హీరో ఇంపల్స్​ గుర్తుందా? ఆ మోడల్‌ గుర్తుచేసేలా హీరో డ్యూయల్ స్పోర్ట్‌ బైక్ తెచ్చేస్తోంది

హీరో సంస్థ కొత్త డ్యూయల్ స్పోర్ట్ బైక్‌కు సంబంధించి డిజైన్ పేటెంట్ దాఖలు చేసింది. పాత ఇంపల్స్ డిజైన్‌ను పోలి ఉన్న ఈ బైక్‌లో 150-200సీసీ ఎయిర్ కూల్డ్ ఇంజిన్ ఉండే అవకాశం ఉండగా, దీనిని EICMA 2026లో ఆవిష్కరించే ఛాన్స్ ఉంది. టెక్ ప్రియులను, బైక్ లవర్స్‌ను ఎంతగానో ఆకట్టుకుంటున్న ఈ నూతన బైక్‌కు సంబంధించిన పూర్తి వివరాలు తెలుసుకుందాం.

పాత ఇంపల్స్‌ను గుర్తుచేస్తున్న డిజైన్

ఈ కొత్త బైక్ డిజైన్‌లో ప్రస్తుతం మార్కెట్లో ఉన్న హీరో మోడళ్లకు చెందిన కొన్ని కీలక అంశాలు కనిపిస్తున్నప్పటికీ, బైక్ మొత్తం డిజైన్, ఫ్యూయల్ ట్యాంక్ ష్రౌడ్స్ అచ్చం పాత ఇంపల్స్‌ను పోలి ఉన్నాయి. ముందు భాగంలో ఎత్తుగా ఉండే మడ్ గార్డ్, ఎత్తులో అమర్చిన ఎగ్జాస్ట్, టెలిస్కోపిక్ ఫోర్క్, వెనుక వైపు మోనోషాక్ లాంటి అన్ని అంశాలు ఒక పర్ఫెక్ట్ డ్యూయల్ స్పోర్ట్ బైక్‌లో ఉండేలా కనిపిస్తున్నాయి. ఇక పేటెంట్ ఫోటోల్లో స్పష్టంగా కనిపిస్తున్న ఇంజిన్ ఎయిర్-కూల్డ్ యూనిట్‌గా ఉంది. దీనికి ఎలాంటి ఆయిల్ కూలర్ కనిపించడం లేదు.

అందువల్ల ఇది సుమారు 150 నుంచి 200సీసీ మధ్య సామర్థ్యం కలిగిన ఇంజిన్ అయి ఉండొచ్చని టెక్ నిపుణులు అంచనా వేస్తున్నారు. ప్రస్తుతం హీరో సంస్థ అభివృద్ధి చేస్తున్న ‘XPulse 421’తో పోలిస్తే ఇది చాలా చిన్న ఇంజిన్ అని చెప్పవచ్చు. తక్కువ సామర్థ్యం ఉన్న ఇంజిన్‌ను ఉపయోగించడం ద్వారా బైక్ బరువు కూడా చాలా తక్కువగా ఉండే అవకాశం ఉంది. దీంతో సిటీ రోడ్లతో పాటు కఠినమైన ఆఫ్‌-రోడ్ మార్గాల్లోనూ దీనిని ఎంతో ఈజీగా నడపవచ్చు.

భారత మార్కెట్ లాంచ్ అంచనాలు

పేటెంట్ ఫోటోలను గమనిస్తే ఇంజిన్‌కు కిక్ స్టార్టర్ స్పష్టంగా కనిపిస్తోంది. అయితే దీనితో పాటు ఎలక్ట్రిక్ స్టార్టర్ ఆప్షన్ కూడా ఉండే అవకాశం ఉంది. మరో అత్యంత ఆసక్తికరమైన విషయం ఏమిటంటే, ఇంజిన్ ఎడమ వైపున ఫ్యూయల్ ట్యాప్ మరియు హ్యాండిల్‌బార్‌పై చోక్ నాబ్ లాంటి భాగాలు కనిపిస్తున్నాయి. ఇవి బైక్‌లో కార్బ్యురేటెడ్ ఇంజిన్ ఉండొచ్చనే అనుమానాన్ని కలిగిస్తున్నాయి. అయితే ప్రస్తుత భారతీయ ఉద్గార నిబంధనల ప్రకారం కార్బ్యురేటర్‌తో కూడిన కొత్త బైక్‌ను విక్రయించడం సాధ్యం కాదు.

అందువల్ల ఈ పేటెంట్‌లో కనిపిస్తున్న వెర్షన్ ప్రధానంగా ఎక్స్‌పోర్ట్ మార్కెట్ల కోసం రూపొందించినది కావచ్చని భావిస్తున్నారు. అయినప్పటికీ ఈ బైక్ పూర్తిగా విదేశీ మార్కెట్ల కోసమే అని భావించాల్సిన అవసరం లేదు. పేటెంట్ చిత్రాల్లో ఫ్రంట్ నంబర్ ప్లేట్, సారీ గార్డ్ లాంటి ఇండియన్ మార్కెట్‌కు అత్యంత అవసరమైన అంశాలు కూడా స్పష్టంగా కనిపిస్తున్నాయి. దీంతో హీరో ఈ మోడల్‌కు సంబంధించి దేశీయ మార్కెట్ కోసం ఒక ప్రత్యేక వెర్షన్‌ను సిద్ధం చేసే బలమైన అవకాశం ఉంది.

ఒకవేళ భారత్‌లో దీనిని అధికారికంగా విడుదల చేస్తే, ఇది ఇప్పటికే మార్కెట్లో ఉన్న XPulse 200 4V, XPulse 210 బైక్‌లకు మరో అద్భుతమైన ప్రత్యామ్నాయంగా నిలుస్తుంది. ఈ బైక్ డిజైన్‌లో పాత ఇంపల్స్ పోలికలు స్పష్టంగా ఉండటంతో ఆ పేరును హీరో తిరిగి ఉపయోగిస్తుందా లేదా అనే ప్రశ్న ఆసక్తిని పెంచుతోంది. అయితే దీని పేరు, ఇంజిన్ సామర్థ్యం, కచ్చితమైన ధర, విడుదల తేదీపై హీరో మోటోకార్ప్ ఇప్పటి వరకు ఎలాంటి అధికారిక ప్రకటన చేయలేదు. ఈ సరికొత్త బైక్‌ను EICMA 2026 వేదికగా అధికారికంగా ఆవిష్కరించే అవకాశం ఉందని మార్కెట్ వర్గాలు భావిస్తున్నాయి.