సింగిల్​ హ్యాండ్​తో నడిపే బైక్​ వచ్చేసింది.. Kawasaki KLE500 కొత్త వేరియంట్‌లో స్పెషల్ ఫీచర్

అడ్వెంచర్ బైక్‌ల విభాగంలో కవాసకి కొత్త మోడల్‌ను పరిచయం చేసింది. 2027 Kawasaki KLE500 శ్రేణిలో భాగంగా KLE500 SE Smart Ride వేరియంట్‌ను ఆవిష్కరించింది. ఇందులో ప్రత్యేకమైన మెకానికల్ సెంట్రిఫ్యూగల్ క్లచ్‌ను అందించారు. దీంతో బైక్‌ను ప్రారంభించడం, ఆపడం వంటి సందర్భాల్లో క్లచ్ లివర్‌ను ప్రతిసారీ ఉపయోగించాల్సిన అవసరం ఉండదు. ముఖ్యంగా ట్రాఫిక్‌లో, తక్కువ వేగంతో ప్రయాణించేటప్పుడు ఈ టెక్నాలజీ ఉపయోగపడుతుంది.

సెంట్రిఫ్యూగల్ క్లచ్‌..

కొత్త KLE500 SE Smart Ride రాకతో కవాసకి KLE500 శ్రేణిలో మొత్తం మూడు వేరియంట్లు ఉన్నాయి. అవి KLE500, KLE500 SE, KLE500 SE Smart Ride. సాధారణ SE వేరియంట్‌లో ట్యూబ్‌ టైర్లు ఉండగా, కొత్త Smart Ride మోడల్‌లో ట్యూబ్‌లెస్ టైర్లను అందించారు. పంక్చర్ అయినప్పుడు గాలి వేగంగా బయటకు వెళ్లే ప్రమాదాన్ని తగ్గించడంలో ఇవి సహాయపడతాయి.

ఈ బైక్‌లోని సెంట్రిఫ్యూగల్ క్లచ్ ఇంజిన్ వేగానికి అనుగుణంగా పనిచేస్తుంది. బైక్‌ను ముందుకు కదిలించడానికి, ఆపడానికి క్లచ్ లివర్‌ను ఆపరేట్ చేయాల్సిన అవసరం ఉండదు. అయితే గేర్లు మార్చేటప్పుడు మాత్రం క్లచ్ లివర్‌, గేర్ పెడల్‌ను సాధారణంగానే ఉపయోగించాలి. హోండా ఈ-క్లచ్‌లో ఎలక్ట్రోమెకానికల్ వ్యవస్థ ఉండగా, కవాసకి ఇందులో మెకానికల్ క్లచ్ టెక్నాలజీని ఉపయోగించింది.

భారత్‌లో విడుదల ఎప్పుడు?

Kawasaki KLE500 SE Smart Rideలో 451cc ప్యారలల్ ట్విన్ ఇంజిన్‌ను అమర్చారు. ఇది 9,000rpm వద్ద 45hp పవర్‌, 6,000rpm వద్ద 42.6Nm టార్క్‌ను ఉత్పత్తి చేస్తుంది. కొత్త క్లచ్ వ్యవస్థ మినహా ఇంజిన్ పనితీరులో మార్పులు లేవు. ఈ మోడల్‌ Pearl Blizzard White అనే ఒకే రంగులో అందుబాటులో ఉంటుంది.

భారత్‌లో ఈ బైక్ విడుదల తేదీ, ధరను కవాసకి ఇంకా ప్రకటించలేదు. అంతర్జాతీయ మార్కెట్‌ నుంచి CBU మార్గంలో దిగుమతి చేస్తే ధర ఎక్కువగా ఉండే అవకాశం ఉంది. భారత మార్కెట్లోకి వస్తే అడ్వెంచర్ బైక్‌ల విభాగంలో కొత్త పోటీని సృష్టించవచ్చు.