Vaibhav Sooryavanshi Debut: అటు సచిన్, ఇటు షెఫాలీ రికార్డులు బ్రేక్ చేసిన వైభవ్ సూర్యవంశీ
Vaibhav Sooryavanshi Debut: దేశవాళీ క్రికెట్ నుంచి అంతర్జాతీయ స్థాయికి అత్యంత వేగంగా ఎదిగిన వైభవ్ సూర్యవంశీ ప్రయాణం ఎందరో యువ ఆటగాళ్లకు స్ఫూర్తిదాయకం. కేవలం 15 ఏళ్ల వయసులోనే ఒత్తిడిని అధిగమించి, సచిన్ వంటి దిగ్గజాల రికార్డులను బద్దలు కొట్టిన ఈ యువ కిరణం రాబోయే రోజుల్లో భారత క్రికెట్ను ఏలుతాడని విశ్లేషకులు భావిస్తున్నారు. టీమిండియాలో అతని సుదీర్ఘ ప్రయాణం విజయవంతం కావాలని ఆశిద్దాం.
Updated on: Jul 04, 2026 | 6:54 PM
Vaibhav Sooryavanshi Debut: భారత క్రికెట్ చరిత్రలో సరికొత్త అధ్యాయం లిఖితమైంది. క్రికెట్ దేవుడు సచిన్ టెండూల్కర్ దశాబ్దాల కాలంగా భద్రంగా కాపాడుకుంటూ వచ్చిన ఒక అరుదైన రికార్డును బీహార్కు చెందిన 15 ఏళ్ల సంచలనం వైభవ్ సూర్యవంశీ తుడిచిపెట్టేశాడు. అత్యంత పిన్న వయసులోనే భారత సీనియర్ జట్టు తరపున అంతర్జాతీయ అరంగేట్రం చేసిన క్రికెటర్గా వైభవ్ సరికొత్త చరిత్ర సృష్టించాడు.
చరిత్ర సృష్టించిన వైభవ్ సూర్యవంశీ..
ఇంగ్లాండ్తో మాంచెస్టర్లో మైదానంలో జరుగుతున్న రెండో టీ20 మ్యాచ్లో వైభవ్ సూర్యవంశీ భారత తుది జట్టులో చోటు దక్కించుకున్నాడు. వికెట్ కీపర్ బ్యాటర్ సంజు శాంసన్ స్థానంలో వైభవ్ను జట్టులోకి తీసుకుంటున్నట్లు టాస్ సమయంలో కెప్టెన్ శ్రేయస్ అయ్యర్ ప్రకటించాడు. మ్యాచ్ ప్రారంభానికి ముందు టీమిండియా ఆటగాళ్ల చప్పట్లు, హర్షధ్వానాల మధ్య యువ ఆటగాడు తిలక్ వర్మ చేతుల మీదుగా వైభవ్ తన అరంగేట్రపు క్యాప్ను అందుకున్నాడు. ఈ క్షణంలో మైదానంలో ఉన్నవారంతా భావోద్వేగానికి గురయ్యారు.
సచిన్, షెఫాలీ రికార్డులు బద్దలు..
వైభవ్ సూర్యవంశీ కేవలం 15 సంవత్సరాల 99 రోజుల వయసులోనే భారతదేశం తరఫున అంతర్జాతీయ మ్యాచ్ ఆడి ఈ ఘనత సాధించాడు. దీనితో అతను మాస్టర్ బ్లాస్టర్ సచిన్ టెండూల్కర్, మహిళా క్రికెట్ సంచలనం షెఫాలీ వర్మ రికార్డులను అధిగమించాడు. గతంలో షెఫాలీ వర్మ 15 సంవత్సరాల 239 రోజుల వయసులో భారత్ తరఫున అరంగేట్రం చేయగా, సచిన్ టెండూల్కర్ 16 సంవత్సరాల 205 రోజుల వయసులో అంతర్జాతీయ క్రికెట్లో అడుగుపెట్టాడు. ఇప్పుడు ఈ ఇద్దరి రికార్డులను వైభవ్ బద్దలు కొట్టడం విశేషం.
సచిన్ తొలి సెంచరీ చేసిన మైదానంలోనే..
మరో అద్భుతమైన కాకతాళీయమైన విషయం ఏమిటంటే, 1990 ఆగస్టు 14న సచిన్ టెండూల్కర్ ఇంగ్లాండ్పై తన కెరీర్లో మొదటి టెస్ట్ సెంచరీ సాధించిన అదే మాంచెస్టర్ మైదానంలోనే వైభవ్ కూడా ఇవాళ అరంగేట్రం చేశాడు. నాాడు సచిన్ ఒంటరి పోరాటం చేసి అజేయంగా 119 పరుగులు సాధించి భారత్ను ఓటమి నుంచి కాపాడాడు. ఇప్పుడు అదే చారిత్రాత్మక వేదికపై వైభవ్ తన అంతర్జాతీయ ప్రస్థానాన్ని ప్రారంభించడం విశేషం.
కెప్టెన్ నమ్మకం.. జట్టులో ఉత్సాహం..
టాస్ గెలిచి బ్యాటింగ్ ఎంచుకున్న అనంతరం కెప్టెన్ శ్రేయస్ అయ్యర్ మాట్లాడుతూ, వైభవ్ ప్రతిభపై పూర్తి నమ్మకం వ్యక్తం చేశాడు. “గత కొన్ని నెలలుగా వైభవ్ దేశవాళీ క్రికెట్లో ఆడిన తీరు అమోఘం. అతను ఈ సవాలుకు పూర్తిగా అర్హుడు. ఎలాంటి ఒత్తిడి లేకుండా స్వేచ్ఛగా ఆడగల మానసిక దృఢత్వం అతని సొంతం” అని శ్రేయస్ కొనియాడాడు. అభిషేక్ శర్మ, ఇషాన్ కిషన్ వంటి అగ్రశ్రేణి ఆటగాళ్లతో కలిసి ఈ యువ సంచలనం ఇన్నింగ్స్ ప్రారంభించనున్నాడు.
మరిన్ని క్రీడా వార్తల కోసం ఇక్కడ క్లిక్ చేయండి..
