IPL History: ఒక్కరు కాదు బాబోయ్.. ఏకంగా నలుగురు.. ఐపీఎల్ హిస్టరీలో వింతగా ఔటైన ఆటగాళ్లు వీళ్లే..?

Angkrish Raghuvanshi Out: లక్నో సూపర్ జెయింట్స్ వర్సెస్ కోల్‌కతా నైట్ రైడర్స్ మధ్య జరిగిన 38వ మ్యాచ్‌లో ఈ వివాదం చోటుచేసుకుంది. ఇన్నింగ్స్ 5వ ఓవర్‌లో రఘువంశీ పరుగు కోసం ప్రయత్నించి, సగం దూరం వెళ్ళాక తన భాగస్వామి నిరాకరించడంతో వెనక్కి తిరిగాడు. అయితే, తిరిగి క్రీజులోకి వచ్చే క్రమంలో అతను తన పరుగు దిశను మార్చుకున్నాడని, కావాలనే ఫీల్డర్ విసిరిన బంతికి అడ్డుగా వెళ్ళాడని మూడో అంపైర్ భావించారు. రఘువంశీ 9 పరుగుల వద్ద ఉండగా అంపైర్ అతన్ని అవుట్‌గా ప్రకటించారు. ఈ నిర్ణయంపై కోల్‌కతా శిబిరం తీవ్ర అసహనం వ్యక్తం చేసింది.

ఐపీఎల్ చరిత్రలో గతంలో ఇలాగే అవుటైన ప్లేయర్లు వీళ్లే..

1. యూసుఫ్ పఠాన్ (కోల్‌కతా నైట్ రైడర్స్ – 2013): ఐపీఎల్ చరిత్రలో ఈ పద్ధతిలో అవుటైన మొదటి ఆటగాడు యూసుఫ్ పఠాన్. 2013లో పుణే వారియర్స్ ఇండియాతో జరిగిన మ్యాచ్‌లో పఠాన్ అద్భుతంగా ఆడుతున్నాడు. అయితే, పరుగు తీసే క్రమంలో బౌలర్ బంతిని అందుకునే ప్రయత్నం చేయగా, పఠాన్ తన కాలితో బంతిని పక్కకు నెట్టాడు. ఇది క్షేత్రరక్షణను అడ్డుకోవడమేనని భావించిన అంపైర్లు అతన్ని అవుట్‌గా ప్రకటించారు. ఆ మ్యాచ్‌లో కోల్‌కతా 7 పరుగుల తేడాతో ఓటమి పాలైంది.

2. అమిత్ మిశ్రా (ఢిల్లీ క్యాపిటల్స్ – 2019): 2019 ఎలిమినేటర్ మ్యాచ్‌లో ఢిల్లీ క్యాపిటల్స్, సన్‌రైజర్స్ హైదరాబాద్ జట్లు తలపడ్డాయి. ఉత్కంఠభరితంగా సాగుతున్న ఈ మ్యాచ్ చివరి ఓవర్‌లో అమిత్ మిశ్రా పరుగు కోసం ప్రయత్నిస్తూ పిచ్ మధ్యలో దిశ మార్చాడు. బౌలర్ ఖలీల్ అహ్మద్ విసిరిన బంతి వికెట్లకు తగలకుండా మిశ్రా అడ్డుగా వెళ్లడంతో అంపైర్లు అతనికి అవుట్ ఇచ్చారు. అయితే ఆ తర్వాత కీమో పాల్ ఫోర్ కొట్టి ఢిల్లీని గెలిపించాడు.

3. రవీంద్ర జడేజా (చెన్నై సూపర్ కింగ్స్ – 2024): గత ఏడాది రాజస్థాన్ రాయల్స్‌తో జరిగిన మ్యాచ్‌లో చెన్నై స్టార్ ఆల్ రౌండర్ రవీంద్ర జడేజా కూడా ఇదే రీతిలో అవుటయ్యాడు. రెండో పరుగు కోసం ప్రయత్నించి వెనక్కి తగ్గిన జడేజా, సంజూ శాంసన్ విసిరిన బంతికి అడ్డుగా పరుగెత్తాడు. జడేజా బంతిని చూస్తూనే తన దిశను మార్చుకున్నాడని థర్డ్ అంపైర్ నిర్ధారించి అవుట్ ఇచ్చారు. ఈ నిర్ణయం అప్పట్లో పెద్ద దుమారమే రేపింది.

4. అంగ్‌క్రిష్ రఘువంశీ (కోల్‌కతా నైట్ రైడర్స్ – 2026): తాజా వివాదంలో రఘువంశీ పేరు చేరింది. అయితే ఈ నిర్ణయంపై భిన్నాభిప్రాయాలు వ్యక్తమవుతున్నాయి. రఘువంశీ కేవలం క్రీజులోకి చేరడానికి మాత్రమే ప్రయత్నించాడని, పిచ్ దెబ్బతినకుండా ఉండేందుకే పక్కకు జరిగాడని అభిమానులు వాదిస్తున్నారు. కానీ అంపైర్లు మాత్రం నిబంధనలకే మొగ్గు చూపారు.

క్రికెట్‌లో బ్యాటర్లు అవుట్ కావడానికి అనేక మార్గాలు ఉన్నప్పటికీ, ‘అబ్స్ట్రక్టింగ్ ద ఫీల్డ్’ అనేది చాలా అరుదుగా కనిపిస్తుంది. ఆటగాళ్ల ఉద్దేశపూర్వక చర్యల వల్ల ఇలా జరుగుతుందని అంపైర్లు భావిస్తారు. ఐపీఎల్ వంటి భారీ వేదికపై ఇలాంటి నిర్ణయాలు మ్యాచ్ ఫలితాలను శాసించే అవకాశం ఉండటంతో, ఆటగాళ్లు పరుగు తీసే సమయంలో మరింత జాగ్రత్తగా ఉండాల్సిన అవసరం ఉంది.