Babar Azam: కింగ్ కోహ్లీ రికార్డును బ్రేక్ చేసిన బాబర్ ఆజం.. నెక్ట్స్ టార్గెట్ రోహిత్ శర్మ
ఆస్ట్రేలియాతో జరిగిన టీ20 సిరీస్‌లో పాకిస్థాన్ ఓడిపోయినప్పటికీ, అంతర్జాతీయ టీ20 ల్లో విరాట్ కోహ్లీ పేరిట ఉన్న అరుదైన రికార్డును మాజీ కెప్టెన్ బాబర్ ఆజం బద్దలు కొట్టాడు. మూడో టీ20 మ్యాచ్‌లో 41 పరుగుల ఇన్నింగ్స్ ఆడి కోహ్లీ రికార్డును బాబర్ బద్దలు కొట్టాడు. ఇప్పుడు నెక్ట్స్ రోహిత్ శర్మ రికార్డుపై కన్నేశాడు.
Updated on: Nov 18, 2024 | 11:22 PM
ఆస్ట్రేలియా-పాకిస్థాన్ జట్ల మధ్య జరిగిన మూడు టీ20ల సిరీస్‌లో పాక్ జట్టు వైట్‌వాష్‌కు గురైంది. సోమవారం (నవంబర్ 18) జరిగిన మూడో మ్యాచ్‌లో పాకిస్థాన్‌కు చిత్తుచేసిన ఆసీస్ వన్డే సిరీస్ ఓటమికి ప్రతీకారం తీర్చుకుంది. అయితే సిరీస్ ఓటమి పాలైనప్పటికీ.. కింగ్ కోహ్లీ అరుదైన రికార్డును పాకిస్థాన్ మాజీ కెప్టెన్ బాబర్ ఆజం బద్దలు కొట్టాడు. ఇరు జట్ల మధ్య జరిగిన మూడో టీ20 మ్యాచ్‌లో జట్టు తరఫున ఒంటరి పోరాటం చేసిన బాబర్ అద్భుతంగా బ్యాటింగ్ చేసి 28 బంతుల్లో 41 పరుగులతో వేగంగా ఇన్నింగ్స్ ఆడాడు. ఓపెనింగ్ బ్యాటర్ గా మైదానంలోకి దిగిన బాబర్ తన ఇన్నింగ్స్‌లో నాలుగు బౌండరీలు బాదాడు. ఈ ఇన్నింగ్స్ కారణంగా ఇంతకాలం కోహ్లీ పేరిట ఉన్న ఈ రికార్డు ఇప్పుడు బాబర్ ఖాతాలో చేరింది. ఆసీస్‌తో జరిగిన మూడో టీ20 మ్యాచ్‌లో 41 పరుగులతో ఇన్నింగ్స్ ఆడిన బాబర్.. ఇప్పుడు అంతర్జాతీయ టీ20 క్రికెట్‌లో అత్యధిక పరుగులు చేసిన బ్యాటర్ల జాబితాలో రెండో స్థానంలో నిలిచాడు. బాబర్ ఇప్పటివరకు టీ20 క్రికెట్‌లో 4192 పరుగులు చేసి విరాట్ కోహ్లీని అధిగమించాడు. కోహ్లి టీ20లో మొత్తం 4188 పరుగులు చేశాడు.
ఈ మ్యాచ్‌లో ఓపెనింగ్ బ్యాట్స్‌మెన్‌గా మైదానంలోకి దిగిన బాబర్ ఆరంభం నుంచే బ్యాటింగ్ చేసి పవర్‌ప్లేను పూర్తిగా సద్వినియోగం చేసుకున్నాడు. బాబర్ 146 స్ట్రైక్ రేట్‌తో ఆడి 28 బంతుల్లో 41 పరుగులు చేశాడు. అయితే, బాబర్ మరోసారి ఆడమ్ జంపా చేతిలో బలయ్యాడు. ప్రస్తుతం విరాట్ కోహ్లీ రికార్డును బద్దలు కొట్టిన బాబర్.. ఇప్పుడు రోహిత్ శర్మ ఆల్ టైమ్ రికార్డుపై కన్నేశాడు. నిజానికి టీ20 ఇంటర్నేషనల్‌లో అత్యధిక పరుగులు చేసిన రికార్డు రోహిత్ శర్మ పేరిట ఉంది. అంతర్జాతీయ క్రికెట్‌లో రోహిత్ 4231 పరుగులు చేశాడు. ఇప్పుడు, బాబర్ తదుపరి సిరీస్‌లో కేవలం 40 పరుగులు చేస్తే, అతను T20Iలలో అత్యధిక పరుగులు చేసిన ప్రపంచంలోనే మొదటి బ్యాట్స్‌మెన్‌గా అవుతాడు. రోహిత్ శర్మ మరియు విరాట్ కోహ్లీ ఇప్పటికే ఫార్మాట్ నుండి రిటైర్ అయినందున, ఈ రికార్డును బద్దలు కొట్టడం బాబర్‌కు పెద్ద కష్టమేమీ కాదు.
మరిన్ని క్రీడా వార్తల కోసం ఇక్కడ క్లిక్ చేయండి..
