దబిడి దిబిడైన సర్కారు లెక్క, అంచనాలకు సిండికేట్ అడ్డం, హైదరాబాద్‌లో లాటరీ ద్వారా 55 కొత్త బార్‌లు కేటాయింపు

గ్రేటర్ హైదరాబాద్ మున్సిపల్ కార్పొరేషన్ పరిధిలో బార్ షాపుల కేటాయింపు క్రతువు ముగిసింది. జీహెచ్ఎంసీ పరిధిలో 55 బార్లకు లాటరీ పద్దతిన కేటాయింపులు జరిగాయి. మొత్తంగా బార్లు నెలకొల్పుకునేందుకు ఆశావహుల నుంచి 400 కి పైగా దరఖాస్తులు వచ్చాయి. దీంతో లాటరీ పద్దతిన ఎంపిక చేసి నగరంలో ‘విజేతలకు’ కేటాయించారు. ఈ బార్లను ఏర్పాటు చేయడానికి దరఖాస్తుదారుల నుండి లైసెన్స్ ఫీజు కింద రాష్ట్ర ప్రభుత్వం దాదాపు రూ .27 కోట్లు సంపాదించింది. ఇక, జీహెచ్‌ఎంసీ పరిమితిలో బార్‌ను ఏర్పాటు చేయడానికి ప్రభుత్వం 49 లక్షల రూపాయల లైసెన్స్ ఫీజును నిర్ణయించింది. ఎక్సైజ్ కమిషనర్ సర్ఫరాజ్ అహ్మద్ లా డ్రా తీసి అదృష్టం వరించిన కేటాయింపుదారుల పేర్లను ప్రకటించారు.

ఇలాఉండగా, తెలంగాణ రాష్ట్రవ్యాప్తంగా 159 బార్లను ఏర్పాటు చేయాలని ప్రభుత్వం జనవరి 25 న నోటిఫికేషన్ విడుదల చేసిన సంగతి తెలిసిందే. దరఖాస్తులు సమర్పించాల్సిన గడువు ఫిబ్రవరి 16 తో ముగిసింది. 159 బార్ల కోసం ప్రభుత్వానికి 8,464 దరఖాస్తులు వచ్చాయి. ప్రతి దరఖాస్తుదారుడు తమ దరఖాస్తుతో పాటు రూ .1 లక్ష తిరిగి చెల్లించని డిపాజిట్‌ను సమర్పించవలసి రావడంతో దరఖాస్తు రుసుము కింద ప్రభుత్వానికి రూ. 84.64 కోట్లు వసూలు అయింది.

కాగా, ప్రభుత్వ అంచనాల కంటే బాగా తక్కువగా జిల్లాలోని 23 బార్‌లకు తక్కువ సంఖ్యలో దరఖాస్తులు వచ్చాయి. దీని వెనుక ఉన్న దరఖాస్తుదారుల ‘సిండికేట్’ ను ప్రభుత్వం అనుమానిస్తుంది. అంతేకాదు, మళ్లీ దరఖాస్తులను ఆహ్వానించడానికి తాజా నోటిఫికేషన్ జారీ చేయాలని యోచిస్తోంది. అప్లికేషన్ ఫీజు ద్వారా కనీసం 10,000 దరఖాస్తులతో రూ .100 కోట్లు సంపాదించాలని ప్రభుత్వం లక్ష్యంగా పెట్టుకుంటే అది కాస్తా వర్కౌట్ కాక, కేవలం 8,464 దరఖాస్తుల ద్వారా రూ .84 కోట్లు మాత్రమే సర్కారు సంపాదించగలిగింది.

Read also :  షర్మిలకు తల్లితోడు : కూతురికి సహకరించాలని వైఎస్‌కు దగ్గరగా పనిచేసిన ఐఏఎస్, ఐపీఎస్ అధికారులకు విజయమ్మ ఫోన్లు.!