గమ్యం చేరకముందే అనంత లోకాలకు.. ఘోర రోడ్డు ప్రమాదంలో ఒకే కుటుంబానికి చెందిన నలుగురు మృతి

మధ్యప్రదేశ్‌లో వర్షాలు కారణంగా చోటుచేసుకున్న ఘోర రోడ్డు ప్రమాదం ఒకే కుటుంబంలో తీవ్ర విషాదాన్ని నింపింది. ఉమరియా జిల్లాలో జాతీయ రహదారి 43పై గురువారం (జూలై 09) తెల్లవారుజామున జరిగిన ఈ దుర్ఘటనలో ఒకే కుటుంబానికి చెందిన నలుగురు అక్కడికక్కడే మరణించారు. మృతులలో ఒక గ్రామ సర్పంచ్, ఒక మహిళా హెడ్ కానిస్టేబుల్, ఒక మూడేళ్ల బాలుడు ఉన్నారు.

పోలీసుల కథనం ప్రకారం, అనూప్పూర్ జిల్లా లీలా టోలాకు చెందిన మార్కో కుటుంబం, తమ చిన్న కుమార్తె ఖుష్బూ మార్కోను పరీక్ష కోసం చిత్రకూట్‌లోని పరీక్షా కేంద్రంలో దింపడానికి కారులో బయలుదేరింది. అయితే, తెల్లవారుజామున 3 నుండి 4 గంటల మధ్య సివిల్ లైన్స్ పోలీస్ స్టేషన్ పరిధిలోని భరౌలా గ్రామంలో గల సిద్ధబాబా ఆలయం సమీపానికి రాగానే వీరి వాహనం ప్రమాదానికి గురైంది. భారీ వర్షం, అతివేగం కారణంగా అదుపు తప్పిన కారు, రోడ్డు పక్కన నిలిపి ఉంచిన ట్రక్కును వెనుక నుంచి బలంగా ఢీకొట్టింది.

ఈ ప్రమాద తీవ్రతకు కారు పూర్తిగా నుజ్జునుజ్జు అయ్యింది. 37 ఏళ్ల సర్పంచ్ కుల్పత్ సింగ్, ఆయన భార్య, హెడ్ కానిస్టేబుల్ అయిన సవితా సింగ్ మార్కో (32), వారి మూడేళ్ల కుమారుడు రుద్ర ప్రతాప్, కుల్పత్ సింగ్ సోదరుడి కుమార్తె ప్రియాంక సింగ్ (24) ఘటనా స్థలంలోనే ప్రాణాలు కోల్పోయారు. ప్రమాదం జరిగిన వెంటనే కారులో చిక్కుకుపోయిన మృతదేహాలను పోలీసులు, స్థానికులు తీవ్రంగా శ్రమించి వెలికితీసి, పోస్ట్‌మార్టం నిమిత్తం జిల్లా ఆసుపత్రికి తరలించారు.

మరోవైపు, పరీక్ష రాయవలసిన ఖుష్బూ మార్కో (22) తీవ్రంగా గాయపడింది. ప్రమాదం తర్వాత ఆమె శ్వాస ఆగిపోగా, జిల్లా ఆసుపత్రి వైద్యులు తక్షణమే సీపీఆర్ (CPR) అందించి ప్రాణాలు నిలిపారు. అనంతరం ఆమెను మెరుగైన చికిత్స కోసం జబల్‌పూర్‌లోని నేతాజీ సుభాష్ చంద్ర బోస్ వైద్య ఆసుపత్రికి తరలించారు. ప్రస్తుతం ఆమె పరిస్థితి విషమంగా ఉంది. కారు డ్రైవర్ దాదన్ స్వల్ప గాయాలతో బయటపడినప్పటికీ తీవ్ర దిగ్భ్రాంతిలో ఉన్నాడు.

పోలీసులు ప్రమాదానికి గురైన వాహనాలను స్వాధీనం చేసుకుని దర్యాప్తు ప్రారంభించారు. రాష్ట్రంలో ఎడతెరిపి లేకుండా కురుస్తున్న వర్షాల వల్ల రోడ్డు ప్రమాదాలు పెరుగుతున్నాయని, జాతీయ రహదారులపై ప్రయాణించేటప్పుడు వాహనదారులు అత్యంత జాగ్రత్తగా వ్యవహరించాలని పోలీసులు విజ్ఞప్తి చేశారు.

మరిన్ని క్రైమ్ వార్తల కోసం ఇక్కడ క్లిక్ చేయండి..