బీజేపీ గూటికి మరో కాంగ్రెస్ నేత

న్యూఢిల్లీ: సార్వత్రిక ఎన్నికల తేదీలు కూడా ఖరారు కావడంతో ప్రధాన పార్టీల్లో నాయకుల చేరికలు ఊపందుకుంటున్నాయి. హర్యానాకు చెందిన కాంగ్రెస్ మాజీ ఎంపీ కర్నల్ అరవింద్ శర్మ బీజేపీ తీర్థం పుచ్చుకున్నారు. హర్యానా సీఎం మనోహర్ లాల్ కట్టర్ ఆధ్వర్యంలో బీజేపీ కండువా కప్పుకున్నారు. తన ఇష్ట పూర్వకంగా బీజేపీలో చేరానని.. బీజేపీలో చేరినందుకు తాను గర్విస్తున్నానని ఈ సందర్భంగా శర్మ చెప్పారు. పార్టీ ఎలాంటి బాధ్యత అప్పగించానా సంతోషంగా పని చేస్తానని తెలిపారు. కాగా.. యూపీఏ చైర్‌పర్సన్ సోనియాగాంధీకి సన్నిహితుడిగా పేరున్న టామ్ వడక్కన్ ఇంతకుముందే బీజేపీలో చేరారు. పుల్వామా దాడి అనంతరం కాంగ్రెస్ స్పందన కారణంగానే తాను పార్టీని వీడాల్సి వచ్చిందని వడక్కన్ చెప్పారు. కాగా, మరికొందరు కాంగ్రెస్ నేతలు కూడా బీజేపీలోకి చేరబోతున్నారని, అయితే వారెవరనేది చెప్పని కేరళ బీజేపీ అధ్యక్షుడు పీఎస్ శ్రీధరన్ పిళ్లై పేర్కొన్నారు. వడక్కన్ బీజేపీలో చేరడంపై కాంగ్రెస్ సైతం ఘాటుగానే స్పందించింది. వడక్కన్ పెద్ద నాయకుడేమీ కాదని రాహుల్ అన్నారు.