Artificial Fish: శాస్త్రవేత్తల అద్భుత సృష్టి.. మానవ హృదయ కణాలతో కృత్రిమ చేప. వైరల్‌ వీడియో..

Artificial Fish: సృష్టికి ప్రతిసృష్టి చేస్తూ శాస్ర్తసాంకేతిక రంగంలో ఎన్నో ఆవిష్కరణలకు తెరతీస్తున్న శాస్త్రవేత్తలు తాజాగా మరో అద్భుతాన్ని ఆవిష్కృతం చేశారు. అమెరికాలోని హార్వర్డ్‌ యూనివర్సిటీకి చెందిన శాస్త్రవేత్తలు కృత్రిమ చేపను తయారు చేసి ప్రపంచం దృష్టిని తమవైపు తిప్పుకున్నారు. ఈ ఆర్టిఫిషియల్‌ చేపకు ఈదడానికి కావాల్సిన శక్తిని మానవ హృదయ కణాల ద్వారా అందించడం విశేషం. హార్వర్డ్‌ యూనివర్సిటీకి చెందిన శాస్త్రవేత్తల బృందం, ఎమోరీ యూనివర్సిటీ సహాకారంతో ఈ అద్భుతాన్ని సాకారం చేశారు.

ఈ కృత్రిమ చేపను రూపొందించడానికి శాస్త్రవేత్తలు, కాగితం, ప్లాస్టిక్‌, జెలటిన్‌తో పాటు మానవుడి హృదయ కండరాల నుంచి సజీవంగా ఉన్న కణాలను ఉపయోగించారు. ఈ ప్రయోగం ద్వారా భవిష్యత్తులో హృదయ సంబంధిత వ్యాధుల పరిశోధనల్లో ఎన్నో అద్భుత మార్పులు రానున్నాయని పరిశోధకులు చెబుతున్నారు. భవిష్యత్తులో కృత్రిమ హృదయాలను రూపొందించడానికి ఈ ఫలితాలు సహకరిస్తాయని శాస్త్రవేత్తలు అభిప్రాయపడుతున్నారు. ఈ పరిశోధనలకు సంబంధించి ఫలితాలను పరిశోధకులు గత వారం జర్నల్‌ సైన్స్‌ మేగజైన్‌లో ప్రచురించారు. ఇదిలా ఉంటే హార్వర్డ్‌ స్కూల్‌ ఆఫ్‌ ఇంజనీరింగ్ అండ్‌ అప్లైడ్‌ సైన్సెస్‌ ఓ వీడియోను విడుదల చేసింది. ఈ వీడియోలో కృత్రిమ చేప ఈత కొట్టడం స్పష్టంగా కనిపిస్తోంది.

This artificial fish is powered by human heart cells.https://t.co/aioJKFDZft pic.twitter.com/6c5nIbA1sn

— Harvard SEAS (@hseas) February 11, 2022

ఇదిలా ఉంటే హార్వర్డ్‌ యూనివర్సిటీ పరిశోధకుల బృందం ఇలాంటి ప్రయోగాన్ని చేయడం ఇదే తొలిసారి కాదు గతంలోనూ 2016లో కృత్రిమ స్ట్రింగ్రే (సముద్రపు జీవి)ను రూపొందించారు. ఇందుకోసం పరిశోధకులు ఎలుక గుండె నుంచి కణాలను సేకరించారు. ఈ ఎలుక గుండె కణాలపై కాంతిపడగానే అవి సంకోచించాయి. భవిష్యత్తులో ఆర్టిఫిషియల్‌ హృదయం అందుబాటులోకి రావాలంటే మరిన్ని పరిశోధనలు జరగాల్సి ఉందని పరిశోధకులు చెబుతున్నారు.

Also Read: Manchu Vishnu: జగన్‌తో ముగిసిన మంచు విష్ణు భేటీ.. దేని గురించి చర్చించారంటే..

AP DGP: గౌతమ్ సవాంగ్‌పై బదిలీ వేటు.. కొత్త డీజీపీగా రాజేంద్రనాథ్ రెడ్డి.. 

Pawan Kalyan: అమితాబ్ బచ్చన్‌ను కలిసి పవర్ స్టార్ పవన్ కళ్యాణ్.. ఎందుకో తెలుసా..