గాంధీ జయంతి

మహాత్మా గాంధీ జయంతిని ప్రతి సంవత్సరం అక్టోబర్ 2న దేశవ్యాప్తంగా ఘనంగా జరుపుకుంటారు. జాతిపిత మహాత్మా గాంధీ జన్మదినాన్ని పురస్కరించుకుని ఈ రోజును భారతదేశంలో జాతీయ సెలవుదినంగా పాటిస్తారు.. ఐక్యరాజ్యసమితి గాంధీ జయంతి రోజును అంతర్జాతీయ అహింసా దినోత్సవంగా నిర్వహిస్తోంది. గాంధీజీ సత్యం, అహింస అనే ఆయుధాలతో బ్రిటిష్ పాలనకు వ్యతిరేకంగా భారత స్వాతంత్ర్య పోరాటాన్ని నడిపించారు. ఉప్పు సత్యాగ్రహం, క్విట్ ఇండియా వంటి ఉద్యమాల ద్వారా ఆయన లక్షలాది మందిలో స్ఫూర్తిని నింపారు. ఈ రోజున న్యూఢిల్లీలోని రాజ్ ఘాట్ వద్ద ఆయన సమాధికి ప్రముఖులు నివాళులర్పిస్తారు. పాఠశాలలు, కార్యాలయాలలో గాంధీజీకి నివాళులర్పించడంతోపాటు సాంస్కృతిక కార్యక్రమాలు, స్వచ్ఛభారత్ వంటి సేవా కార్యక్రమాలను నిర్వహిస్తూ ఆయన శాంతి సందేశాన్ని స్మరించుకుంటారు.