ముంబై ఇండియన్స్‌కు షాక్.. జట్టును వీడనున్న హార్దిక్ పాండ్యా.. టార్గెట్ టీం ఏదంటే?

Hardik Pandya Trade: ఐపీఎల్ 2026 సీజన్ నుంచి ముంబై ఇండియన్స్ నిష్క్రమించిన వేళ, ఆ జట్టు సారథి హార్దిక్ పాండ్యా భవిష్యత్తుపై పెద్ద ఎత్తున చర్చ జరుగుతోంది. వరుస పరాజయాలు, గాయాల సాకుతో మ్యాచ్‌లకు దూరం కావడం వంటి పరిణామాల మధ్య పాండ్యా మరో జట్టులోకి వెళ్తున్నారనే వార్తలు క్రీడా వర్గాల్లో సంచలనం సృష్టిస్తున్నాయి. ఈ క్రమంలో అసలు నిజమేంటో తాజా నివేదికలు స్పష్టం చేశాయి.

చెన్నై సూపర్ కింగ్స్ వైపు హార్దిక్ చూపు..?

ముంబై ఇండియన్స్ సారథి హార్దిక్ పాండ్యా త్వరలోనే చెన్నై సూపర్ కింగ్స్ జట్టులో చేరబోతున్నారనే ఊహాగానాలు గత కొద్ది రోజులుగా ఇంటర్నెట్‌లో విపరీతంగా చక్కర్లు కొడుతున్నాయి. మే 2వ తేదీన చెన్నైతో జరిగిన మ్యాచ్ ముగిసిన తర్వాత, ఆ జట్టు ముఖ్య కార్యనిర్వాహక అధికారి కాశీ విశ్వనాథన్‌తో పాండ్యా సుదీర్ఘంగా చర్చలు జరపడం ఈ అనుమానాలకు బలం చేకూర్చింది. గతంలో సంజూ శాంసన్ కూడా ఇలాగే చర్చలు జరిపి ఆ తర్వాత చెన్నై జట్టులోకి మారడంతో, ఇప్పుడు పాండ్యా కూడా అదే బాటలో పయనిస్తారని అభిమానులు భావిస్తున్నారు.

గాయంపై సందిగ్ధత.. ప్రాక్టీస్ వీడియో వైరల్..

ప్రస్తుతం పంజాబ్ కింగ్స్‌తో జరుగుతోన్న కీలక మ్యాచ్‌కు హార్దిక్ పాండ్యా, సూర్యకుమార్ యాదవ్ దూరమయ్యారు. గాయం కారణంగా పాండ్యా ఆడటం లేదని ఫ్రాంచైజీ చెబుతున్నప్పటికీ, సామాజిక మాధ్యమాల్లో ఆయన పోస్ట్ చేసిన ఒక వీడియో కొత్త చర్చకు దారితీసింది. రాత్రి సమయంలో నెట్స్‌లో ఎంతో వేగంగా, ఎటువంటి అసౌకర్యం లేకుండా బ్యాటింగ్ ప్రాక్టీస్ చేస్తూ ఆయన కనిపించాడు. దీంతో ఆయన నిజంగానే గాయపడ్డాడా లేక జట్టు యాజమాన్యంతో విభేదాల వల్లే పక్కన ఉంటున్నాడా అనే సందేహాలు తలెత్తాయి.

యాజమాన్యం స్పందన: ప్రస్తుతానికి ట్రేడ్ లేదు..

ఈ వివాదాల నేపథ్యంలో ప్రముఖ క్రీడా జర్నలిస్ట్ విజయ్ ఠాగూర్ కీలక విషయాలను వెల్లడించారు. ముంబై ఇండియన్స్ వర్గాల సమాచారం ప్రకారం, హార్దిక్ పాండ్యాను వేరే జట్టుకు విక్రయించే ఆలోచన ప్రస్తుతం యాజమాన్యానికి లేదు. ఆయన ఒంటరిగా ప్రాక్టీస్ చేస్తున్నప్పటికీ, జట్టు వైద్య బృందం నిరంతరం ఆయన ఆరోగ్యాన్ని పర్యవేక్షిస్తోందని సమాచారం. ప్రస్తుతానికి ముంబై జట్టు ప్లేఆఫ్స్ రేసు నుంచి తప్పుకున్నప్పటికీ, తమ సారథిని వదులుకోవడానికి వారు సిద్ధంగా లేరని నివేదికలు స్పష్టం చేస్తున్నాయి.

రోహిత్ శర్మ స్థానంలో కెప్టెన్‌గా బాధ్యతలు చేపట్టినప్పటి నుంచి హార్దిక్ పాండ్యా తీవ్ర విమర్శలను ఎదుర్కొంటున్నారు. అయితే, 2027 సీజన్ కోసం జరగబోయే వేలంలో ఏవైనా మార్పులు జరిగితే తప్ప, ప్రస్తుతానికి ఆయన ముంబై ఇండియన్స్ నీడలోనే కొనసాగనున్నారు. అభిమానులు ఎదురుచూస్తున్న ఈ ‘ట్రేడ్’ ప్రస్తుతానికి కేవలం ఊహాగానమే అని తెలుస్తోంది.