WTC 2023: కేఎల్ రాహుల్‌ను భర్తీ చేసే ఆటగాళ్లు వీరే.. శాంసన్‌కు ఛాన్స్.. లిస్టులో ఎవరున్నారంటే?
WTC Final 2023: ఇంగ్లాండ్‌లోని లండన్‌లోని కెన్నింగ్టన్ ఓవల్‌లో జూన్ 7 నుంచి 11 వరకు భారత్ వర్సెస్ ఆస్ట్రేలియా మధ్య WTC ఫైనల్ మ్యాచ్ జరగనుంది. రాహుల్ గైర్హాజరీతో.. ఆయన స్థానంలో ఎవరిని జట్టులోకి తీసుకుంటారోనని అంతా ఎదురుచూస్తున్నారు.
Updated on: May 05, 2023 | 8:40 PM
IND vs AUS: గత సీజన్‌లో అరంగేట్రం చేసిన ఐపీఎల్ ఫ్రాంచైజీ లక్నో సూపర్ జెయింట్‌కు భారీ ఎదురుదెబ్బ తగిలింది. ఎల్‌ఎస్‌జీ కెప్టెన్ కేఎల్ రాహుల్ గాయం కారణంగా మొత్తం సీజన్‌కు దూరంగా ఉన్నాడు. ఈ విషయాన్ని రాహుల్ సోషల్ మీడియా ద్వారా తెలియజేశారు. ఆర్‌సీబీతో మ్యాచ్‌లో ఫీల్డింగ్ చేస్తున్న సమయంలో రాహుల్ తీవ్రంగా గాయపడ్డాడు. ఆ తర్వాత చివరిగా బ్యాటింగ్‌కు వచ్చిన అతను ఒక్క పరుగు కూడా చేయలేకపోయాడు. చెన్నై సూపర్ కింగ్స్‌తో జరిగిన మ్యాచ్‌లో అతను 11 పరుగుల వద్ద ఔట్ అయ్యాడు. అతని గైర్హాజరీతో కృనాల్ పాండ్యా కెప్టెన్సీని చేపట్టాడు.
ఈ క్రమంలోనే గాయం కారణంగా రాహుల్ ప్రపంచ టెస్ట్ ఛాంపియన్‌షిప్ ఫైనల్‌కు దూరమవుతున్నట్లు స్వయంగా ప్రకటించాడు. ఇంగ్లాండ్‌లోని లండన్‌లోని కెన్నింగ్టన్ ఓవల్‌లో జూన్ 7 నుంచి 11 వరకు భారత్ వర్సెస్ ఆస్ట్రేలియా మధ్య WTC ఫైనల్ మ్యాచ్ జరగనుంది. దీంతో ప్రస్తుతం బీసీసీఐ ఆందోళనలో నిలచింది. రాహుల్ స్థానంలో ఎవరిని జట్టులోకి తీసుకుంటారోనని అంతా ఎదురుచూస్తున్నారు. కేఎల్ రాహుల్ స్థానంలో వీరికి ఛాన్స్ దక్కే అవకాశం ఉంది. వారెవరో ఇప్పుడు చూద్దాం..
ఇషాన్ కిషన్..
ఐపీఎల్‌లో వికెట్ కీపర్ బ్యాట్స్‌మెన్ ఇషాన్ కిషన్ బ్యాట్ ఘాటుగా మాట్లాడుతోంది. పంజాబ్ కింగ్స్‌పై 41 బంతుల్లో 75 పరుగులు చేశాడు. 9 మ్యాచ్‌ల్లో 286 పరుగులు చేశాడు. అదే సమయంలో తన కెరీర్‌లో ఇప్పటివరకు 14 ODIలు, 27 T20 ఇంటర్నేషనల్స్ ఆడాడు. వన్డేల్లో 510 పరుగులు, టీ20ల్లో 653 పరుగులు చేశాడు. వన్డేల్లోనూ డబుల్ సెంచరీ సాధించాడు. అతను ఆస్ట్రేలియాతో జరిగిన బోర్డర్ గవాస్కర్ ట్రోఫీ కోసం టెస్ట్ జట్టులో మొదటిసారిగా చేరాడు. కానీ, అతను తన టెస్ట్ అరంగేట్రం చేయలేకపోయాడు.
సంజు శాంసన్..
WTC ఫైనల్‌కు రాహుల్ స్థానంలో రాజస్థాన్ రాయల్స్ కెప్టెన్ సంజూ శాంసన్ కూడా రావొచ్చు. దేశవాళీ క్రికెట్‌లో ఎంతో అనుభవం ఉన్న సంజూ.. టీమిండియా తరపున పరిమిత ఓవర్ల క్రికెట్ మాత్రమే ఆడాడు. సంజూకు టీమ్ ఇండియాకు తగిన అవకాశాలు రావడం లేదని అభిమానులు ఎప్పటినుంచో ఫిర్యాదు చేస్తున్నారు. భారత మాజీ వికెట్ కీపర్ ధోనీలానే సంజు కూడా మైదానంలో ప్రశాంతంగా ఉంటాడు. 17 టీ20 ఇంటర్నేషనల్స్‌లో 301 పరుగులు, 11 వన్డేల్లో 330 పరుగులు చేశాడు.
జితేష్ శర్మ..
ఐపీఎల్ ప్రదర్శనతో తనదైన ముద్ర వేసిన జితేష్ శర్మ.. భారీ ఇన్నింగ్స్‌లు ఆడడంలో విఫలమై ఉండవచ్చు. కానీ, అతను ఖచ్చితంగా కొన్ని తుఫాన్ ఇన్నింగ్స్‌లతోపాటు మ్యాచ్ విన్నింగ్ నాక్స్ ఆడాడు. అతను ఇంకా టీమ్ ఇండియాకు అరంగేట్రం చేయలేదు. తన ఆటతీరుతో టీమిండియాలోకి ఎంట్రీ ఇచ్చే అవకాశం ఉంది. జితేష్ తన కెరీర్‌లో ఇప్పటివరకు 22 ఐపీఎల్ మ్యాచ్‌లు ఆడాడు. ఈ సమయంలో, అతను 20 ఇన్నింగ్స్‌లలో 27.82 సగటు, 164.81 స్ట్రైక్ రేట్‌తో 473 పరుగులు చేశాడు.
సూర్యకుమార్ యాదవ్..
ఐపీఎల్ ఆరంభ మ్యాచ్‌ల్లో ఫామ్‌తో సతమతమవుతున్న సూర్య.. తిరిగి పాంలోకి వచ్చాడు. గత కొన్ని మ్యాచ్‌ల్లో అతను ఒకటి కంటే ఎక్కువ అద్భుతమైన ఇన్నింగ్స్‌లు ఆడాడు. పంజాబ్ కింగ్స్‌పై 31 బంతుల్లో 66 పరుగులు, రాజస్థాన్‌పై 29 బంతుల్లో 55 పరుగులు చేశాడు. డబ్ల్యూటీసీ ఫైనల్‌లో చోటు దక్కించుకుంటే మిడిల్ ఆర్డర్‌ను బలోపేతం చేయవచ్చు. అతను 1 టెస్టులో 1 ఇన్నింగ్స్‌లో 8 పరుగులు మాత్రమే చేశాడు.
మరిన్ని క్రీడా వార్తల కోసం ఇక్కడ క్లిక్ చేయండి..
