బస్సులో ల్యాప్టాప్ తీసుకెళ్తే ఎక్స్‌ట్రా చార్జి.. రూ. 10 వసూలు చేసిన కండక్టర్..!
ఓ ప్రయాణికుడి వద్ద ల్యాప్టాప్ ఉండటం చూసిన కండక్టర్.. అదనంగా రూ.10 ఇవ్వాలని అడిగాడు. ఎందుకనడిగితే, కొత్తరూల్స్‌ వచ్చాయి, ఇవ్వాల్సిందేనని తేల్చిచెప్పాడు. లగేజీ 30 కిలోలు దాటితేనే ఇవ్వాలనుందని చెప్పినా, కండక్టర్ ఒప్పుకోలేదు.
బస్సులో ల్యాప్టాప్ తీసుకెళ్లాడని అదనంగా రూ.10 చార్జి విధించాడో కండక్టర్. ఈ ఆశ్చర్యకర సంఘటన కర్ణాటక ఆర్టీసీలో చోటుచేసుకొన్నది. ఓ ప్రయాణికుడు గడగ్‌నుంచి హుబ్లీకి ఆర్బీసీ బస్సు లో బయలుదేరాడు. అతడి వద్ద ల్యాప్టాప్ ఉండటం చూసిన కండక్టర్.. అదనంగా రూ.10 ఇవ్వాలని అడిగాడు. ఎందుకనడిగితే, కొత్తరూల్స్‌ వచ్చాయి, ఇవ్వాల్సిందేనని తేల్చిచెప్పాడు. లగేజీ 30 కిలోలు దాటితేనే ఇవ్వాలనుందని చెప్పినా, కండక్టర్ ఒప్పుకోలేదు. దీంతో ఆ ప్రయాణికుడు అదనంగా రూ.10 చెల్లించాల్సి వచ్చింది. ఈ ఘటనతో తోటి ప్రయాణికులు కూడా విస్తుపోయారు.
ప్రయాణికుడు ఓ ప్రైవేట్ మీడియాతో మాట్లాడుతూ… హుబ్లీ వైపు వెళుతుండగా బస్సులో పని చేసేందుకు ల్యాప్టాప్ ఆన్ చేశాడు. అది గమనించిన కండక్టర్ వచ్చి ల్యాప్టాప్ తీసుకెళ్లినందుకు 10 రూపాయలు అదనంగా ఇవ్వాలని అడిగాడు. కర్ణాటక రాష్ట్ర రోడ్డు రవాణా సంస్థ (KSRTC) జారీ చేసిన ఆర్డర్‌ను కూడా చూపించాడు. NWKRTCకి కూడా ఇది వర్తిస్తుంది. అయితే, ఆర్డర్‌లో 30 కిలోల పరిమితికి మించని ఉచిత బ్యాగేజీ అలవెన్సుల జాబితాలో ల్యాప్టాప్ గురించి ప్రస్తావించలేదని ప్రయాణీకుడు చెప్పారు.
దీని గురించి సదరు కండక్టర్‌ని సంప్రదించినప్పుడు, ప్రయాణ సమయంలో ల్యాప్‌టాప్‌లను ఉపయోగించే ప్రయాణికుల నుండి అదనంగా వసూలు చేయాలని రవాణా అధికారులు తనకు చెప్పారని అన్నాడు. అదనంగా డబ్బులు వసూలు చేయకుంటే జరిమానా కట్టాల్సి వస్తుందని తన దృష్టికి వచ్చిందన్నారు.
దీని గురించి ఎన్‌డబ్ల్యుకెఆర్‌టిసి ప్రతినిధిని అడిగినప్పుడు, ల్యాప్‌టాప్‌లకు అదనపు ఛార్జీలు విధించే నియమం లేదు. ల్యాప్టాప్ ప్రయాణీకుల సామానులో ఒక భాగం, ఎందుకంటే ఇది మొబైల్ ఫోన్ వంటి పరికరం. కాబట్టి అదనపు రుసుము వసూలు చేయబడదని వివరించారు.
ఈ విషయమై గడగ్ డిపో డివిజనల్ కంట్రోలర్ జి.సీనయ్య స్పందిస్తూ.. సర్క్యులర్ ప్రకారం టీవీ, రిఫ్రిజిరేటర్, డెస్క్‌టాప్ వంటి ఎలక్ట్రానిక్ పరికరాలకు యూనిట్ల సంఖ్య, దూరాన్ని బట్టి రూ.5 అదనంగా వసూలు చేస్తారు. అయితే, ల్యాప్‌టాప్‌లకు ఎలాంటి ఛార్జీ లేదు. ల్యాప్‌టాప్‌లకు అదనంగా వసూలు చేస్తున్నట్లు తేలితే వారిపై చర్యలు తీసుకుంటామని స్పష్టం చేశారు.
మరిన్ని ట్రెండింగ్ న్యూస్ కోసం ఇక్కడ క్లిక్ చేయండి
