PBKS vs GT: ముల్లన్‌పూర్‌లో ఢీ కొట్టనున్న టీ20లకు పనికిరానోళ్లు.. బీసీసీఐకి ఇచ్చిపడేసేందుకు ఇద్దరు రెడీ?

Punjab Kings vs Gujarat Titans, 4th Match: ఐపీఎల్‌లో నాలుగో మ్యాచ్ మంగళవారం పంజాబ్ కింగ్స్, గుజరాత్ టైటాన్స్ జట్ల మధ్య జరగనుంది. ముల్లన్‌పూర్‌లో జరిగే ఈ మ్యాచ్‌లో శుభ్‌మన్ గిల్, శ్రేయస్ అయ్యర్‌ల కెప్టెన్సీ అందరి దృష్టిని ఆకర్షించనుంది. గుజరాత్ టైటాన్స్, పంజాబ్ కింగ్స్ మధ్య జరిగే ఈ మ్యాచ్ కేవలం రెండు జట్ల మధ్య పోరు మాత్రమే కాదు, టీ20 అంతర్జాతీయ క్రికెట్‌లో తరచుగా పక్కనపెడుతోన్న ఇద్దరు భారత బ్యాట్స్‌మెన్‌ల మధ్య పోరాటం కూడా.

సంజు సామ్సన్‌కు అవకాశం కల్పించేందుకు, భారత టెస్ట్, వన్డే కెప్టెన్ శుభ్‌మన్ గిల్‌ను టీ20 ప్రపంచ కప్ జట్టు నుంచి తొలగించారు. భారత్ రికార్డు స్థాయిలో మూడో టీ20 ప్రపంచ కప్ గెలిచినప్పటికీ, ఈ ఐపీఎల్ సీజన్ గిల్‌కు కీలకమైనదిగా పరిగణిస్తున్నారు.

2023 నుంచి ఐపీఎల్‌లో గిల్ కంటే విరాట్ కోహ్లీ మాత్రమే ఎక్కువ పరుగులు చేశాడు. కానీ, ఇప్పుడు ప్రశ్న కేవలం చేసిన పరుగుల గురించే కాదు, స్ట్రైక్ రేట్ గురించి కూడా. గిల్ కెరీర్ టీ20 స్ట్రైక్ రేట్ సుమారు 138గా ఉంది. అయితే గత సీజన్‌లో 155కు పైగా స్ట్రైక్ రేట్‌తో బ్యాటింగ్ చేసి అతను పర్వాలేదనిపించాడు.

గుజరాత్ టైటాన్స్ 2022లో తమ తొలి సీజన్‌లోనే టైటిల్ గెలుచుకుని, అప్పటి నుంచి నిలకడగా రాణిస్తోంది. గత సంవత్సరం, ఈ జట్టు మూడవ స్థానంలో నిలిచింది. కానీ ఎలిమినేటర్‌లో ముంబై ఇండియన్స్‌ చేతిలో ఓడిపోయింది. గుజరాత్ జట్టుకు మరోసారి గిల్, సాయి సుదర్శన్‌ల ఓపెనింగ్ జోడీయే అతిపెద్ద బలంగా నిలవనుంది. గత సీజన్‌లో సాయి సుదర్శన్ 759 పరుగులు చేసి జట్టు తరపున అత్యధిక స్కోరర్‌గా నిలిచాడు.

మరోవైపు, పంజాబ్ కింగ్స్ విషయానికి వస్తే , మరోసారి చాలా వరకు కెప్టెన్ శ్రేయస్ అయ్యర్‌పైనే ఆధారపడి ఉంటుంది. శ్రేయస్ ఐపీఎల్‌లో అత్యంత నమ్మకమైన కెప్టెన్‌లలో ఒకడిగా నిలిచాడు. మూడు వేర్వేరు జట్లను ఫైనల్స్‌కు నడిపించాడు. అతను 2020లో ఢిల్లీ క్యాపిటల్స్‌కు, 2024లో కోల్‌కతా నైట్ రైడర్స్‌కు, గత సీజన్‌లో పంజాబ్ కింగ్స్‌కు నాయకత్వం వహించాడు.

గత సీజన్‌లో శ్రేయస్ 604 పరుగులు చేసి, 175కు పైగా స్ట్రైక్ రేట్‌తో టాప్ 10 రన్-స్కోరర్లలో అత్యధిక స్కోరర్‌గా నిలిచాడు. అయినప్పటికీ, అతనికి ఆసియా కప్, టీ20 ప్రపంచ కప్‌లలో చోటు దక్కలేదు.

గత సీజన్‌లో ఫైనల్‌కు చేరినప్పటికీ, న్యూ చండీగఢ్‌లో ఆడిన ఐదు మ్యాచ్‌లలో కేవలం రెండు విజయాలు మాత్రమే సాధించిన పంజాబ్, ఈసారి తమ సొంతగడ్డ రికార్డును మెరుగుపరుచుకోవాలని చూస్తోంది.

స్క్వాడ్‌లు:

గుజరాత్ టైటాన్స్: సాయి సుదర్శన్, శుభ్‌మన్ గిల్(కెప్టెన్), జోస్ బట్లర్(కీపర్), గ్లెన్ ఫిలిప్స్, రాహుల్ తెవాటియా, ఎం షారుఖ్ ఖాన్, రవిశ్రీనివాసన్ సాయి కిషోర్, రషీద్ ఖాన్, కగిసో రబడ, మహ్మద్ సిరాజ్, ప్రసిధ్ కృష్ణ, ఇషాంత్ శర్మ, జయంత్ యాదవ్, జాసెన్ హోల్డర్, ల్యూక్ వుడ్, వాషింగ్టన్ సుందర్, టామ్ బాంటన్, కుల్వంన్త్ కేజ్రోలియా, అనుజ్ రావత్, మానవ్ సుతార్, కుమార్ కుషాగ్రా, అర్షద్ ఖాన్, గుర్నూర్ బ్రార్, నిశాంత్ సింధు, అశోక్ శర్మ.

పంజాబ్ కింగ్స్: ప్రియాంష్ ఆర్య, ప్రభ్‌సిమ్రాన్ సింగ్(కీపర్), శ్రేయాస్ అయ్యర్(కెప్టెన్), అజ్మతుల్లా ఒమర్జాయ్, మార్కస్ స్టోయినిస్, శశాంక్ సింగ్, సూర్యాంశ్ షెడ్జ్, బెన్ ద్వార్షుయిస్, యుజ్వేంద్ర చాహల్, అర్ష్‌దీప్ సింగ్, మార్కో జాన్సెన్, విజయ్‌కుమార్ వైషక్, లాకీ ఫెర్గూసెన్, విష్ణు వినోద్, ప్రవీణ్ దుబే, బార్లెట్, యశ్ ఠాకూర్, నెహాల్ వధేరా, హర్‌ప్రీత్ బ్రార్, కూపర్ కొన్నోలీ, మిచెల్ ఓవెన్, హర్నూర్ సింగ్, ముషీర్ ఖాన్, పైలా అవినాష్, విశాల్ నిషాద్.