MS Dhoni: స్టాక్ మార్కెట్‌లో ధోనీ భారీ ఇన్వెస్ట్‌మెంట్.. ఆ కంపెనీ షేర్లు కొనుగోలు.. ఎంత పెట్టుబడి పెట్టాడంటే?

Garuda Aerospace: క్రికెటర్ ఎంఎస్ ధోని డ్రోన్ స్టార్టప్ కంపెనీ గరుడ ఏరోస్పేస్‌లో పెట్టుబడిని పెంచాడు. ఐపిఓ-బౌండ్ స్టార్టప్‌లో బ్రాండ్ అంబాసిడర్‌గా తిరిగి చేరాడు. దీంతో ప్రస్తుతం డ్రోన్ స్టార్టప్‌లో రూ. 3 కోట్ల పెట్టుబడి పెట్టినట్లు వార్తలు వినిపిస్తున్నాయి. 2030 నాటికి భారత్‌ను డ్రోన్ హబ్‌గా మార్చాలన్న గరుడ విజన్‌పై తనకు నమ్మకం ఉందని ధోనీ చెప్పాడు. ఈ కొత్త పెట్టుబడితో స్టార్టప్‌లో ధోనీకి దాదాపు 1.1 శాతం వాటా ఉంది.

గరుడతో తన అనుబంధం గురించి భారత మాజీ కెప్టెన్ శుక్రవారం మాట్లాడుతూ, “గరుడ తన రెక్కలను ప్రపంచవ్యాప్తంగా విస్తరించింది. నేను వ్యవసాయం, రక్షణ, పరిశ్రమ 4.0, డ్రోన్ రంగాన్ని సానుకూలంగా ప్రభావితం చేయడానికి సంతోషిస్తున్నాను” అంటూ చెప్పుకొచ్చాడు. కాగా, 2022లో, ప్రధాని నరేంద్ర మోదీ 100 ప్రదేశాల్లో 100 డ్రోన్‌లను ఫ్లాగ్ చేయడంతో స్టార్టప్‌తో ధోనీ తన అనుబంధాన్ని ప్రారంభించాడు. అప్పటి నుంచి గరుడ ఏరోస్పేస్ తన ఆదాయాన్ని పెంచుకుంది. మార్కెట్ ఇంటెలిజెన్స్ సంస్థ ట్రాక్సన్ ప్రకారం, స్టార్టప్ ఎనిమిది రౌండ్లలో మొత్తం $33.4 మిలియన్ల ఈక్విటీ నిధులను సేకరించింది. ఆగస్టు 24, 2024 నాటికి $255 మిలియన్ల విలువను కలిగి ఉంది. గరుడ ఏరోస్పేస్ వ్యవస్థాపక సీఈఓ అగ్నీశ్వర్ జయప్రకాష్ మాట్లాడుతూ, “గరుడ ఏరోస్పేస్‌లో మహి భాయ్ మా అందరికీ స్ఫూర్తిదాయకంగా నిలిచారు. అతని ప్రోత్సాహం, తిరుగులేని మద్దతు ఎల్లప్పుడూ మా సామర్థ్యాన్ని అత్యుత్తమ ప్రదర్శన చేయడానికి మా అందరినీ ప్రోత్సహిస్తుంది” అని అన్నారు.

గరుడ ఏరోస్పేస్ గతంలో థేల్స్ (ఫ్రాన్స్), అగ్రోవింగ్ (ఇజ్రాయెల్), స్పిరిట్ ఏరోనాటిక్స్ (గ్రీస్) వంటి సంస్థలతో అంతర్జాతీయ భాగస్వామ్యాలతో సంతకం చేసింది. ఈ సహకారాలు సాంకేతికత బదిలీ, స్థానిక తయారీపై దృష్టి సారించాయని, తద్వారా ఖర్చులు తగ్గుతాయని, ప్రజలకు ఉపాధి అవకాశాలను కల్పిస్తాయని స్టార్టప్ ఒక ప్రకటనలో తెలిపింది. డిఫెన్స్ డ్రోన్ రంగంలోకి మారడం ద్వారా డిఫెన్స్ టెక్నాలజీలో విస్తరించాలని గరుడ లక్ష్యంగా పెట్టుకుంది. కంపెనీ డిఫెన్స్ అప్లికేషన్స్ కోసం డ్రోన్‌లను అభివృద్ధి చేయడంలో పని చేస్తోంది. రాబోయే రెండేళ్లలో రక్షణ రంగంలో మార్కెట్ లీడర్‌గా ఎదగాలని లక్ష్యంగా పెట్టుకుంది. 2015లో ఐదుగురు వ్యక్తుల బృందంతో మొదలైన గరుడ, 84 నగరాల్లో 400 డ్రోన్‌లు, 500 మంది పైలట్‌లతో 200 మంది సభ్యులతో కూడిన బృందంగా ఎదిగింది. ఇది 30 రకాల డ్రోన్‌లను తయారు చేస్తుంది. టాటా, గోద్రెజ్, అదానీ, రిలయన్స్, స్విగ్గీ, ఫ్లిప్‌కార్ట్, ఢిల్లీవేరీ, అమెజాన్, విప్రోలతో సహా 750 కంపెనీలకు తమ సేవలందించింది.

మరిన్ని క్రీడా వార్తల కోసం ఇక్కడ క్లిక్ చేయండి..