On This Day: 9 ఫోర్లు, 5 సిక్సులతో సెంచరీ.. ఎడారిలో బౌండరీల తుఫాన్.. మ్యాచ్ ఓడినా భారత్ను ఫైనల్ చేర్చిన సచిన్.. వీడియో
Sachin Tendulkar: మాస్టర్ బ్లాస్టర్ సచిన్ టెండూల్కర్ 25 ఏళ్ల క్రితం ఈరోజున (ఏప్రిల్ 22) ఆస్ట్రేలియాపై 143 పరుగులతో తుఫాను ఇన్నింగ్స్ ఆడాడు. ఈ చిరస్మరణీయ ఇన్నింగ్స్లో సచిన్ తొమ్మిది ఫోర్లు, ఐదు సిక్సర్లు కొట్టాడు. సచిన్ ఈ ఇన్నింగ్స్ను 'డెసర్ట్ స్టార్మ్' అని కూడా పిలుస్తుంటారు.
Updated on: Apr 22, 2023 | 5:39 PM
క్రికెట్ దేవుడిగా పేరుగాంచిన సచిన్ టెండూల్కర్ భారత జట్టు కోసం ఎన్నో చిరస్మరణీయ ఇన్నింగ్స్లు ఆడాడు. 1998లో షార్జా మైదానంలో అంటే 25 ఏళ్ల క్రితం (ఏప్రిల్ 22) ఇదే రోజున ఆస్ట్రేలియా జట్టుపై సచిన్ టెండూల్కర్ 131 బంతుల్లో 143 పరుగులతో తుఫాను ఇన్నింగ్స్ ఆడాడు. ఈ చిరస్మరణీయ ఇన్నింగ్స్లో సచిన్ తొమ్మిది ఫోర్లు, ఐదు సిక్సర్లు బాదాడు.
సచిన్ టెండూల్కర్ ఈ ఇన్నింగ్స్ను ‘డెసర్ట్ స్టార్మ్’ అని కూడా పిలుస్తుంటారు. టీమిండియా 285 పరుగుల లక్ష్యాన్ని ఛేదిస్తున్న సమయంలో షార్జాలో ఇసుక తుఫాను వచ్చి మ్యాచ్ను కొంతసేపు నిలిపివేసింది. తుఫాను ఆగగానే మైదానంలోకి ‘సచిన్ టెండూల్కర్’ అనే భారీ బౌండరీల తుఫాన్ వచ్చి ఆస్ట్రేలియన్ జట్టు మొత్తాన్ని ఉలిక్కిపడేలా చేసింది.
సచిన్ టెండూల్కర్ సౌరవ్ గంగూలీతో కలిసి ఓపెనర్లుగా బరిలోకి దిగారు. ఆస్ట్రేలియన్ బౌలర్లను సచిన్ ఆడటం ప్రారంభించిన తీరు, అతని ఉద్దేశం స్పష్టంగా కనిపించింది. షేన్ వార్న్, మైఖేల్ కాస్ప్రోవిచ్, స్టీవ్ వా, టామ్ మూడీలను ఎవ్వరినీ విడిచిపెట్టలేదు. ఫోర్లు, సిక్సర్లతో చితక బాదాడు. ఈ మ్యాచ్లో భారత జట్టు ఓడిపోయినప్పటికీ, నెట్ రన్-రేట్ ఆధారంగా, ఫైనల్స్కు చేరుకుంది.
మైఖేల్ బెవాన్ సెంచరీ ఇన్నింగ్స్..
కోకాకోలా కప్లో భాగంగా భారత్, ఆస్ట్రేలియా, న్యూజిలాండ్ జట్ల మధ్య ఈ సిరీస్ జరిగింది. ఆరో మ్యాచ్లో బ్యాటింగ్కు దిగిన ఆస్ట్రేలియా నిర్ణీత 50 ఓవర్లలో 7 వికెట్ల నష్టానికి 284 పరుగులు చేసింది. మైఖేల్ బెవాన్ 103 బంతుల్లో 9 ఫోర్ల సాయంతో అజేయంగా 101 పరుగులు చేశాడు. అదే సమయంలో మార్క్ వా 81 పరుగుల కీలక సహకారం అందించాడు. ఇందులో ఏడు ఫోర్లు, రెండు సిక్సర్లు ఉన్నాయి. భారత్ తరపున వెంకటేష్ ప్రసాద్ అత్యధికంగా రెండు వికెట్లు తీశాడు.
ఇసుక తుఫాను కారణంగా భారత్కు 46 ఓవర్లలో 276 పరుగుల విజయలక్ష్యాన్ని సవరించారు. అయితే, భారత జట్టు 46 ఓవర్లలో 5 వికెట్లకు 250 పరుగులు మాత్రమే చేయగలిగింది. ఈ మ్యాచ్లో 26 పరుగుల తేడాతో ఓడిపోయింది. అయితే ఫైనల్కు అర్హత సాధించేందుకు భారత్కు 46 ఓవర్లలో 238 పరుగులు మాత్రమే అవసరమైంది.
విశేషమేమిటంటే, ఏప్రిల్ 24న తన 25వ పుట్టినరోజున ఆస్ట్రేలియాతో జరిగిన ఫైనల్లో సచిన్ టెండూల్కర్ 134 పరుగులతో మెరుపు ఇన్నింగ్స్ ఆడాడు. సచిన్ అద్భుత ఇన్నింగ్స్తో, కంగారూ జట్టును ఆరు వికెట్ల తేడాతో ఓడించి కోకాకోలా కప్ను భారత్ కైవసం చేసుకుంది.
మరిన్ని క్రీడా వార్తల కోసం ఇక్కడ క్లిక్ చేయండి..
