రూ.79 వేల కోట్ల రుణాలిచ్చాం.. ఆడబిడ్డలను కోటీశ్వరులుగా తీర్చిదిద్దడమే లక్ష్యం: సీఎం రేవంత్ రెడ్డి
తెలంగాణలో కోటి మంది మహిళలను కోటీశ్వరులుగా తీర్చిదిద్దడమే లక్ష్యమని సీఎం రేవంత్ రెడ్డి తెలిపారు. మహిళా స్వయం సహాయక సంఘాలకు 34 నెలల్లో రూ.79 వేల కోట్ల బ్యాంకు రుణాలు అందించామని, రూ.1,900 కోట్ల వడ్డీ చెల్లించామని వెల్లడించారు. ఉచిత బస్సు పథకాన్ని కొనసాగిస్తామని స్పష్టం చేస్తూ, కొత్తగా 4.5 లక్షల చేయూత పింఛన్ల పంపిణీని ప్రారంభించారు.
Updated on: Nov 08, 2026 | 9:20 PM
పదేళ్ల బీఆర్ఎస్ పాలన ఏమిచ్చిందో.. మూడేళ్ల కాంగ్రెస్ పాలన ఏమిచ్చిందో చర్చ పెట్టాలని తెలంగాణ సీఎం రేవంత్ రెడ్డి పేర్కొన్నారు. మహిళా శక్తే ప్రభుత్వ శక్తి.. ఆడబిడ్డల ఆశీర్వాదమే తనకు అండ అని.. కోటి మంది ఆడబిడ్డలను కోటీశ్వరులుగా తీర్చిదిద్దడమే తన లక్ష్యమని రేవంత్ రెడ్డి తెలిపారు. కొడంగల్‌లో రెండోరోజు పర్యటించిన ముఖ్యమంత్రి రేవంత్ రెడ్డి వేలాది కోట్ల రూపాయల అభివృద్ధి పనులకు శంకుస్థాపనలు, ప్రారంభోత్సవాలు నిర్వహించారు. లగచర్లలో మహిళా స్వయం సహాయక సంఘాలతో ముఖాముఖి నిర్వహించారు. పుట్టినరోజు వేడుకలను ఆడబిడ్డల సమక్షంలో జరుపుకున్నారు. ఈ సందర్భంగా 4.5 లక్షల చేయూత కొత్త పెన్షన్లను పంపిణీని ప్రారంభించారు. ఈ సందర్భంగా సీఎం మాట్లాడుతూ.. మహిళా సంఘాలకు ఇప్పటికే 79 వేల కోట్ల రుణాలిచ్చామన్నారు. మహిళారుణాలకు 1900 కోట్ల వడ్డీ చెల్లించామని తెలిపారు. ఉచిత బస్సు పథకాన్ని రద్దు చేసే ప్రసక్తే లేదని రేవంత్ రెడ్డి స్పష్టంచేశారు.
కొడంగల్‌లో రెండోరోజు ముఖ్యమంత్రి రేవంత్ రెడ్డి.. బొంరాస్‌పేట, దుద్యాల్‌లో విద్యాసంస్థల భవనాలను, పోలీస్ స్టేషన్లను ప్రారంభించారు. దుద్యాల్‌లో ఎమ్మార్వో ఆఫీస్‌ను ప్రారంభించారు. కోస్గిలో సైన్స్ మ్యూజియం ప్రారంభించారు.
పర్సాపూర్ లో ఇందిరమ్మ ఇళ్లను ప్రారంభించారు సీఎం రేవంత్ రెడ్డి. లబ్దిదారులు గోరిపల్లి సుమిత్ర శ్రీనివాస్‌కు కొత్త బట్టలు పెట్టారు. వారితో కలిసి దీపావళి వేడుకలు జరుపుకున్నారు. వారి ఇంట్లో సన్న బియ్యంతో భోజనం చేశారు. సీఎంతో పాటు స్పీకర్ గడ్డం ప్రసాద్, మంత్రులు జూపల్లి కృష్ణారావు, సీతక్క, దామోదర రాజనర్సింహ భోజనం చేశారు.
సోమవారం కూడా పలు అభివృద్ధి కార్యక్రమాల్లో పాల్గొంటారు ముఖ్యమంత్రి రేవంత్ రెడ్డి.. మూడు రోజుల పర్యటనలో భాగంగా దాదాపు 10వేల కోట్ల అభివృద్ధి పనులకు శంకుస్థాపనలు, ప్రారంభోత్సవాలు చేస్తున్నారు.
ఒకవైపు దీపావళి పర్వదినం. మరోవైపు జన్మదినం. ఈ రెండు శుభసందర్భాల జ్ఞాపకంగా ముఖ్యమంత్రి శ్రీ ఎ. రేవంత్ రెడ్డి గారు ఇందిరమ్మ ఇంట్లో దీపావళి పండుగను జరుపుకున్నారు. కొడంగల్ మండలం పర్సాపూర్ గ్రామంలో గోరిపల్లి సుమిత్ర, శ్రీనివాస్ దంపతులు నూతనంగా నిర్మించుకున్న ఇందిరమ్మ ఇల్లును ముఖ్యమంత్రి గారు ప్రారంభించారు.
🎇ఈ శుభ సందర్భంగా దంపతులకు ముఖ్యమంత్రి గారు నూతన వస్త్రాలను బహూకరించారు. అనంతరం వారింట్లోనే సన్నబియ్యంతో వండిన భోజనాన్ని స్వీకరించారు. ముఖ్యమంత్రి గారితో శాసనసభ స్పీకర్ గడ్డం ప్రసాద్ కుమార్ గారు, మంత్రులు దామోదర రాజనర్సింహ గారు, జూపల్లి కృష్ణారావు గారు, ధనసరి అనసూయ సీతక్క గారు, ఎంపీ వేం నరేందర్ రెడ్డి గారు, ఎమ్మెల్యేలు సన్నబియ్యం భోజనం చేశారు.
🎇ఆ తర్వాత అక్కడ సీఎం గారి చుట్టూ చేరుకున్న పిల్లలు టపాసులు కాల్చగా ముఖ్యమంత్రి గారు వారితో కలిసి దీపావళి వేడుకలో పాల్గొన్నారు. ఈ సందర్భంగా ముఖ్యమంత్రి గారు పిల్లలందరికీ పెన్నులను బహూకరించారు. #CMRevanthReddy #Diwali #Kodangal #IndirammaIndlu #Sannabiyyam
— Telangana CMO (@TelanganaCMO) November 8, 2026
