సీఏఏ వివాదం.. మేం అధికారంలోకి వస్తే.. వారికి పింఛన్లు.. ఎస్పీ హామీ

పౌరసత్వ చట్టానికి నిరసనగా ఆందోళన చేసినవారికి.. తాము అధికారంలోకి వస్తే పింఛన్లు ఇస్తామని యూపీలోని  ప్రతిపక్ష సమాజ్ వాదీ పార్టీ హామీ ఇచ్చింది. అలాగే రాష్ట్రంలో ఈ చట్టానికి వ్యతిరేకంగా నిరసన తెలుపుతూ.. మరణించిన, లేదా జైలుపాలైన వారి కుటుంబాలకు పరిహారం కూడా చెల్లిస్తామని యూపీ అసెంబ్లీలో ప్రతిపక్ష నేత రామ్ గోవింద్ చౌదరి పేర్కొన్నారు. కేంద్రంలోను, ఈ రాష్ట్రంలోను మా పార్టీ అధికార పగ్గాలు చేబట్టిన పక్షంలో.. ఈ వెసులుబాటు కల్పిస్తామని ఆయన చెప్పారు. ఈ నిరసనకారులంతా ప్రజాస్వామ్యాన్ని, రాజ్యాంగాన్ని పరిరక్షించేందుకు కృషి చేశారని ఆయన ప్రశంసించారు. పాకిస్తాన్ లో హిందువులపై జరుగుతున్న అరాచకాలను తెలుసుకోవాలంటే సమాజ్ వాదీ పార్టీ చీఫ్ అఖిలేష్ యాదవ్ ఆ దేశంలో నెల రోజులపాటు ఉండాలన్న రాష్ట్ర బీజేపీ అధ్యక్షుడు స్వతంత్ర దేవ్ సింగ్ చేసిన వ్యాఖ్యలను ఆయన తేలిగ్గా కొట్టిపారేశారు. మోదీ ప్రభుత్వం వాస్తవ సమస్యల నుంచి ప్రజల దృష్టిని మళ్లించడానికి యత్నిస్తోందన్నారు. ‘ ఎవరు ప్రశ్నించినా వారిని పాకిస్తాన్ కు వెళ్లమంటున్నారు ‘ అని చౌదరి సెటైర్ వేశారు.

అటు-సమాజ్ వాదీ పార్టీపై యూపీ డిప్యూటీ సీఎం దినేష్ శర్మ మండిపడుతూ.. సంఘ వ్యతిరేక శక్తులను గౌరవిస్తామని చెప్పడం ఆ పార్టీ డీఎన్ఏ లోనే ఉందన్నారు. గతంలో ఉగ్రవాదులపై కేసులను ఉపసంహరింపజేసేందుకు ఆ పార్టీ యత్నించిందని, అయితే కోర్టులు జోక్యం చేసుకోవడంతో వారి ఆటలు సాగలేదని దినేష్ శర్మ అన్నారు.