IPL 2023: అప్పుడు కోహ్లీని భయపెట్టాడు.. ఇప్పుడు 4 ఓవర్లలోనే మ్యాచ్ స్వరూపాన్ని మార్చేశాడు.. ఎవరంటే?
అందరి అంచనాలను తారుమారు చేస్తూ.. ఈ ఐపీఎల్ సీజన్‌లో వరుసగా రెండో విజయాన్ని అందుకుంది పంజాబ్ కింగ్స్..
Updated on: Apr 06, 2023 | 9:34 AM
అందరి అంచనాలను తారుమారు చేస్తూ.. ఈ ఐపీఎల్ సీజన్‌లో వరుసగా రెండో విజయాన్ని అందుకుంది పంజాబ్ కింగ్స్. శిఖర్ ధావన్ సారథ్యంలోని ఈ జట్టు తమ తొలి మ్యాచ్‌లో కోల్‌కతా నైట్ రైడర్స్‌ను ఓడించగా.. బుధవారం రాజస్థాన్ రాయల్స్‌తో జరిగిన మ్యాచ్‌లో 5 పరుగుల తేడాతో ఘన విజయాన్ని అందుకుంది. ఆ ఫ్రాంచైజీకి చెందిన ముగ్గురు కీలక ఆటగాళ్లు ఈ గెలుపులో భాగస్వాములు కాగా.. వారిలో ఓ బౌలర్ గురించి మాత్రం ఇప్పుడు మాట్లాడుకోవాలి. ఇతడు తన టీ20 అరంగేట్ర మ్యాచ్‌లో హ్యాట్రిక్ సాధించాడు.. ఆ తర్వాత విరాట్ కోహ్లీని బెంబేలెత్తించాడు. ఇక ఇప్పుడు పంజాబ్ వైపుకి గేమ్‌ని 4 ఓవర్లలో తిప్పేశాడు. అతడు మరెవరో కాదు ఆస్ట్రేలియా బౌలర్ నాథన్ ఎల్లిస్.
ఏప్రిల్ 5వ తేదీ బుధవారం గువాహటిలో రాజస్థాన్ రాయల్స్‌తో పంజాబ్ కింగ్స్ తలబడింది. ఈ మ్యాచ్‌లో తొలుత బ్యాటింగ్ చేసిన పంజాబ్ నిర్ణీత ఓవర్లకు 197 పరుగులు చేసింది. ఎంత భారీ స్కోర్ నమోదు చేసినప్పటికీ.. రాజస్థాన్ బ్యాటింగ్‌కి ముందు తక్కువనే చెప్పాలి. ఆ జట్టులో జోస్ బట్లర్, సంజూ శాంసన్, షిమ్రాన్ హెట్మెయర్ లాంటి హిట్టర్లు చాలామంది ఉన్నారు. అటు పంజాబ్ బౌలింగ్ కూడా బలహీనంగా కనిపించింది. కానీ ఎల్లిస్ మాత్రం మ్యాచ్‌ను క్షణాల్లో మలుపు తిప్పేశాడు.
4 ఓవర్లలో ఆట మారింది..
రాజస్థాన్ ఆరంభాన్ని బౌలర్ అర్ష్‌దీప్ సింగ్ ఇన్నింగ్స్ మొదట్లోనే చెడగొట్టాడు. తన మొదటి ఓవర్‌లోనే ఓపెనర్ జైస్వాల్‌ను 11 పరుగులకు పెవిలియన్ చేర్చాడు. ఆ తర్వాత మరో ఓవర్లో అశ్విన్‌ను డకౌట్‌ చేశాడు. ఆ తర్వాత బట్లర్‌తో బరిలోకి దిగిన శాంసన్ బౌండరీలతో చెలరేగగా.. ఐదో ఓవర్లో బౌలింగ్‌కు వచ్చిన ఎల్లిస్.. నాలుగో బంతికే మ్యాచ్ స్వరూపాన్ని మార్చేశాడు. విధ్వంసకర బ్యాటర్ బట్లర్(19)ను ఔట్ చేసి.. పంజాబ్‌కు కీలక వికెట్‌ను అందించాడు.
ఆ తర్వాత రెండో ఓవర్లో ప్రమాదకరమైన సంజూ శాంసన్(42), మూడో ఓవర్లో పరాగ్(20), పడిక్కల్(21)ను పెవిలియన్ చేర్చి.. పంజాబ్ విజయంలో కీలక పాత్ర పోషించాడు. ఇదిలా ఉంటే.. ఈ మ్యాచ్‌కు ముందు, ఎల్లిస్‌కు ఐపీఎల్‌లో పెద్దగా అవకాశాలు రాలేదు. అయితే ఈ ప్రదర్శనతో అతడు జట్టులో స్థానాన్ని తప్పకుండా ఖాయం చేసుకోవచ్చు అనే చెప్పాలి. ఐపీఎల్‌లో నాథన్ ఎల్లిస్‌కి ఇది మూడో సీజన్. మెగా వేలంలో అతడిని పంజాబ్ రూ.75 లక్షలకు కొనుగోలు చేసింది.
టీ20 అరంగేట్రంలోనే హ్యాట్రిక్..
ఈ రైట్ ఆర్మ్ ఆస్ట్రేలియా పేసర్ 2021లో టీ20ల్లోకి అరంగేట్రం చేశాడు. బంగ్లాదేశ్‌తో జరిగిన ఆ మ్యాచ్‌లో ఎల్లిస్ చివరి ఓవర్లో హ్యాట్రిక్ సాధించి చరిత్ర సృష్టించాడు. అలాగే గత నెలలో భారత్‌తో జరిగిన రెండో వన్డేలో విరాట్ కోహ్లీ, రవీంద్ర జడేజా వంటి స్టార్ ప్లేయర్స్‌ను ఔట్ చేశాడు ఎల్లిస్. అతడు ఇప్పటివరకు ఆస్ట్రేలియా తరఫున 5 టీ20 మ్యాచ్‌లు ఆడి 15 వికెట్లు పడగొట్టాడు.
