Paris Olympics 2024: మరో స్వర్ణంపై కన్నేసిన నీరజ్ చోప్రా.. ఒలింపిక్స్‌లో ప్రయాణం ఎలా ఉందంటే?

Paris Olympics 2024 Neeraj Chopra Biography: భారతదేశం తరపున నీరజ్ చోప్రా ఒలింపిక్స్‌లో స్వర్ణ పతకం సాధించిన మొదటి ఫీల్డ్ అథ్లెట్‌గా నిలిచాడు. టోక్యో ఒలింపిక్స్ 2020లో జావెలిన్ త్రోలో బంగారు పతకం సాధించి చరిత్ర సృష్టించాడు. అప్పటి నుంచి అతను ఈ గేమ్‌లో ప్రపంచం మొత్తాన్ని శాసిస్తున్నాడు. నీరజ్ జావెలిన్ త్రోలో కూడా ప్రపంచ ఛాంపియన్‌గా నిలిచాడు. ఈ క్రీడలో ఇప్పటివరకు చాలా రికార్డులు సృష్టించాడు. ప్రస్తుతం, నీరజ్ చోప్రా మరోసారి పారిస్ ఒలింపిక్స్ 2024లో బంగారు పతకం సాధించేందుకు తీవ్రంగా శ్రమిస్తున్నాడు. అతను ఇప్పటివరకు ఎలా ప్రయాణించాడు. జావెలిన్ త్రోలో ఎలాంటి అద్భుతాలు చేశాడో తెలుసుకుందాం.

టోక్యో ఒలింపిక్స్‌లో బంగారు పతకం గెలవడానికి ముందు నీరజ్ చోప్రా చాలా తక్కువ మందికి తెలుసు. కానీ, ఈ విజయంతో అతను పోస్టర్ బాయ్‌గా ఫేమస్ అయ్యాడు. అయితే హర్యానాలోని పానిపట్ జిల్లా ఖండ్రా గ్రామానికి చెందిన నీరజ్‌కి క్రీడల్లో చేరడం అభిరుచి కాదు. బలవంతంగా ఇందులో చేరాడు. అతని తల్లి సరోజ్ దేవి గృహిణి. తండ్రి సతీష్ కుమార్ రైతు. చిన్నతనంలో అధిక బరువు కారణంగా, అతని తల్లిదండ్రులు క్రీడలలో పాల్గొనమని ఒత్తిడి చేశారు.

1997లో జన్మించిన నీరజ్ 13 ఏళ్ల వయసులో ఆడడం ప్రారంభించాడు. అప్పుడు అతను బరువు తగ్గడానికి, ఆత్మవిశ్వాసం పొందడానికి ఆడాడు. ఈ సమయంలో భారత జావెలిన్ త్రోయర్ జైవీర్ చౌదరి పానిపట్‌లోని శివాజీ స్టేడియంలో ఆడటం చూశాడు. అతను నీరజ్‌ని ఈ గేమ్‌కు పరిచయం చేశాడు. అతను ప్రపంచ ఛాంపియన్‌గా మారడంలో సహాయం చేశాడు. ఒక సంవత్సరం తర్వాత, అతను పంచకులలోని తౌ దేవి లాల్ స్పోర్ట్స్ కాంప్లెక్స్‌లో కోచ్ నసీమ్ అహ్మద్ పర్యవేక్షణలో శిక్షణ ప్రారంభించాడు.

చిన్నప్పటి నుంచే అద్భుతాలు..

నీరజ్ చోప్రా 22 ఏళ్లకే స్వర్ణ పతకాన్ని గెలుచుకున్నాడు. కానీ, చిన్న వయసులోనే ఛాంపియన్‌ లాంటి ఆటతో ఆకట్టుకున్నాడు. 2012లో 15 ఏళ్ల వయసులో నీరజ్ అండర్-16 జాతీయ ఛాంపియన్‌గా నిలిచాడు. ఈ ఈవెంట్‌లో అతను 68.60 మీటర్ల త్రో విసిరి కొత్త జాతీయ రికార్డును కూడా సృష్టించాడు. కేవలం రెండు సంవత్సరాల తరువాత, అతను యూత్ ఒలింపిక్ అర్హతలో తన మొదటి అంతర్జాతీయ రజత పతకాన్ని గెలుచుకున్నాడు. 2015లో, 18 సంవత్సరాల వయస్సులో, అతను చెన్నైలో జరిగిన ఇంటర్-స్టేట్ ఈవెంట్‌లో 77.33 మీటర్ల త్రో విసిరి తన మొదటి సీనియర్ జాతీయ ఛాంపియన్‌షిప్‌ను గెలుచుకున్నాడు.

2016 తర్వాత మారిన అదృష్టం.. సైన్యం శిక్షణతో ఛాంపియన్‌గా..

