ట్రైన్‌లో వెళ్తున్నప్పుడు మీ ఫోన్‌ బయటపడిపోయినా? చోరీ అయినా వెంటనే ఇలా చేయండి! మీ ఫోన్‌ చేతికొస్తుంది!

కదులుతున్న రైలులో మీ ఫోన్ మీ చేతిలోంచి జారిపోయినప్పుడు ఎవరైనా బాధపడతారు. అయ్యో వేలు పోసి కొన్న ఫోన్‌ పోయిందని అనుకుంటారు. కానీ సరైన రీతిలో స్పందించడం వల్ల పోయిన మీ ఫోన్‌ తిరిగి పొందవచ్చని రైల్వే అధికారులు అంటున్నారు. అది ఎలాగో ఇప్పుడు చూద్దాం..

ఎమర్జెన్సీ చైన్‌ లాగొద్దు..!

ఏదైనా వస్తువు ట్రైన్‌ నుంచి పడిపోతే చాలా మంది చేసే పని ఎమర్జెన్సీ చైన్‌ లాగి ట్రైన్‌ను ఆపేస్తారు. అయితే ఇది ఖచ్చితంగా నిషేధించబడిందని రైల్వే అధికారులు హెచ్చరిస్తున్నారు. ప్రమాదాలు, అగ్నిప్రమాదాలు లేదా వైద్యపరమైన ఇబ్బందులు వంటి ప్రాణాంతక అత్యవసర పరిస్థితులకు మాత్రమే ఈ చైన్‌ లాగాలి. పోగొట్టుకున్న ఫోన్‌ను తిరిగి పొందడానికి దీనిని దుర్వినియోగం చేస్తే రూ.5,000 వరకు జరిమానా విధించవచ్చు, రైలుకు అనవసరమైన ఆలస్యం జరగవచ్చు. ఫోన్‌ దొరుకుతుందన్న గ్యారెంటీ కూడా ఉండదు.

ఫోన్‌ పోయిన సమయంలో కంగారు పడే బదులు.. ఫోన్ ఎక్కడ పడిందో గమనించడంపై దృష్టి పెట్టండి. రైల్వే ట్రాక్‌లపై స్తంభాలు, కిలోమీటర్ గుర్తులు ఉంటాయి, ఇవి పోగొట్టుకున్న వస్తువులను గుర్తించడానికి కీలకమైన రిఫరెన్స్ పాయింట్లుగా పనిచేస్తాయి. స్తంభాల సంఖ్య, సమీపంలోని గుర్తు లేదా కనిపించే ఏదైనా ల్యాండ్‌మార్క్‌ను గుర్తుంచుకోవడం వల్ల రికవరీ అవకాశాలు గణనీయంగా మెరుగుపడతాయి.

వెంటనే RPF హెల్ప్‌లైన్‌ను సంప్రదించండి..

తోటి ప్రయాణీకుల ఫోన్ తీసుకొని రైల్వే ప్రొటెక్షన్ ఫోర్స్ హెల్ప్‌లైన్ 182 కు కాల్ చేయండి. ఫోన్‌ ఎక్కడ పోయిందో చెప్పండి. ఇంకా కచ్చితంగా అక్కడ పోల్స్‌ నంబర్స్‌, లేక స్టేషన్‌ దాటిన తర్వాత, వచ్చే ముందు ఇలా గుర్తులు చెప్పండి. దాంతో పాటు రైలు నంబర్, కోచ్ నంబర్, ఫోన్ పడిపోయిన సుమారు స్థానం, మీ సంప్రదింపు వివరాలు చెప్తే.. వాళ్లు వెంటనే సమీప స్టేషన్‌లోని RPF బృందాన్ని అప్రమత్తం చేస్తారు. వారు ఫోన్‌ను తిరిగి పొందగలరు. 182 అందుబాటులో లేకపోతే, ప్రయాణీకులు 1512 (ప్రభుత్వ రైల్వే పోలీసు హెల్ప్‌లైన్) లేదా సాధారణ రైల్వే ప్రయాణీకుల హెల్ప్‌లైన్ 138ని కూడా సంప్రదించవచ్చు.

ఫాలో అప్ చేసి ఫోన్ తీసుకోండి

ఒక వేళ ఫోన్‌ ఆర్పీఎఫ్‌ వారికి దొరికితే దాన్ని సమీపంలోని RPF లేదా GRP పోస్ట్‌లో ఉంచుతారు. ప్రయాణీకులకు రిఫరెన్స్ లేదా ఫిర్యాదు నంబర్ అందుతుంది, దీనిని ఉపయోగించి శోధన స్థితిని ట్రాక్ చేయవచ్చు. ఫోన్‌ను క్లెయిమ్ చేయడానికి, యజమాని చెల్లుబాటు అయ్యే IDని చూపించి, ధృవీకరణ తర్వాత దానిని అందజేసే ముందు పరికరం గురించి కీలక వివరాలను నిర్ధారించాలి.

మరిన్ని టెక్‌ వార్తల కోసం ఇక్కడ క్లిక్‌ చేయండి