Hyderabad: హైదరాబాద్‌లో 10 చోట్ల భారీ అగ్ని ప్రమాదం.. మంటలను ఆర్పుతున్న ఫైర్‌ సిబ్బంది

Hyderabad Fire Accident: దీపావళి వేడుకల సందర్భంగా హైదరాబాద్ నగరంలోని సుమారు 10 ప్రధాన ప్రాంతాల్లో భారీ అగ్నిప్రమాదాలు సంభవించాయి. బాణసంచా నిప్పురవ్వలు, రాకెట్లు గోదాములు, దుకాణాల్లో పడటం వల్ల ఈ ప్రమాదాలు చోటుచేసుకున్నట్లు ప్రాథమికంగా తెలుస్తోంది. అగ్నిమాపక సిబ్బంది సకాలంలో స్పందించి మంటలను అదుపులోకి తెచ్చారు. అయితే కొన్ని ప్రాంతాల్లో అర్థరాత్రి కూడా మంటలు భారీగా ఎగిసి పడ్డాయి.

1. మైలార్‌దేవ్‌పల్లి (కాటేదాన్ పారిశ్రామికవాడ): ప్లాస్టిక్ గోదాంలో చెలరేగిన మంటలు పక్కనే ఉన్న ప్లైవుడ్ పరిశ్రమకు వ్యాపించడంతో ఆరు ఫైర్ ఇంజిన్లతో మంటలను అదుపు చేశారు.
2. సీతాఫల్‌మండి (సికింద్రాబాద్): దీపావళికి కాల్చిన ఒక రాకెట్ ప్రమాదవశాత్తు బాణసంచా దుకాణంలోకి దూసుకెళ్లడంతో మంటలు చెలరేగి టపాసులు భారీగా పేలాయి.
3. బండిమెట్ (సికింద్రాబాద్): బాలాజీ మెడికల్ షాప్‌లో అగ్నిప్రమాదం జరగడంతో స్థానికులు భయాందోళనకు గురయ్యారు.
4. ఓల్డ్ బోయినపల్లి: విమానాశ్రయానికి సమీపంలోని ఒక మెడికల్ వేర్‌హౌస్ మూడవ అంతస్తులో మంటలు చెలరేగాయి.
5. ఉడాంగడ్డ (మైలార్‌దేవ్‌పల్లి పరిధి): బాణసంచా నిప్పురవ్వలు పడటంతో ఒక ఈవెంట్ మెటీరియల్స్ గోదాంలో భారీ అగ్నిప్రమాదం జరిగింది.
6. కుత్బుల్లాపూర్ (పేట్ బషీరాబాద్): బాణసంచా పేలుళ్ల వల్ల తుక్కు (స్క్రాప్) గోదాంలో మంటలు చెలరేగి దట్టమైన పొగ కమ్ముకుంది.
7. బోడుప్పల్ (గౌతమ్‌నగర్): మేడిపల్లి పోలీస్ స్టేషన్ పరిధిలోని ఒక అట్టల గోదాంలో భారీగా మంటలు ఎగిసిపడ్డాయి.
8. టప్పాచబుత్ర: ఒక ఫర్నిచర్ గోదాంలో మొదలైన మంటలు పక్కనే ఉన్న మరో నాలుగు గోదాములకు, ఒక మినీ ట్రక్కుకు వ్యాపించాయి.
9. సీతారాం నగర్: ఒక టపాసుల దుకాణంలో మంటలు అంటుకుని అందులోని సామగ్రి మొత్తం దగ్ధమైంది.
10. చెత్త కుప్పలు, ఇతర ప్రాంతాలు: నగరంలోని పలు ప్రాంతాల్లో బాణసంచా వ్యర్థాల వల్ల చెత్త కుప్పల్లో చిన్నపాటి అగ్నిప్రమాదాలు నమోదయ్యాయి