Study: మీక్కూడా అలారం స్నూజ్‌ బటన్‌ నొక్కే అలవాటు ఉందా.? అస్సలు బాధపడకండి..

ఉదయం అలరం పెట్టుకొని నిద్రలేచే అలవాటు మనలో చాలా మందికి ఉంటుంది. అయితే అలరం మోగిన వెంటనే నిద్రలేచే వారి సంఖ్య చాలా తక్కువ ఉంటుంది. అలారం వచ్చిన వెంటనే స్నూజ్‌ బటన్‌నొక్కడం చాలా మందికి అలవాటు. ఇంకాసేపు పడుకుందాంలే అనే భావనలో ఉంటారు. రాత్రి ఎక్కువ సేపు మేల్కొని ఉండడమో, నిద్ర సరిపోకపోవడమో కారణం ఏదైనా.. స్నూజ్‌ బటన్‌ నొక్కుతూ మేల్కోవడాన్ని వాయిదా వేసే వారే ఎక్కువ.

అయితే ఇలా స్నూజ్‌ బటన్‌ నొక్కేవారిని బద్ధకస్తులు అనే ముద్ర వేస్తాం. కానీ ఇలాంటి వాళ్లు బాధపడాల్సిన అవసరం లేదని నిపుణులు చెబుతున్నారు. అలారం మోగగానే వెంటనే నిద్రలేచే వారితో పోల్చితే, స్నూజ్‌ బటన్‌ పెట్టుకొని మేల్కోంటే అభిజ్ఞా పనితీరు మెరుగవుతుందని అంటున్నారు. ఇదేదో ఆషామాషీగా చెప్పిన విషయం కాదు. సుమారు 1732 మందిపై పరిశోధనలు నిర్వహించిన తర్వాత వెల్లడించిన విషయాలు. ఈ వివరాలను జర్నల్‌ ఆఫ్‌ స్లీప్‌ రీసెర్చ్‌ నివేదికలో వెల్లడించారు. గాఢ నిద్రలో ఉన్నప్పుడు ఒక్కసారిగా మేల్కోవడం కంటే, నెమ్మదిగా క్రమంగా నిద్ర నుంచి బయటకు రావడం మగతగా ఉన్న వ్యక్తులకు ఉపయోగపడుతుందని అధ్యాయనంలో తేలింది.

ఇలా క్రమంగా బద్ధకం నుంచి బయటకురావడంతో పాటు రోజంతా బ్రెయిన్‌ ఇంటెలిజెంట్‌గా పనిచేస్తుందని శాస్త్రవేత్తలు నిర్ధారణకు వచ్చారు. సర్వేలో పాల్గొన్న వారిలో సుమారు 69 శాతం మంది స్నూజ్‌ ఫంక్షన్‌ను ఉపయోగిస్తున్నారని తేలింది. సగటును స్నూజ్‌ సమయం 22 నిమిషాలని అధ్యాయనంలో తేలింది. ఇలా 30 నిమిషాల పాటు అలారంను ఆపిన వారు అభిజ్ఞా పరీక్షలలో మెరుగైన ఫలితాలను కనబరిచినట్లు సర్వేలో స్పష్టమైంది. ఇలా అలారంను పోస్ట్‌పోన్‌ చేసే వారిలో అధికులు యువకులేనని తేలింది. ఇక 42 శాతం మంది కౌమారదశలో ఉన్నవారు నిద్ర నుంచి మేల్కోవడానికి ఇబ్బంది పడుతున్నారని అధ్యాయనంలో తేలింది.

నిద్రలేమితో ఇబ్బంది పడేవారు, గాఢ నిద్రలో నుంచి మేల్కొనడం వల్ల తాత్కాలికంగా స్నూజ్‌ బటన్‌ను నొక్కే అవకాశం ఉందని పరిశోధకులు చెబుతున్నారు. అలారం స్నూజ్‌ చేయడం వల్ల స్లో వేవ్‌ స్లీప్‌ లేదా ర్యాపిడ్‌ ఐ మూవ్‌మెంట్‌ స్లీప్‌ కంటే తేలికైన నిద్ర దశకు చేరుకోవడానికి వీలు కల్పిస్తుందని పరిశోధకులు చెబుతున్నారు.

మరిన్ని సైన్స్ వార్తల కోసం క్లిక్ చేయండి..