భిక్షాటనతో కోట్లు కూడబెట్టిన కాస్ట్లీ బిచ్చగాడు.. ఇతగాడి ఆస్తులు తెలిస్తే మైండ్ బ్లాక్..!

మధ్యప్రదేశ్‌లో భిక్షాటనకు సంబంధించి ఒక షాకింగ్ నిజం వెలుగులోకి వచ్చింది. ఇండోర్ వీధుల్లోని సరాఫా ప్రాంతంలో సంవత్సరాలుగా భిక్షాటన చేస్తున్న ఒక యాచకుడు ధనవంతుడిగా మారాడు. అతనికి మూడు ఇళ్ళు, ఒక కారు, మూడు ఆటో రిక్షాలు ఉన్నాయి. ఆ యాచకుడిని మంగీలాల్‌గా గుర్తించారు. మహిళా, శిశు అభివృద్ధి శాఖ నిర్వహిస్తున్న భిక్షాటన నిర్మూలన ప్రచారంలో భాగంగా మంగీలాల్‌ను రక్షించింది. అతని నిజమైన గుర్తింపు తెలుసుకుని అధికారులు షాక్ అయ్యారు.

సరఫా వీధుల్లో చెక్క బండి, వీపు మీద బ్యాగు, చేతుల్లో బూట్లు వేసుకుని తిరిగే మంగీలాల్ అందరి సానుభూతిని పొందాడు. అతను రోజుకు 500 నుండి 1000 రూపాయల వరకు సంపాదిస్తాడు. అతను ఒక్క మాట కూడా మాట్లాడకుండా.. ప్రజల వద్దకు వెళ్లేవాడు. ప్రజలు స్వయంగా అతనికి డబ్బు ఇచ్చేవారు. విచారణలో, సరఫా ప్రాంతంలోని కొంతమంది వ్యాపారులకు అప్పుగా డబ్బులు ఇచ్చినట్లు తేలింది. భిక్షాటన చేయడం ద్వారా సంపాదించిన డబ్బులను ఉపయోగించానని మంగీలాల్ అంగీకరించాడు. అతను రోజువారీ, వారపు ఆధారంగా వడ్డీ రేట్లపై డబ్బు అప్పుగా ఇచ్చేవాడు. వడ్డీని వసూలు చేయడానికి ప్రతిరోజూ సరఫా ప్రాంతానికి వస్తున్నట్లు గుర్తించారు.

మంగీలాల్ నగరంలోని వివిధ ప్రాంతాలలో మూడు కాంక్రీట్ బంగ్లాలు ఉన్నట్లు రెస్క్యూ టీం నోడల్ ఆఫీసర్ దినేష్ మిశ్రా తెలిపారు. భగత్ సింగ్ నగర్‌లో ఆయనకు 16 బై 45 అడుగుల మూడంతస్తుల ఇల్లు ఉంది. శివనగర్‌లో 600 చదరపు అడుగుల బిల్డింగ్, అల్వాస్‌లో 10 బై 20 అడుగుల BHK ఇల్లు కూడా ఉన్నాయి. అల్వాస్‌లోని ఇంటిని తన వైకల్యం ఆధారంగా ప్రభుత్వం రెడ్‌క్రాస్ సహాయంతో అందించింది. ఇంకా, మంగీలాల్‌కు మూడు ఆటో-రిక్షాలు ఉన్నాయి, వాటిని అతను అద్దెకు ఇచ్చి డబ్బులు తీసుకుంటాడు. అతనికి డిజైర్ కారు కూడా ఉంది. దానిని నడపడానికి అతను ఒక డ్రైవర్‌ను కూడా నియమించుకున్నట్లు రెస్క్యూ టీం నోడల్ ఆఫీసర్ దినేష్ మిశ్రా వెల్లడించారు.

అతను తన తల్లిదండ్రులతో అల్వాస్‌లో నివసిస్తున్నాడు. అతని ఇద్దరు సోదరులు విడివిడిగా నివసిస్తున్నారు. ఇండోర్‌ను భిక్షాటన నుండి విముక్తి చేసే ప్రచారం ఫిబ్రవరి 2024 నుండి ప్రారంభమైందని జిల్లా ప్రోగ్రామ్ ఆఫీసర్ రజనీష్ సిన్హా తెలిపారు. ప్రాథమిక సర్వేలో 6,500 మంది బిచ్చగాళ్లను గుర్తించారు. వీరిలో 4,500 మందికి కౌన్సెలింగ్ ఇచ్చి భిక్షాటన నుండి విముక్తి కల్పించారు. 1,600 మంది బిచ్చగాళ్లను రక్షించి ఉజ్జయినిలోని సేవాధామ్ ఆశ్రమానికి పంపగా, 172 మంది పిల్లలను పాఠశాలల్లో చేర్పించారు. భిక్షాటనలో పాల్గొన్న, ప్రోత్సహించే వారిపై కఠినమైన చర్యలు కొనసాగుతాయని మధ్యప్రదేశ్ ప్రభుత్వం స్పష్టం చేసింది.

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..