Diwali: హైదరాబాద్‌లో దీపావళి వేడుకల్లో అపశృతి.. టపాసులు కాలుస్తూ 67 మందికి గాయాలు!

Hyderabad: మెహిదీపట్నంలోని ప్రభుత్వ సరోజినీదేవి కంటి ఆసుపత్రికి బాణసంచా కారణంగా కంటి గాయాలైన బాధితులు వచ్చారు. అయితే ఈ ఏడాది నవంబర్ 8న వెలువడిన తాజా నివేదిక ప్రకారం, ఒక్క సరోజినీదేవి ఆసుపత్రిలోనే 32 మంది కంటి గాయాలతో చికిత్స కోసం వచ్చారు. వారిలో ఆరుగురిని..

Sarojini Devi Eye Hospital

Subhash Goud |
Updated on: Nov 09, 2026 | 7:00 AM

Hyderabad: హైదరాబాద్‌లో దీపావళి సంబరాలు విషాదకరంగా మారాయి. పండగ వేళ టపాసులు కాలుస్తూ పలువురు ప్రమాదాలకు గురయ్యారు. ముఖ్యంగా బాణసంచా పేలుళ్ల కారణంగా కళ్లకు గాయాలు కావడంతో బాధితులు ఆసుపత్రుల బాట పట్టారు. చిన్నపిల్లల నుంచి పెద్దల వరకు పలువురు ఈ ప్రమాదాల బారిన పడటం ఆందోళన కలిగిస్తోంది.

సరోజినీదేవి కంటి ఆసుపత్రిలో కొనసాగుతున్న చికిత్స

మెహిదీపట్నంలోని ప్రభుత్వ సరోజినీదేవి కంటి ఆసుపత్రికి బాణసంచా కారణంగా కంటి గాయాలైన బాధితులు వచ్చారు. అయితే ఈ ఏడాది నవంబర్ 8న వెలువడిన తాజా నివేదిక ప్రకారం, ఒక్క సరోజినీదేవి ఆసుపత్రిలోనే 32 మంది కంటి గాయాలతో చికిత్స కోసం వచ్చారు. వారిలో ఆరుగురిని ఆసుపత్రిలో చేర్చగా, నలుగురు చిన్నారులు ఉన్నారు. మిగిలిన 26 మందికి వైద్యులు చికిత్స అందించి, తదుపరి పరీక్షల కోసం రావాలని సూచించారు. వీరిలో ఒకరు కుడి కంటిచూపును పూర్తిగా కోల్పోయినట్లు ఆసుపత్రి వైద్యులు వెల్లడించారు.

ముందుగానే ప్రత్యేక ఏర్పాట్లు చేసిన ఆసుపత్రి

దీపావళి సందర్భంగా బాణసంచా ప్రమాదాలు జరిగే అవకాశం ఉండటంతో సరోజినీదేవి కంటి ఆసుపత్రి ముందస్తు జాగ్రత్తలు తీసుకుంది. మొత్తం 550 పడకల సామర్థ్యం ఉన్న ఈ ఆసుపత్రిలో బాణసంచా బాధితుల కోసం ప్రత్యేకంగా 20 పడకలను సిద్ధం చేశారు. వైద్యులు, నర్సులు, ఇతర సిబ్బందిని అందుబాటులో ఉంచడంతో పాటు అత్యవసర పరిస్థితుల్లో బాధితులను ఆసుపత్రికి తరలించేందుకు అంబులెన్సులను కూడా సిద్ధంగా ఉంచారు.

గతంలోనూ భారీగా నమోదైన ప్రమాదాలు

దీపావళి సమయంలో బాణసంచా కారణంగా కంటి గాయాలు కావడం ప్రతి ఏడాది ఆందోళన కలిగిస్తోంది. సరోజినీదేవి ఆసుపత్రి సూపరింటెండెంట్ తెలిపిన వివరాల ప్రకారం, గత రెండు దీపావళి సీజన్లలో వరుసగా 116, 115 మంది బాణసంచా గాయాలతో ఆసుపత్రికి వచ్చారు.