Virat Kohli : ఐపీఎల్ చరిత్రలో సరికొత్త చరిత్ర.. విరాట్ కోహ్లీ 8730 పరుగుల వెనుక అసలు సీక్రెట్

Virat Kohli : క్రికెట్ ప్రపంచంలో రికార్డుల రారాజు విరాట్ కోహ్లీ గురించి ఎంత చెప్పినా తక్కువే. సాధారణంగా క్రీడాకారులకు వయసు పెరుగుతున్న కొద్దీ వేగం తగ్గుతుంది, ఆటలో పస తగ్గుతుంది అని అంటుంటారు. కానీ, కింగ్ కోహ్లీ విషయంలో మాత్రం ఇది పూర్తిగా ఉల్టా. ఐపీఎల్ (IPL) చరిత్రను తిరగేస్తే, వయసు పెరిగే కొద్దీ విరాట్ బ్యాట్ మరింత పదును దేలింది. పాతబడే కొద్దీ విరాట్ కోహ్లీ ఆట తీరు మరింత విస్ఫోటకమైంది. రన్స్ చేయాలనే అతని ఆకలి, ప్రత్యర్థి బౌలర్లను చిత్తు చేయాలనే కసి మునుపటి కంటే ఇప్పుడు రెట్టింపు అయ్యాయి.

8730 పరుగులు.. అప్రతిహత ప్రయాణం

విరాట్ కోహ్లీ ఐపీఎల్ ప్రయాణం ఒక అద్భుతం. ప్రస్తుతం 37 ఏళ్ల వయసులో ఉన్న కోహ్లీ, ఇప్పటివరకు 268 మ్యాచ్‌లు ఆడి 260 ఇన్నింగ్స్‌ల్లో ఏకంగా 8730 పరుగులు సాధించాడు. అతని ఓవరాల్ సగటు 39.86 కాగా, స్ట్రైక్ రేట్ 133.4 గా ఉంది. అయితే, ఈ గణాంకాలను వయసుల వారీగా విడదీసి చూస్తే.. కోహ్లీ ఆట తీరు ఎలా మారిందో, ఎంత మెరుగైందో స్పష్టంగా అర్థమవుతుంది. పాతబడే కొద్దీ కోహ్లీ బ్యాట్ లో వేగం పెరగడం అందరినీ ఆశ్చర్యపరుస్తోంది.

25 ఏళ్ల లోపు.. తడబాటుతో కూడిన ఆరంభం

విరాట్ కోహ్లీ కెరీర్ ఆరంభంలో, అంటే 25 ఏళ్ల లోపు ఐపీఎల్‌లో అంత గొప్ప గణాంకాలు ఏమీ లేవు. ఆ వయసులో అతను 2273 పరుగులు చేసినప్పటికీ, అతని సగటు కేవలం 31.56 మాత్రమే. స్ట్రైక్ రేట్ కూడా 124.1 వద్ద నిలిచిపోయింది. అప్పుడప్పుడే ఎదుగుతున్న ఆటగాడిగా కోహ్లీలో నిలకడ లోపించింది. కానీ, అదే కోహ్లీ భవిష్యత్తులో ఐపీఎల్ సామ్రాజ్యాన్ని శాసిస్తాడని అప్పుడు ఎవరూ ఊహించి ఉండరు.

25 నుంచి 30 ఏళ్ల మధ్య.. పరుగుల ప్రవాహం

కోహ్లీ తన కెరీర్‌లో అత్యధిక పరుగులు సాధించింది ఈ దశలోనే. 25 నుంచి 30 ఏళ్ల మధ్య విరాట్ ఐపీఎల్‌లో 2675 పరుగులు రాబట్టాడు. ఈ సమయంలో అతని సగటు అద్భుతమైన రీతిలో 46.92కి పెరిగింది. స్ట్రైక్ రేట్ కూడా 137 కు చేరుకుంది. ఈ దశలోనే కోహ్లీ తన అద్భుతమైన టెక్నిక్‌తో ప్రపంచ స్థాయి బ్యాటర్‌గా గుర్తింపు తెచ్చుకున్నాడు. పరుగుల వరద పారించినా, ఇప్పటి విరాట్ తో పోలిస్తే వేగం ఇంకాస్త తక్కువనే చెప్పాలి.

30 నుంచి 35 ఏళ్ల మధ్య.. స్వల్ప విరామం

అయితే 30 నుంచి 35 ఏళ్ల మధ్య కోహ్లీ ఫామ్ స్వల్పంగా తగ్గినట్టు కనిపిస్తుంది. ఈ ఐదేళ్ల కాలంలో విరాట్ 2315 పరుగులు చేశాడు. కానీ, అతని సగటు 35.07 కి పడిపోగా, స్ట్రైక్ రేట్ కూడా 128.5 కి తగ్గింది. కోహ్లీ కెరీర్‌లో ఇది కాస్త గడ్డు కాలం అని చెప్పవచ్చు. చాలా మంది విరాట్ పని అయిపోయింది అనుకున్నారు. కానీ, అక్కడే అసలు మలుపు తిరిగింది.

35 ఏళ్లు దాటాక.. అసలు సిసలు విశ్వరూపం

35 ఏళ్లు దాటిన తర్వాత విరాట్ కోహ్లీ బ్యాటింగ్ తీరు చూస్తుంటే.. అతను మళ్లీ తన యవ్వనంలోకి వెళ్ళాడా అన్న సందేహం కలుగుతుంది. గత రెండేళ్లుగా విరాట్ 61.12 సగటుతో ఏకంగా 1467 పరుగులు బాదాడు. ఇందులో అత్యంత విశేషం ఏమిటంటే.. అతని స్ట్రైక్ రేట్ ఏకంగా 151.1 గా ఉంది. అంటే, కెరీర్ ఆరంభంలో కంటే ఇప్పుడు కోహ్లీ మరింత వేగంగా, అత్యంత ప్రమాదకరంగా ఆడుతున్నాడు. అందుకే కింగ్ కోహ్లీ ఎప్పటికీ అన్‌స్టాపబుల్.

మరిన్ని క్రీడా వార్తల కోసం ఇక్కడ క్లిక్ చేయండి..