27, 2026 | 4:22 PM

ప్రపంచంలో ప్రతి ప్రాణి ఆహారం, మనుగడ కోసం నిరంతరం పరుగెడుతూనే ఉంటుంది. కానీ దీనికి పూర్తి భిన్నంగా.. పరుగెడితే ఏమొస్తుంది..? పడుకుంటేనే కదా ఆరోగ్యం అన్నట్లుగా జీవిస్తుంది స్లాత్ అనే జీవి. ఇది ఎంత బద్ధకమంటే, శ్వాస తీసుకోవడానికి కూడా బద్ధకించేంతలా ఉంటుంది. రోజుకు ఏకంగా 20 నుండి 22 గంటల పాటు నిద్రపోతూనే గడుపుతుంది. స్లాత్‌లలో ప్రధానంగా రెండు రకాలు ఉంటాయి. రెండు వేళ్లవి, మూడు వేళ్లవి. వీటిలో మూడు వేళ్ల స్లాత్‌లు పరమ సోమరి జీవులు. వీటి నడక వేగం గంటకు కేవలం 0.24 కిలోమీటర్లు. అంటే ఒక చెట్టు నుండి పక్కనే ఉన్న మరో చెట్టుకు వెళ్లాలన్నా వీటికి ఒక రోజంతా సమయం పడుతుంది.

నిద్రలోనే సగం జీవితం

మనం ఎవరైనా ఎక్కువ సేపు నిద్రపోతే కుంభకర్ణుడితో పోలుస్తాం. కానీ స్లాత్ ముందు కుంభకర్ణుడు కూడా తక్కువే. స్లాత్‌లు రోజుకు సగటున 20 నుండి 22 గంటల పాటు నిద్రపోతాయి. మిగిలిన రెండు మూడు గంటల్లో కూడా అవి ఏదో వేగంగా పనులు చేసేస్తాయని అనుకోకండి.. ఆ సమయంలో కూడా చాలా నెమ్మదిగా ఆకులను నమలడం లేదా ఒక కొమ్మ నుండి మరో కొమ్మకు కదలడం వంటివి చేస్తాయి. వీటి జీవితంలో 90 శాతం సమయం కదలకుండా ఒకే చోట గడిచిపోతుంది.

నడక కాదు.. పాకడం..

స్లాత్‌ల వేగం గురించి వింటే మీరు నవ్వాలో, ఆశ్చర్యపోవాలో అర్థం కాదు. ఇవి నేల మీద నిలబడలేవు, నడవలేవు. కేవలం తమ బలమైన గోళ్లతో భూమిని లాక్కుంటూ పాకుతాయి. వీటి వేగం గంటకు కేవలం 0.24 కిలోమీటర్లు. అంటే ఒక చిన్న గదిని దాటడానికే వీటికి గంటల సమయం పడుతుంది. వినడానికి వింతగా ఉన్నా, నేల మీద కంటే నీటిలో స్లాత్‌లు మూడు రెట్లు వేగంగా ఈదగలవు. వీటి శరీరంలోని గాలి బుడగలు వీటిని నీటిపై తేలేలా చేస్తాయి.

తిన్నది అరగడానికే నెల

సాధారణంగా మనం తిన్న ఆహారం కొన్ని గంటల్లో అరిగిపోతుంది. కానీ స్లాత్ తిన్న ఒక్క ఆకు అరగడానికి ఏకంగా 30 రోజుల సమయం పడుతుంది. వీటి పొట్టలో నాలుగు గదులు ఉంటాయి. ఇవి తినే ఆకుల్లో పోషకాలు చాలా తక్కువగా ఉంటాయి. తక్కువ శక్తిని ఇచ్చే ఆహారం తింటాయి కాబట్టి ఆ శక్తిని ఆదా చేయడానికి ఇవి అసలు కదలవు. వీటి జీవక్రియ ప్రపంచంలోనే అత్యంత బలహీనమైనది. అందుకే ఇవి తమ శరీర ఉష్ణోగ్రతను కూడా సరిగ్గా నియంత్రించుకోలేవు. ఎండలో ఉండి వేడిని గ్రహిస్తాయి.

