‘కరోనా.. హైరానా’.. ఇరాన్ నుంచి తిరిగి వఛ్చిన 58 మంది భారతీయులు.

కరోనా వైరస్ తో సతమతమవుతున్న ఇరాన్ దేశం నుంచి 58 మంది భారతీయులు క్షేమంగా ఢిల్లీ సమీపంలోని ఘజియాబాద్ చేరుకున్నారు. భారత వైమానిక దళానికి చెందిన సీ-17 విమానంలో వీరంతా స్వదేశానికి చేరుకున్నట్టు విదేశాంగ మంత్రి ఎస్.జైశంకర్ తెలిపారు.. ‘మిషన్ కంప్లీట్’ అని ఆయన ట్వీట్ చేశారు. ఇరాన్ లో వందలాది భారతీయులు చిక్కుబడి ఉన్న సంగతి తెలిసిందే. ఇప్పటికే ఆ దేశంలో కరోనాకు గురై మరణించినవారి సంఖ్య 200 కు పెరిగింది. ఆ దేశం నుంచి భారతీయులను ఇక్కడికి చేర్చడం ఇది రెండోసారి. కాగా-గత నెల 27 న చైనా లోని వూహాన్ సిటీ నుంచి 76 మంది భారతీయులను భారత విమానంలో స్వదేశానికి చేర్చారు.

దేశంలో కరోనా కేసులు 47 కి పెరిగినట్టు ఆరోగ్య శాఖ వెల్లడించింది. ఇరాన్ నుంచి జమ్మూ కాశ్మీర్ చేరుకున్న 63 ఏళ్ళ మహిళకు కోవిడ్-19 సోకినట్టు అనుమానిస్తున్నారు. అటు-వచ్ఛే వారం ప్రధాని మోదీ బంగ్లాదేశ్  పర్యటనకు వెళ్లనుండగా.. కరోనా కారణంగా ఆ టూర్ రద్దు చేసుకున్నారు. ఈ వైరస్ వల్ల గ్లోబల్ ఎకానమీకి ఈ ఏడాది 1.0- 2.0 ట్రిలియన్ డాలర్ల మేర నష్టం వాటిల్లనుందని ఐక్యరాజ్యసమితికి చెందిన నిపుణులు అంచనా వేస్తున్నారు.