Vaccination: కోవిడ్ వ్యాక్సిన్ ధరల విషయంలో కేంద్రం పునఃసమీక్షించాలి..కేంద్రానికి ఓ రేటు.. రాష్ట్రాలకు ఓ రేటు సరికాదు!
కరోనా కల్లోలం ఇప్పట్లో ఆగేలా కనిపించడం లేదు. కరోనాను ఎదుర్కోవడానికి విశ్వ ప్రయత్నాలు చేస్తున్నాయి ప్రభుత్వాలు. వ్యాక్సిన్ అందుబాటులోకి వచ్చినా, ఇంకా తగినంత ప్రజలకు చేరే అవకాశం కనిపించడం లేదు.
Updated on: May 04, 2021 | 7:52 AM
Vaccination: కరోనా కల్లోలం ఇప్పట్లో ఆగేలా కనిపించడం లేదు. కరోనాను ఎదుర్కోవడానికి విశ్వ ప్రయత్నాలు చేస్తున్నాయి ప్రభుత్వాలు. వ్యాక్సిన్ అందుబాటులోకి వచ్చినా, ఇంకా తగినంత ప్రజలకు చేరే అవకాశం కనిపించడం లేదు. ఈ నేపధ్యంలో వ్యాక్సిన్ కంపెనీలు కూడా ఇటీవల ధరలు పెంచుతూ నిర్ణయం తీసుకున్నాయి. ఇది మూలిగే నక్క మీద తాటిపండు పడ్డట్టు అయింది. కోవిడ్ టీకాల ధరలు కంపెనీలు పెంచేయడం.. స్టాక్ లేకపోవడం ప్రస్తుతం వ్యాక్సిన్ కోసం ఎదురుచూస్తున్న ప్రజలకు ఇబ్బందికరంగా మారింది. ఒక పక్క కరోనా కేసులు పెరిగిపోతుండటం.. మరోపక్క ఆశించినంత వేగంగా వ్యాక్సినేషన్ జరగకపోవడం ఆందోళన రేకెత్తిస్తోంది. ఈ సమయంలో కరోనా టీకా ధరలపై సుప్రీంకోర్టు స్పందించింది.
దేశంలో కరోనా వ్యాక్సిన్ ధరల విధానాన్ని పునఃసమీక్షించాలని కేంద్ర ప్రభుత్వానికి సుప్రీంకోర్టు సూచించింది. వ్యాక్సిన్ ధరల విధానం ప్రజల ఆరోగ్య హక్కుకు హాని కలిగిస్తుందని వ్యాఖ్యానించింది. కేంద్రానికి తక్కువ ధర, రాష్ట్ర ప్రభుత్వాలకు ఎక్కువ ధర వర్తించేలా టీకా తయారీదారులు రెండు వేర్వేరు ధరలు సూచించారని జస్టిస్ డీవై చంద్రచూడ్ నేతృత్వంలోని ధర్మాసనం అభిప్రాయపడింది. రాష్ట్ర ప్రభుత్వాల ఆర్థిక స్తోమత ఆధారంగా టీకా ఉచితంగా అందుబాటులో ఉంచాలా? వద్దా? అనేది ఆధారపడి ఉంటుందని సుప్రీంకోర్టు అభిప్రాయపడింది. అలా ఆధారపడితే అది దేశవ్యాప్తంగా అసమానతలు సృష్టిస్తుందన్న ధర్మాసనం.. పౌరులకు అందించే టీకాలు విలువైన ప్రజాప్రయోజనాన్ని కలిగిస్తాయని వ్యాఖ్యానించింది. బలహీనవర్గాలు, అట్టడుగు వర్గాలకు చెందిన వ్యక్తులకు టీకా కొనుగోలు చేసే సామర్థ్యం లేకపోవచ్చని పేర్కొంది. 18 నుంచి 44 ఏళ్ల వయసు గలవారికి వ్యాక్సిన్ను అందించేందుకు.. టీకా తయారీదారులతో రాష్ట్ర ప్రభుత్వాలు చర్చలు జరపవచ్చని సూచించింది.
ఇప్పుడు సుప్రీంకోర్టు సూచనల నేపధ్యంలో కేంద్ర ప్రభుత్వం వ్యాక్సిన్ ధరల విషయంలో మరోమారు పరిశీలన జరిపే అవకాశం ఉంటుందని పరిశీలకులు భావిస్తున్నారు. అలా అయితే, వ్యాక్సిన్ ధరలు తగ్గడం కానీ, కేంద్ర, రాష్ట్ర ప్రభుత్వాలకు ఒకే ధర ఉండేలా చూడటం కానీ, జరగవచ్చని చెబుతున్నారు. ఇలా జరిగితే టీకా కోసం ఎదురు చూస్తున్న కోట్లాదిమంది ప్రజలకు ఊరట లభించినట్టే.
ఇదిలా ఉండగా.. కరోనా వైరస్ వ్యాప్తి దేశంలో రికార్డు స్థాయిలో ఉంది. దేశంలో కరోనా రోగుల సంఖ్య 2 కోట్లు దాటింది. 20 మిలియన్లకు పైగా ప్రజలు సోకిన రెండవ దేశంగా భారతదేశం చేరింది.
Covid-19: పది రోజుల్లో పెళ్లి.. అంతలోనే విషాదం.. యువతిని పొట్టనబెట్టుకున్న కరోనా..