వారానికి ఒకసారి మాత్రమే బాత్రూమ్‌కు .

స్లాత్‌లు తమ జీవితాంతం చెట్లపైనే తలకిందులుగా వేలాడుతూ గడుపుతాయి. కేవలం వారానికి ఒకసారి మాత్రమే మలమూత్ర విసర్జన కోసం కిందకు దిగుతాయి. ఈ ప్రయాణం వాటికి అత్యంత ప్రమాదకరమైనది. ఎందుకంటే కిందకు దిగినప్పుడు అవి శత్రువుల కంటికి సులభంగా దొరికిపోతాయి. దాదాపు 50 శాతం స్లాత్‌లు ఈ మలవిసర్జన సమయంలోనే వేటాడే జంతువుల బారిన పడి చనిపోతుంటాయి.

స్లాత్ బొచ్చు.. ఒక మినీ ఎకో సిస్టమ్..

స్లాత్ శరీరంపై ఉండే బొచ్చు కేవలం చలి నుండి కాపాడటానికే కాదు, అదొక చిన్న అడవిలా పనిచేస్తుంది. వీటి బొచ్చుపై ఆకుపచ్చని నాచు పెరుగుతుంది. ఇది వర్షాకాలంలో వీటికి అద్భుతమైన రంగును ఇస్తుంది. తద్వారా చెట్లలో ఇవి కలిసిపోయి శత్రువులకు కనబడవు. ఈ బొచ్చులో కొన్ని రకాల పురుగులు, కీటకాలు కూడా నివసిస్తాయి. అంటే స్లాత్ శరీరం ఒక సంచరించే మినీ జూ అన్నమాట..

బద్ధకం వల్ల మరణం

ప్రకృతిలో ఆకలితో లేదా శత్రువుల వల్ల జంతువులు చనిపోవడం సహజం. కానీ స్లాత్‌లు తరచుగా తమ బద్ధకం వల్లే ప్రాణాలు కోల్పోతుంటాయి. కొన్నిసార్లు ఆహారం తినడానికి కూడా బద్ధకించి ఆకలితో చనిపోతాయి. పొరపాటున చెట్టు మీద నుండి కింద పడితే, తిరిగి పైకి ఎక్కడానికి పట్టే సమయం లోపు ఇతర జంతువుల నోటికి చిక్కుతాయి. వీటి శరీర ఉష్ణోగ్రత 10 డిగ్రీల సెల్సియస్ వరకు పడిపోయినా తట్టుకోగలవు కానీ శక్తి లేకపోవడం వల్ల వేగంగా కదలలేవు.

వ్యూహాత్మక జీవనం

శాస్త్రవేత్తల ప్రకారం.. స్లాత్‌ల సోమరితనం నిజానికి ఒక మనుగడ వ్యూహం. తక్కువ శక్తిని ఖర్చు చేయడం వల్ల వీటికి ఆహారం తక్కువైనా ఇబ్బంది ఉండదు. ఆడ స్లాత్‌లు ఏటా ఒక బిడ్డకు జన్మనిస్తాయి. పుట్టినప్పటి నుండి ఆ పిల్లలు తల్లి బొచ్చుకు అతుక్కుని, అదే బద్ధకపు జీవనశైలిని వారసత్వంగా నేర్చుకుంటాయి. వేగంగా పరిగెత్తే ఈ ప్రపంచంలో, లక్షలాది సంవత్సరాలుగా తనదైన నెమ్మది వేగంతో మనుగడ సాగిస్తున్న స్లాత్ నిజంగానే ప్రకృతి సృష్టించిన ఒక అద్భుతం అని చెప్పొచ్చు.