అదిరిపోయే లుక్, భారీ బ్యాటరీతో మహీంద్రా BE 07.. మూడు స్క్రీన్లు ఏంటి సార్.. ఫీచర్లివే
Mahindra BE 07.. భారతీయ ఆటోమొబైల్ మార్కెట్లో ఎలక్ట్రిక్ వాహనాల జోరు రోజురోజుకూ పెరుగుతోంది. ఈ తరుణంలో ప్రముఖ దేశీయ దిగ్గజం నుంచి ఒక సరికొత్త ఎస్యూవీ మార్కెట్లోకి అడుగుపెట్టడానికి సిద్ధమవుతోంది. అత్యాధునిక టెక్నాలజీ, అదిరే లుక్స్తో రానున్న ఆ రహస్య వాహనం ఏంటి? దాని ప్రత్యేకతలు ఏంటో తెలుసుకుందాం.
Updated on: Aug 13, 2026 | 8:50 PM
మహీంద్రా మోటార్స్ తన ఎలక్ట్రిక్ వెహికల్ లైనప్ను మరింత విస్తరించేందుకు వేగంగా అడుగులు వేస్తోంది. ఇందులో భాగంగా BE సిరీస్లో వస్తున్న కొత్త మోడల్ ఎస్యూవీకి సంబంధించిన ఆసక్తికరమైన విషయాలు బయటకు వచ్చాయి. సరికొత్త ఫీచర్లు, అద్భుతమైన డిజైన్తో రానున్న ఈ కారు విశేషాలు ఏంటో తెలుసుకుందాం.
మహీంద్రా నుంచి త్వరలో మార్కెట్లోకి రానున్న కొత్త ఎలక్ట్రిక్ ఎస్యూవీ BE 07పై కార్ లవర్స్లో ఆసక్తి రోజురోజుకూ పెరుగుతోంది. ఈ కారు టెస్ట్ మ్యూల్కు సంబంధించిన లేటెస్ట్ స్పై షాట్లు బయటకు రావడంతో, తొలిసారిగా దీని ఇంటీరియర్కు సంబంధించిన పలు ముఖ్యమైన వివరాలు వెల్లడయ్యాయి. మహీంద్రా ఈ BE 07ను 2027లో భారత మార్కెట్లోకి తీసుకురావాలని భావిస్తోంది. ఇది కంపెనీ BE ఎలక్ట్రిక్ బ్రాండ్లో BE 6 తర్వాత వచ్చే రెండో మెయిన్ మోడల్గా నిలవనుంది. తాజాగా కనిపించిన టెస్ట్ కారును పరిశీలిస్తే, లోపల అత్యాధునిక టెక్నాలజీకి అత్యంత ప్రాధాన్యం ఇచ్చినట్లు స్పష్టమవుతోంది.
మూడు స్క్రీన్లతో డ్యాష్బోర్డ్
BE 07 ఇంటీరియర్లో అందరినీ ఆకట్టుకునే ప్రధాన అంశం మూడు స్క్రీన్ల సెటప్. డ్యాష్బోర్డ్ మొత్తం వెడల్పులో మూడు పెద్ద డిస్ప్లేలు ఏర్పాటు చేసినట్లు స్పై షాట్లలో స్పష్టంగా కనిపిస్తోంది. మహీంద్రా ఇప్పటికే కొన్ని మోడళ్లలో ఇలాంటి స్క్రీన్ లేఅవుట్ను విజయవంతంగా ఉపయోగిస్తోంది. దీంతో BE 07లో కూడా ఇదే అధునాతన డిజైన్ను కొనసాగించే అవకాశం ఉంది. విండ్స్క్రీన్ సమీపంలో చిన్న డ్యాష్క్యామ్ డిస్ప్లే కూడా కనిపించింది. అయితే ఇది ప్రొడక్షన్ కారులో కూడా ఉంటుందా లేదా అనేది అధికారికంగా తేలాల్సి ఉంది. మహీంద్రా తన ఎలక్ట్రిక్ కార్లలో 360 డిగ్రీ కెమెరా ఆధారిత డ్యాష్క్యామ్ ఫీచర్ను అందిస్తూ వస్తోంది. ప్రమాదాలు, ఇతర అత్యవసర సమయాల్లో వీడియో క్లిప్లను రికార్డ్ చేసి భద్రపరుచుకోవడానికి ఈ ఫీచర్ ఎంతగానో ఉపయోగపడుతుంది.
బ్యాటరీ రేంజ్
ఈ ఎస్యూవీని మహీంద్రా ప్రత్యేకమైన INGLO ప్లాట్ఫామ్పై నిర్మిస్తున్నట్లు తెలుస్తోంది. ఇందులో BE 6లో అందిస్తున్న బ్యాటరీ ప్యాక్లను ఉపయోగించే అవకాశాలున్నాయి. పరిమాణంలో BE 07 కొంచెం పెద్దదిగా ఉండనుండటంతో, క్యాబిన్ స్పేస్ కూడా మరింత ఎక్కువగా లభిస్తుంది. ఇక క్యాబిన్ విషయానికి వస్తే, బటర్ఫ్లై లోగోతో కూడిన టూ స్పోక్ స్టీరింగ్ వీల్, యాంబియంట్ లైటింగ్, ఐదు సీట్ల సౌకర్యం వంటి ప్రీమియం ఫీచర్లు ఉండనున్నాయి. మార్కెట్లోకి వచ్చిన తర్వాత మహీంద్రా BE 07కు టాటా హారియర్ EV, విన్ఫాస్ట్ VF7, BYD అట్టో 3 వంటి ప్రముఖ ఎలక్ట్రిక్ ఎస్యూవీలతో గట్టి పోటీ ఉండే అవకాశం ఉంది. ధర మరియు పూర్తి స్పెసిఫికేషన్లకు సంబంధించిన అధికారిక వివరాలు త్వరలోనే వెల్లడికానున్నాయి.
