PAK vs SA : ఇదేం టీ20 రా బాబూ! టెస్ట్ మ్యాచ్ ఆడిన పాకిస్తాన్.. 55 బంతుల్లో ఒక్క రన్ కూడా రాలేదు

PAK v SA : పాకిస్తాన్, సౌతాఫ్రికా మధ్య జరిగిన మూడు మ్యాచుల టీ20 సిరీస్‌లో భాగంగా రావల్పిండి క్రికెట్ స్టేడియంలో జరిగిన మొదటి మ్యాచ్‌లో సౌతాఫ్రికా ఘన విజయం సాధించింది. ఈ మ్యాచ్‌లో పాకిస్తాన్ జట్టు అన్ని విభాగాల్లోనూ విఫలమై, దారుణంగా ఓడిపోయింది. ముఖ్యంగా బ్యాటింగ్‌లో పాకిస్తాన్ బ్యాట్స్‌మెన్ ఏకంగా 55 బంతుల్లో ఒక్క పరుగు కూడా చేయకుండా డాట్ బాల్స్ ఆడటం జట్టు ఓటమికి ప్రధాన కారణంగా నిలిచింది.

రావల్పిండి క్రికెట్ స్టేడియంలో జరిగిన మొదటి టీ20 మ్యాచ్‌లో సౌతాఫ్రికా జట్టు విజయం సాధించి సిరీస్‌లో 1-0 ఆధిక్యంలో నిలిచింది. ఈ మ్యాచ్‌లో సౌతాఫ్రికా జట్టు ఏకపక్షంగా గెలవగలిగింది. పాకిస్తాన్ జట్టు మాత్రం బౌలింగ్, బ్యాటింగ్‌లలో పూర్తిగా విఫలమైంది. టీ20 జట్టులోకి తిరిగి వచ్చిన కెప్టెన్ బాబర్ అజామ్ కనీసం తన ఖాతా తెరవకుండానే (డకౌట్) అవుట్ అయ్యాడు.

టాస్ గెలిచిన పాకిస్తాన్ బౌలింగ్ ఎంచుకోవడాన్ని సౌతాఫ్రికా జట్టు తప్పు అని నిరూపించింది. మొదట బ్యాటింగ్ చేసిన సౌతాఫ్రికా జట్టు 20 ఓవర్లలో 9 వికెట్ల నష్టానికి 194 పరుగులు చేసింది. ఓపెనర్ రీజా హెండ్రిక్స్ 40 బంతుల్లో 5 ఫోర్లు, 1 సిక్సర్‌తో సహా 60 పరుగుల మెరుపు ఇన్నింగ్స్ ఆడాడు. జార్జ్ లిండే 22 బంతుల్లో 36 పరుగులు, టోనీ డి జార్జి 16 బంతుల్లో 33 పరుగులు, క్వింటన్ డి కాక్ 23 పరుగులు చేసి జట్టు భారీ స్కోరుకు తోడ్పడ్డారు.

పాకిస్తాన్ బౌలర్లు పరుగులను నియంత్రించడంలో విఫలమయ్యారు, దాదాపు అందరి ఎకానమీ 10కి పైన ఉంది. పాకిస్తాన్ తరఫున మహ్మద్ నవాజ్ అత్యధికంగా 3 వికెట్లు, సైమ్ అయూబ్ 2 వికెట్లు తీశారు. ఈ ఇద్దరి బౌలర్లు మినహా మిగిలిన బౌలర్లందరి ఎకానమీ 10కి మించి ఉండటం గమనార్హం. ముఖ్యంగా షాహీన్ షా అఫ్రిది 4 ఓవర్లలో 45 పరుగులు, నసీమ్ షా 3 ఓవర్లలో 34 పరుగులు, అబ్రార్ అహ్మద్ 4 ఓవర్లలో 42 పరుగులు ఇచ్చారు.

195 పరుగుల భారీ లక్ష్యాన్ని చేధించడంలో పాకిస్తాన్ జట్టు పూర్తిగా తడబడింది. పాకిస్తాన్ జట్టు కేవలం 18.1 ఓవర్లలో 139 పరుగులకే ఆలౌట్ అయింది. సైమ్ అయూబ్ (37 పరుగులు), మహ్మద్ నవాజ్ (36 పరుగులు) మినహా మరే బ్యాట్స్‌మన్ కూడా 30 పరుగుల మార్కును అందుకోలేకపోయారు. బ్యాటింగ్‌లో పాకిస్తాన్ వైఫల్యానికి అతిపెద్ద కారణం డాట్ బాల్స్. ఈ ఇన్నింగ్స్‌లో పాకిస్తాన్ బ్యాటర్లు ఏకంగా 55 డాట్ బంతులను ఆడారు. ఏడుగురు బ్యాటర్లు రెండంకెల స్కోరు కూడా చేయలేకపోయారు.

మరిన్ని క్రీడా వార్తల కోసం ఇక్కడ క్లిక్ చేయండి..