తెరుచుకున్న పిల్లలమర్రి గేట్లు.. ఇక నుంచి దగ్గరి నుంచే వీక్షణ..

700ఏళ్ల చరిత్ర గల పిల్లలమర్రి ఇక నుంచి పర్యాటకులకు మరింత చేరువ కానుంది. ఇటీవలే అటవీశాఖ సంరక్షణలో పునరుజ్జీవనం పొందింది ఈ భారీ వృక్షం. శతాబ్ధాల తన మనుగడ పోరాటానికి నిలువుటద్దంలా నిలిచింది. పిల్లలమర్రి పునరుజ్జీవన ప్రాజెక్ట్ పూర్తికావడంతో ప్రభుత్వం పర్యాటకులకు శుభవార్త అందించింది. ఇక నుంచి శతాబ్ధాల మహా వృక్షం నీడన నడవడానికి, దగ్గరి నుంచి చూసేందుకు అనుమతించింది. పర్యాటక శాఖ మంత్రి జూపల్లి కృష్ణారావు ఈ కార్యక్రమాన్ని లాంఛంగా ప్రారంభించారు. స్థానిక ఎమ్మెల్యే యెన్నం శ్రీనివాసరెడ్డి, దేవరకద్ర ఎమ్మెల్యే జి మధుసూధన్ రెడ్డి, జిల్లా కలెక్టర్ విజయేందిర బోయి, ఎస్పీ జానకి, మున్సిపల్ చైర్మన్ ఆనంద్ గౌడ్, ఇతర అధికారులు పాల్గొన్నారు.

మూడున్నర ఎకరాల్లో విస్తరించిన ఈ మహావృక్షం గత కొన్నేళ్లుగా పర్యాటకులకు దూరంగా ఉంటోంది. కొన్నాళ్ళ క్రితం తెగులు, చెదలతో పిల్లలమర్రికి జీవం కోల్పోయే పరిస్థితి వచ్చింది. ఒకానోక సందర్భంలో ఈ మహావృక్షం అంతరించిపోతుందేమోనని ఆందోళన ఏర్పడింది. మహావృక్షం వద్ద సరైన నిర్వాహణ లేదు. ఓ వైపు ఎండిపోవడం మరోవైపు చెదల పట్టడడం చెట్టును జీవం కోల్పోయేలా చేశాయి. ఇక చెదలు పట్టడంతో కొమ్మలకు తీవ్ర నష్టం జరిగింది. మహావృక్షం ఊడలు ఊడిపోవడం, ఆకులు ఎండిపోవడంతో పిల్లల మర్రి కళ తప్పింది. దీంతో పిల్లలమర్రి దీన పరిస్థితిని గమనించిన నాటి జిల్లా కలెక్టర్ రోనాల్డ్ రాస్ మహావృక్షం సంరక్షణకు ప్రత్యేక చర్యలు చేపట్టారు.

అటవీశాఖ పర్యవేక్షణలో అత్యాధునిక పద్ధతిలో చెట్టుకు జీవం పోసే ప్రయత్నం చేశారు. దెబ్బతిన్న చెట్టు కొమ్మలకు సెలైన్ బాటిళ్లలో క్లోరోపెరిపాస్ ద్రావణంతో చికిత్స అందించారు. ఊడల మొదళ్ల దగ్గర సేంద్రీయ ఎరువుల మట్టిని నింపారు. ఊడలు దెబ్బతినకుండా నేరుగా భూమిలోకి వెళ్ళేలా పివిసి పైపులను ఏర్పాటు చేశారు. ఈ పైపుల ద్వారా క్లోరోపైరిపాస్ లిక్విడ్‎ను ఊడలకు అందేలా చర్యలు తీసుకున్నారు. ఫారెస్ట్ అధికారుల ట్రీట్‎మెంట్‎తో పిల్లలమర్రి తిరిగి జీవం పోసుకుంది. చచ్చుబడిపోతున్న ఊడలు బాగా పెరిగి నేలలోకి చొచ్చుకెళ్లాయి. చెదలు పట్టిన కొమ్మలు మళ్లీ దృఢంగా తయారయ్యాయి. చెట్టు నిండా కొత్తగా కొమ్మలు, పచ్చని ఆకులుతో పచ్చని పందిరి వేసినట్లుగా సాక్షాత్కరిస్తోంది. వృక్షం సంరక్షణ చర్యలు చేపట్టినన్ని రోజులు ఆంక్షలు అమలు చేశారు. దూరం నుంచి మాత్రమే చెట్టును చూసి వెళ్లే ఏర్పాట్లు చేశారు. అందుకోసం ప్రత్యేకంగా వాచ్ స్టాండ్‎ను ఏర్పాటు చేశారు. వృక్షాన్ని తాకకుండా కేవలం సందర్శనకు మాత్రమే అవకాశం కల్పించారు.

మహావృక్షానికి జీవం పోయడమే కాకుండా పలు అభివృధి పనులు చేపట్టింది ప్రభుత్వం. చెట్టును, కొమ్మలు, ఊడలు తాకకుండా మహావృక్షం మర్రి నీడలో నడుస్తూ వెళ్లేలా ఫెన్సింగ్ ఏర్పాటు చేశారు. అలాగే సందర్శనకు వచ్చే పర్యాటకుల కోసం మౌలికవసతులను కల్పించారు. తాగునీటి ఏర్పాట్లు, సేదతీరేలా ఆకర్షణీయమైన బెంచీలు ఏర్పాటు చేశారు. ఇక పిల్లల కోసం సరికొత్తగా పార్కును, వాల్ పెయింటింగ్స్‎తో పిల్లలమర్రి పరిసరాలను అందంగా ముస్తాబు చేశారు.

మరిన్ని తెలంగాణ వార్తల కోసం ఇక్కడ క్లిక్ చేయండి..