Smriti Mandhana : స్మృతి మంధాన విధ్వంసం.. 11 ఫోర్లు, సిక్సర్లతో ఒంటిచేత్తో గెలిపించిన స్టార్ ప్లేయర్
Smriti Mandhana : ది హండ్రెడ్ 2026లో స్మృతి మంధాన విధ్వంసం సృష్టించింది. 50 బంతుల్లో 88 పరుగులతో నాటౌట్‌గా నిలిచి మ్యాంచెస్టర్ సూపర్ జెయింట్స్‌కు అద్భుత విజయాన్ని అందించింది. ఆమె ఇన్నింగ్స్‌లో 7 ఫోర్లు, 4 సిక్సర్లు ఉండటం విశేషం.
Updated on: Jul 29, 2026 | 10:11 AM
Smriti Mandhana : ది హండ్రెడ్ 2026 మహిళల టోర్నమెంట్‌లో భారత మహిళా క్రికెట్ స్టార్ స్మృతి మంధాన తన బ్యాటింగ్‌తో ప్రత్యర్థి బౌలర్లకు చుక్కలు చూపించింది. సన్‌రైజర్స్ లీడ్స్, మ్యాంచెస్టర్ సూపర్ జెయింట్స్ జట్ల మధ్య జరిగిన 10వ మ్యాచ్‌లో స్మృతి మంధాన విధ్వంసకర ఇన్నింగ్స్ ఆడింది. ఓటమి అంచుల వరకు వెళ్లిన మ్యాచ్‌లో ఒంటిచేత్తో పోరాడి మ్యాంచెస్టర్ సూపర్ జెయింట్స్‌కు అద్భుతమైన విజయాన్ని అందించింది. ఈ ప్రతిష్టాత్మక టోర్నీలో మ్యాంచెస్టర్ జట్టు విజయానికి చేరువ చేయడంలో ఆమె ఇన్నింగ్స్ అత్యంత కీలకపాత్ర పోషించింది.
సన్‌రైజర్స్ లీడ్స్ భారీ స్కోరు
ఈ మ్యాచ్‌లో టాస్ గెలిచి మొదట బ్యాటింగ్ చేసిన సన్‌రైజర్స్ లీడ్స్ నిర్ణీత 100 బంతుల్లో 4 వికెట్ల నష్టానికి 142 పరుగుల భారీ స్కోరును నమోదు చేసింది. ఆ జట్టులో అనాబెల్ సుథర్లాండ్ 35 పరుగులతో టాప్ స్కోరర్‌గా నిలవగా, ఫోబ్ లిచ్‌ఫీల్డ్ 31 రన్స్, బ్రయోనీ స్మిత్ 26 రన్స్‌తో రాణించారు. ఆఖరి బంతుల్లో లారెన్ విన్‌ఫీల్డ్-హిల్ 17 రన్స్, డానీ గిబ్సన్ 18 రన్స్‌తో వేగంగా పరుగులు సాధించడంతో సన్‌రైజర్స్ లీడ్స్ జట్టు మ్యాంచెస్టర్ ముందు 143 పరుగుల సవాలుతో కూడిన లక్ష్యాన్ని ఉంచగలిగింది.
Sensational from Smriti Mandhana 🤯#TheHundred pic.twitter.com/5OLXfk8rwM
— The Hundred (@thehundred) July 28, 2026
మ్యాంచెస్టర్‌కు ఆరంభంలోనే బిగ్ షాక్
143 పరుగుల భారీ లక్ష్యంతో బరిలోకి దిగిన మ్యాంచెస్టర్ సూపర్ జెయింట్స్‌కు ప్రారంభంలోనే ఘోర పరాభవం ఎదురైంది. వరుసగా వికెట్లు కోల్పోతూ కేవలం 71 పరుగులకే 5 కీలక వికెట్లు కోల్పోయి తీవ్ర కష్టాల్లో పడింది. ఒక దశలో జట్టు తక్కువ స్కోరుకే ఆలౌట్ అయిపోయి మ్యాచ్ చేజారిపోతుందని భావించారు. ఒకవైపు సహచర బ్యాటర్లు పెవిలియన్ చేరుతున్నా, మరోవైపు స్మృతి మంధాన క్రీజులో కొండంత ధైర్యంతో నిలబడింది. ఏ ఒక్కరి నుంచి పెద్దగా మద్దతు లభించకపోయినా, ఆమె ఏమాత్రం వెరవకుండా ప్రత్యర్థి బౌలర్లపై ఎదురుదాడికి దిగింది.
ఒంటిచేత్తో మ్యాచ్ తిప్పేసిన స్మృతి
పరిస్థితి తీవ్ర ప్రతికూలంగా ఉన్నప్పటికీ స్మృతి మంధాన విపరీతమైన వేగంతో పరుగులు రాబట్టింది. ఆడుతున్నది వన్డే లేదా టి20 అన్నట్లుగా కేవలం 50 బంతుల్లోనే 88 పరుగులు చేసి నాటౌట్‌గా నిలిచింది. ఆమె తుఫాన్ ఇన్నింగ్స్‌లో 7 అద్భుతమైన ఫోర్లు, 4 భారీ సిక్సర్లు (మొత్తంగా 11 బౌండరీలు) ఉన్నాయి. స్మృతి మంధాన దెబ్బకి మ్యాంచెస్టర్ సూపర్ జెయింట్స్ జట్టు మరో 4 బంతులు మిగిలి ఉండగానే (96 బంతుల్లో) 6 వికెట్లు కోల్పోయి లక్ష్యాన్ని ఊదేసింది. కష్టమనుకున్న మ్యాచ్‌ను తన బ్యాటింగ్‌తో స్మృతి మంధాన అత్యంత సులువుగా ముగించేసింది.
మరిన్ని క్రీడా వార్తల కోసం ఇక్కడ క్లిక్ చేయండి..