2016 సంవత్సరం నీరజ్ చోప్రాకు ఒక మలుపు. ఈ ఏడాది కోల్‌కతాలో జరిగిన నేషనల్ ఓపెన్ ఛాంపియన్‌షిప్‌లో బంగారు పతకం సాధించాడు. ఇది జరిగిన వెంటనే గౌహతిలో జరిగిన దక్షిణాసియా క్రీడల్లో 82.23 మీటర్లు విసిరి మరో స్వర్ణం సాధించాడు. నీరజ్ జాతీయ, అంతర్జాతీయ ప్రదర్శన చూసి ఇండియన్ ఆర్మీ చాలా సంతోషించింది. అందువల్ల 2017లో అతన్ని జూనియర్ కమిషన్డ్ ఆఫీసర్ (JCO)గా చేయాలని సైన్యం నిర్ణయించింది. భారత సైన్యం నేరుగా అతనికి రాజ్‌పుతానా రైఫిల్స్‌లో నాయబ్ సుబేదార్ హోదాను ఇచ్చింది.

ఆర్మీలో చేరిన తర్వాత నీరజ్ చోప్రా ‘మిషన్ ఒలింపిక్స్ వింగ్’ కింద శిక్షణకు ఎంపికయ్యాడు. ‘మిషన్ ఒలింపిక్స్ వింగ్’ అనేది భారత సైన్యం చొరవతో.. ఆటగాళ్ల ప్రతిభను గుర్తించి 11 క్రీడలలో జాతీయ, అంతర్జాతీయ పోటీలకు శిక్షణ ఇస్తారు.

సైన్యంలో శిక్షణ పొంది ఎన్నో పతకాలు..

భారత సైన్యంలోని ‘మిషన్ ఒలింపిక్స్ వింగ్’లో శిక్షణ తీసుకున్న తర్వాత నీరజ్ పతకాల మోత మోగించింది. 2018 కామన్వెల్త్ గేమ్స్‌లో, అతను 86.47 మీటర్ల త్రో విసిరాడు. ఇది ఆ సీజన్‌లో అత్యుత్తమ త్రోగా నిలిచింది. అదే ఏడాది దోహా డైమండ్ లీగ్‌లో 87.43 మీటర్ల త్రో విసిరి తన రికార్డును తానే బద్దలు కొట్టాడు. ఆ తర్వాత ఆసియా క్రీడల్లో 88.06 మీటర్లతో స్వర్ణ పతకాన్ని కైవసం చేసుకున్నాడు. అయితే, దీని తర్వాత అతను గాయపడి 8 నెలల పాటు ఎక్కడా పాల్గొనలేకపోయాడు.

ఒలింపిక్స్‌లో చరిత్ర సృష్టించిన నీరజ్..

టోక్యో ఒలింపిక్స్ 2020 హోరిజోన్‌లో ఉండగా, నీరజ్ చోప్రా గాయంతో పోరాడుతున్నాడు. ఈ కార్యక్రమంలో ఆయన పాల్గొనడం ప్రమాదంలో పడింది. అయితే, ఈ ఏడాది కరోనా వైరస్ విజృంభించింది. దీంతో కోలుకోవడానికి అతనికి మరింత సమయం దొరికింది. దీని తర్వాత 2021లో టోక్యోలో బంగారు పతకం సాధించి చరిత్ర సృష్టించాడు. ఈ ఈవెంట్‌లో, అతను 87.58 మీటర్ల త్రో విసిరి ఈ పతకాన్ని గెలుచుకున్నాడు. ఇది అతని కెరీర్‌లో ఇప్పటివరకు అత్యుత్తమ త్రోగా మారింది.

ఒలింపిక్స్ తర్వాత కూడా..

ఒలింపిక్స్ తర్వాత కూడా నీరజ్ విజయం కొనసాగింది. ఒరెగాన్‌లో జరిగిన ప్రపంచ అథ్లెటిక్స్ ఛాంపియన్‌షిప్ 2022లో అతను రజత పతకాన్ని గెలుచుకున్నాడు. మరుసటి ఏడాది బుడాపెస్ట్‌లో జరిగిన అదే టోర్నీలో బంగారు పతకం సాధించి చరిత్ర సృష్టించాడు. దీంతో జావెలిన్ త్రోలో ప్రపంచ ఛాంపియన్‌గా నిలిచిన భారత అథ్లెట్‌గా నిలిచాడు. హాంగ్‌జౌ ఆసియా క్రీడలు 2023లో మరో బంగారు పతకాన్ని గెలుచుకున్నాడు.

నీరజ్ చోప్రా అవార్డులు..

జావెలిన్ త్రోలో నీరజ్ చోప్రా అద్భుతమైన ప్రదర్శనను దృష్టిలో ఉంచుకుని, భారత ప్రభుత్వం 2018లో అర్జున అవార్డుతో సత్కరించింది. ఆర్మీ అతనికి 2020లో క్రీడల్లో విశిష్ట సేవా పతకాన్ని అందించింది. ఇది కాకుండా, అతను 2021 లో మేజర్ ధ్యాన్ చంద్ ఖేల్ రత్న, 2022 లో పద్మశ్రీ అవార్డుతో సత్కరించబడ్డాడు.

మరిన్ని క్రీడా వార్తల కోసం ఇక్కడ క్లిక్ చేయండి..