ఒక్కటే మండపం.. మతాధికారి నిఖా చేస్తే.. పూజారి ప్రదక్షిణలు చేయించారు.. ఎక్కడంటే?

ఉత్తరప్రదేశ్‌లోని సహరాన్‌పూర్ జిల్లాలో అనూహ్య ఘటన జరిగింది. ఒకే మండపంలో హిందూ ముస్లిం జంటలు పెళ్లితో ఒక్కటయ్యారు. ముఖ్యమంత్రి సామూహిక వివాహ పథకం కింద శుక్రవారం (డిసెంబర్ 12) 284 జంటలు కొత్త జీవితాన్ని ప్రారంభించారు. ఈ సామూహిక వివాహ పథకం ప్రత్యేకత ఏమిటంటే హిందూ, ముస్లిం వర్గాలకు చెందిన యువకులు, యువతుల వివాహాలు, నిఖాలు ఒకే మండపంలో జరిగాయి. ఒక పండితుడు మంత్రాలతో వివాహ ఆచారాలను నిర్వహించగా, ఒక మౌల్వి నిఖాను నిర్వహించారు. ఇద్దరు మత పెద్దలు ఈ చొరవను ప్రశంసించారు. ఇది సామాజిక సామరస్యానికి ఒక ఉదాహరణ అని పేర్కొన్నారు.

వధూవరులు, వారి కుటుంబ సభ్యులు ఆనందంలో మునిగిపోయారు. శుక్రవారం తమ జీవితంలో అత్యంత ప్రత్యేకమైన రోజు అని నూతన వధూవరులు అన్నారు. ప్రతి ఒక్కరికీ ప్రభుత్వం నుండి బహుమతులు, బట్టలు, గృహోపకరణాలు, పాత్రలు, ఇతర నిత్యావసరాలు లభించాయి. వివాహ బృందానికి, అతిథులకు విలాసవంతమైన భోజనం, ఫలహారాలు ఏర్పాటు చేశారు అధికారులు. బ్యాండ్ సంగీతం కార్యక్రమం అంతటా ప్రతిధ్వనించింది.

ఈ వివాహ వేడుకకు భారతీయ జనతా పార్టీ ఎమ్మెల్యే ముఖేష్ చౌదరి హాజరయ్యారు. ముఖ్యమంత్రి యోగి ప్రభుత్వం సమాజంలో అత్యంత అణగారిన వర్గాలకు ప్రయోజనం చేకూర్చడానికి కట్టుబడి ఉందని ఎమ్మెల్యే ముఖేష్ చౌదరి అన్నారు. 2017 కి ముందు కూతుళ్ల వివాహాలకు కేవలం 15,000 రూపాయలు మాత్రమే అందుబాటులో ఉండేవని, నేడు ప్రభుత్వం ఒక్కో కూతురికి లక్ష రూపాయలు ఖర్చు చేస్తోందని ఆయన వివరించారు. ఇప్పుడు మంత్రులు, ఎంపీలు, ఎమ్మెల్యేలు, అధికారులు పేద బాలికల వివాహాలకు స్వయంగా హాజరవుతున్నారు.

ఈ కార్యక్రమాన్ని గర్వకారణమైన రోజుగా అభివర్ణిస్తూ, ఒకే పండల్‌లో రెండు వర్గాల వివాహం సామాజిక ఐక్యతకు అద్భుతమైన ఉదాహరణ అని పండిట్‌జీ అన్నారు. నిఖా నిర్వహించిన మతాధికారి, ” యోగి ప్రభుత్వం అద్భుతమైన పని చేసింది. ప్రభుత్వం ఒక సమాజం కోసం మాత్రమే పనిచేస్తుందని చెప్పడం తప్పు. ప్రభుత్వం అందరి అభివృద్ధి కోసం పనిచేస్తోంది.” అని అన్నారు. వివాహ అతిథులకు ఆహారం, పానీయాలు, ఫలహారాల కోసం అధికారులు అన్ని ఏర్పాట్లు చేశారు.

మరిన్ని జాతీయ వార్తల కోసం ఇక్కడ క్లిక్ చేయండి..